Која е Катерина Велјаноска? Раскажи ни малку повеќе за себе
Јас сум Катерина Велјаноска, родена во Гостивар, а последните неколку години живеам и работам во Германија. Дипломирав Компјутерско инженерство на Универзитетот на Југоисточна Европа во Тетово, имам магистер по Бизнис информатика и моментално аплицирам за докторски студии, со специјализирана обука за DevOps и Cloud Computing.
Имам повеќегодишно професионално искуство во Македонија, а во Германија сум веќе пет години, што ми овозможи да се натпреварувам со најдобрите европски стандарди во IT секторот.
Победата на еден од најпрестижните IT конгреси во Германија за мене е потврда дека упорноста, знаењето и талентот од Македонија може да се мерат со светските лидери.
Катерина, какво е чувството да се добие признание „Women of the Year 2025“ во Германија?
Ова признание е повеќе од лична победа – тоа е доказ дека жените од малите земји можат да стојат рамо до рамо со најсилните tech професионалци во светот. Нашето образование, вредностите што ги носиме од семејството, трудот и дисциплината – сето тоа е на исто ниво со европските стандарди. Чувството е неверојатно, но и одговорно. Најмногу ме радува сознанието дека мојата приказна инспирира многу девојки – и токму тоа е најголемата победа.
Конкуренцијата броеше над 300 кандидатки. Што точно беше твојата номинација и што те издвојуваше?
Бев номинирана како DevOps и софтверски инженер со фокус на IT безбедност, cloud технологии и вештачка интелигенција. Работев на развој на GPS-навигациски систем за хеликоптери во авијацискиот сектор, а активно се залагам за дигитална трансформација. Како speaker на меѓународни конференции – Women in Tech Global, Elevate Her UK и други – се трудам да инспирирам млади жени преку образование, менторство и личен пример.
Мислам дека ме издвојуваше комбинацијата од технички резултати, лидерство и мојата мисија да отворам врати за други жени. Автентичноста секогаш победува.
Кои се најголемите предизвици за една жена во светот на технологијата?
Не правам поделби меѓу „машко“ и „женско“ во работата – за мене постојат само професионалци и непрофесионалци. Но свесна сум за состојбата и предрасудите што постојат. Среќна сум што работам во средина каде тие не се чувствуваат, но глобално – предизвиците се реални.
Она што го гледам како огромна предност кај жените во IT е вродената подготвеност за поддршка, емпатија и градење силни мрежи. Жените креираат иновативни перспективи токму затоа што размислуваат различно, се здружуваат и создаваат нови можности.
Каде ја гледаш својата кариера во следните години?
Сакам да продолжам да градиме силни tech тимови, да поддржувам млади жени насекаде во светот, но и да охрабрам уште повеќе девојки од Македонија да направат чекор во IT. Сакам да бидам доказ дека упорноста донесува резултати. И да – целта ми е да отворам уште поголеми врати за Македонија на глобално tech ниво. Имаме талент, само треба гласно да се слушне.
Што би ѝ порачала на една млада девојка што сака да влезе во технологијата?
Биди храбра. Не чекај дозвола. Не се плаши да згрешиш – плаши се да не пробаш. Запомни: твојот глас има моќ, твојата приказна има вредност, а твоето време доаѓа. Tech светот е огромен – има место и за тебе.
Која е твојата најголема лекција од ова искуство?
Дека успехот доаѓа кога ќе престанеш да се споредуваш со другите и ќе почнеш да се натпреваруваш само со себе. Кога работиш со љубов, истрајност и вистинска мотивација, светот тоа го препознава.
Тагови: IT security - IT безбедност Универзитет на Југоисточна Европа Women in Tech