Која е Тина Русева зад микрофонот и надвор од сцената?
Зад микрофонот, јас сум Тина што секоја песна ја носи во срце, со искрена желба да допре до душите и да остави трага. Кога пеам, се губам во музиката и заборавам на сè, затоа што секоја нота ми значи повеќе од зборови.
Надвор од сцената, сум скромна и едноставна девојка што го цени мирот, топлината и се радува на малите нешта.
Твојот настап на The Voice освои илјадници срца. Какво беше чувството да застанеш пред толкава публика и да добиеш толку искрена поддршка?
Кога нешто го сакаш повеќе од сè, луѓето го чувствуваат тоа. Таа искрена емоција и љубов кон музиката не може да се одглуми. Да застанам на таа сцена, пред толкава публика, и да добијам толку силна и искрена поддршка беше чувство што тешко се опишува со зборови. Бев преплавена со емоции, благодарност, возбуда, среќа... но и чувство на одговорност да дадам сè од себе. Тоа беше момент кој ќе го паметам цел живот.
Како реагираше твоето најблиско опкружување по настапот? Имаш ли некој момент на поддршка што особено ти останал во сеќавање?
Добив огромна поддршка од целото семејство, но брат ми... тој е посебна приказна. Со него како да сме телепатски поврзани. Секогаш ми се јавуваше и се појавуваше во точното време, со неговата луда, заразна енергија како да знаеше кога ми треба.
Кога размислуваш за своето музичко патување, кој беше најголемиот предизвик, а што ти донесе најголемо задоволство?
Секако најголемиот предизвик ми беше самото пријавувањето на “The Voice”. А најголемо задоволство беа самите реакции на жирито и публиката.
Дали има некоја песна што има посебно значење за тебе – нешто што ја раскажува твојата приказна подобро од зборови?
Прилично интересно е што мојата прва децка песна “Чуден Сон” ги опишува делимично нештата што моментално ми се случуваат а се надевам дека и во целост зборовите ќе станат јаве.
Што те мотивира да продолжиш напред и како го замислуваш следниот чекор во твојата кариера?
Секогаш ме мотивира љубовта кон музиката. А следниот чекор е да имам свои авторски песни и да настапувам на големи сцени.
Што би им порачала на младите кои сонуваат да застанат на голема сцена, но се плашат да го направат првиот чекор?
На сите кои сонуваат да застанат на голема сцена, но се плашат да го направат првиот чекор, би им кажала дека стравот е природен дел од секој нов почеток, но да не дозволуваат тој да ги парализира. Храброста не е отсуство на страв, туку одлучноста да се продолжи и покрај него. Верувајте во себе, фокусирајте се на вашата страст и запомнете дека секоја голема сцена започнува со една мала проба. Само тргнете и светот ќе ви стане сцена!
