Европа се соочува со предизвикот на долгорочната невработеност, бидејќи бројот на невработени кои се без работа повеќе од една година достигна 4,2 милиони луѓе во 2024 година, според Европската статистичка служба (Евростат). Овие лица, кои се на возраст од 15 до 74 години, претставуваат секој трети невработен Европеец.

Стапката на долгорочна невработеност во Европската Унија во 2024 година изнесуваше 1,9 отсто, со значајни разлики меѓу различни региони. Во 82 од вкупно 195-ти статистички региони на ЕУ стапката надмина европскиот просек, додека во 106 беше под него, а во седум региони стапката беше на ниво на просекот.

Највисоки стапки се забележани во јужните земји на ЕУ и некои надворешни европски региони. Во шпанските автономни региони Мелиља и Сеута, долгорочната невработеност достигна 16,3% и 15,8% соодветно. Во италијанските региони Кампања, Калабрија и Сицилија стапката беше значајно висока, додека неколку региони во Чешка и Холандија достигнаа најниски стапки од 0,4%.

Тагови: Европа Евростат невработеност

Понекогаш промената не доаѓа ненадејно – таа се најавува низ суптилни знаци кои често ги игнорираме додека не стане предоцна. Ако секое утро стануваш без мотивација, чувствуваш дека си „заглавен“ или дека твојот труд не се вреднува, можеби твоето тело и ум веќе ти испраќаат сигнал дека е време за ново професионално поглавје.

Недостаток на мотивација и задоволство

Ако она што некогаш те исполнувало сега ти предизвикува стрес или рамнодушност, тоа е еден од првите индикатори дека работата веќе не те поттикнува. Не е нормално секој ден да биде борба со сопствената волја.

Нема простор за раст и развој

Кога чувствуваш дека си стигнал до „плафон“ – нема нови предизвици, учење или можности за напредок – тоа е јасен знак дека треба да бараш средина која ќе го вреднува твојот потенцијал.

Нарушен баланс помеѓу работа и живот

Ако работата почнува да влијае на твоето здравје, социјален живот или семејство, време е за преиспитување. Ниедна плата не ја оправдува хроничната исцрпеност или незадоволството.

Промената секогаш носи доза на страв, но и можност за нов почеток. Не ја чекај „совршената прилика“ – препознај ги знаците, довери му се на својот инстинкт и направи го првиот чекор кон работа која ќе те исполнува.

Тагови: ментално здравје нова работа работни навики

Пратениците на денешната седница на Комисијата за финансирање и буџет ќе расправаат за измените на Законот за данок на додадена вредност. Според предложената регулатива, се предвидува укинување на ослободувањето од ДДВ за увоз на пратки со мала вредност, со што крај на оваа пракса можат да очекуваат сите пратките со вкупна вредност под 22 евра.

Оваа измена се очекува да изврши удар врз бројните купувачи коишто редовно нарачуваат производи преку популарни меѓународни платформи како што се „Тему“ и „Али експрес“. Поточно, според актуелната законска рамка, производите купени од странство кои имаат вредност под 22 евра не подлежат на даноци, но измените предложени денес би го промениле тоа.

Во законското образложение се истакнува дека ќе се задржи ослободувањето од ДДВ само за пратки од некомерцијална вредност испратени од физичко лице на физичко лице, додека за категориите како алкохол, парфеми и тутун, ослободувањето нема да важи. Оваа измена има за цел да обезбеди посеопфатно оданочување и да го зголеми буџетскиот прилив на средстава од ваквите трансакции.

Тагови: AliExpress пратеници Тему

Данска го прави првиот чекор кон ограничување на користењето на социјалните медиуми за младите, со воведување минимална возрасна граница од 15 години. Оваа одлука е резултат на загриженоста за менталното здравје на младите, кои се под голем притисок од влијанието на интернет платформите. Минималната возрасна граница е поддржана од мнозинството во парламентот, но сè уште не е прецизирано на кои платформи ќе се однесува.

Во меѓувреме, Австралија презема слични мерки, подготвувајќи се за казни за компании што ќе дозволат деца под 16 години да креираат профили. Хрватска, од друга страна, прави промени во правилникот за користење на мобилни телефони во училиштата, додека Македонија се уште размислува за слични чекори.

Во Македонија, слични дискусии беа иницирани минатата година, поради трендови на популарни платформи како Тик-Ток кои резултираа со повреди. Иако либерално настроените западни земји се воздржуваат од целосни забрани, интервенции за заштита на младите се повеќе се разгледуваат. Прашањето е колку е Македонија подготвена за вакви процеси и дали ќе следи по стапките на Данска и Австралија.

Тагови: Данска деца Македонија социјални мрежи