Сите сме биле таму штотуку дипломирани, со малку или без никакво работно искуство, а пред нас стои прашањето: „Како да се истакнам кога моето CV е речиси празно?“ Добрата вест е дека искуството не е единственото што работодавачите го ценат. Она што навистина прави разлика е иницијативата, ставот и желбата за учење.

1. Потенцирај ги вештините, не само искуството

Дури и ако немате формална работа зад себе, сигурно имате вештини кои можете да ги истакнете – организациски, комуникациски, технички или креативни. Спомнете ги проектите од факултет, волонтерските активности, или лични иницијативи (на пример: одржување на студентски настан, водење блог, или работа на групен проект).

Совет: Наместо „немам искуство“, напишете „имам развиени аналитички и тимски способности преку академски и волонтерски ангажмани“.

2. Користете го мотивациското писмо како ваше тајно оружје

Ако CV-то не кажува доволно, мотивациското писмо може да го направи тоа наместо вас. Во него објаснете зошто сакате да ја работите таа работа, што ве мотивира и како можете да придонесете. Искреност и ентузијазам често прават посилно впечаток од годините искуство.

3. Покажете дека инвестирате во себе

Работодавачите сакаат луѓе кои учат и се развиваат. Запишете краток курс, добијте сертификат или завршете бесплатна онлајн обука – денес има безброј достапни ресурси. Самото споменување дека учите нешто ново покажува амбиција и проактивност.

4. Изградете онлајн присуство

Дури и без искуство, можете да се истакнете со LinkedIn профил кој зборува за вашите цели, интереси и вредности. Споделувајте мислења, коментирајте на теми од вашата област и изградете мрежа. Понекогаш токму преку активностите на социјалните мрежи доаѓаат и првите шанси за работа.

5. Не се потценувајте – сите некаде почнуваат

Секој професионалец некогаш бил почетник. Важно е да не го гледате недостатокот на искуство како слабост, туку како празно платно што можете да го исполните со својата енергија, љубопитност и желба за раст.

Запомнете: Празното CV не значи празен потенцијал.

Она што можеби сега ви недостига во искуство, можете целосно да го надоместите со ентузијазам, труд и проактивност. Токму тоа е првиот чекор кон вашата идна кариера.

Прочитајте и за: Луѓето зад успехот: како вработените ја градат или рушат компанијата

Тагови: CV HR совети за работа

Грчкиот парламент го усвои новиот закон за труд кој овозможува 13-часовен работен ден, и покрај масовните штрајкови и противење од опозицијата. Владата тврди дека целта е модернизација на законодавството и поголема флексибилност на пазарот на труд, додека опозициската партија Сириза го нарече законот „монструозен“. Новите правила дозволуваат подолг работен ден само во приватниот сектор и ограничено – до 37 дена годишно.

Законот предвидува 150 часа годишна прекувремена работа, при што стандардната 40-часовна работна недела останува непроменета. Работниците кои ќе прифатат дополнителни часови ќе добијат 40% повисока плата и гаранција дека нема да бидат отпуштени доколку одбијат прекувремена работа. Владата истакна дека ова е во согласност со европските правила, кои дозволуваат просечно до 48 часа неделно, вклучувајќи прекувремена работа.

Синдикатите остро реагираа и веќе одржаа два генерални штрајка, барајќи повлекување на законот. Ова доаѓа по минатогодишното воведување на шестдневна работна недела во одредени индустрии, со цел поттикнување на економскиот раст. Според податоците на ЕУ, Грција веќе има најдолга работна недела во Унијата – со просечно 39,8 часа.

Тагови: Грција закон работници работнички права

На редовната седница, словенечката влада го усвои предлогот за посебен закон за божиќен бонус, кој ќе биде разгледан од Економскиот и социјален совет во наредните денови. Вицепремиерот Матеј Арчон изјави дека целта е дискусиите да бидат завршени до 27 октомври.

Обврската за исплаќање на божиќен бонус оваа година ќе биде најдоцна до 18 декември и ќе изнесува 639 евра бруто. Компаниите со ликвидни проблеми ќе можат да го одложат исплаќањето до 31 март наредната година, со услов да не исплаќаат дивиденди и бонуси на менаџментот.

Јавниот сектор ќе го добие целосниот износ на бонусот од 639 евра, а Министерството за финансии ќе подготви предлог за исплата за сите вработени. Износот на бонусот ќе биде ослободен од даноци и придонеси, што го прави значаен поттик пред празниците.

Тагови: закон Словенија божиќен бонус

Нискобуџетната холандско-француска авиокомпанија „Трансавиа“ ја укинува редовната авио-линија меѓу Скопје и Амстердам, само осум месеци по нејзиното воведување. Последниот лет е закажан за 26 октомври 2025 година, потврдија од компанијата.

‘Трансавиа‘ нема да ја оперира линијата Скопје–Амстердам во претстојната летна сезона. Сепак, постојано ја разгледуваме нашата мрежа и ги оценуваме можностите врз основа на побарувачката и оперативните аспекти, изјави портпаролот на авиокомпанијата, Ферле ван дер Бринк.

Линијата беше воведена на 2 март годинава, без користење на субвенции од македонскиот државен буџет. Со нејзиното укинување, Македонија повторно останува без директна врска со аеродромот „Схипхол“ во Амстердам, кој беше редовно поврзан со Скопје последен пат во 2008 година, пред престанокот на летовите на тогашната национална авиокомпанија МАТ.

Летовите на „Трансавиа“ се изведуваа двапати неделно – во четврток и недела, а интересот за оваа линија беше оценет како умерен, главно меѓу дијаспората и туристите.

И покрај повлекувањето на „Трансавиа“, Македонија и понатаму ќе биде поврзана со Холандија преку линијата Скопје–Ајднховен на авиокомпанијата „Визер“, која ќе продолжи да лета четири пати неделно и во зимската сезона.

Во текот на летната сезона, Амстердам беше поврзан и со Охрид, преку чартер-летови организирани од туроператорот „ТУИ“ за холандските туристи.

„Трансавиа“ е втората по големина нискобуџетна авиокомпанија во Холандија и функционира како подружница на групацијата „Ер Франс-КЛМ“.

Тагови: Wizz Air скопскиот аеродром Трансавиа