Град Скопје планира да постави 30 камери на јавни површини со цел да го намали вандализмот и оштетувањето на урбаната опрема. Видеонадзорот ќе опфати паркови, детски игралишта, плоштади, фонтани, контејнери и канти за отпад, како и сообраќајни знаци, семафори, канделабри, улично осветлување и друга градска инфраструктура. Точните локации ќе бидат утврдени по спроведувањето на јавната набавка.
Од Градот велат дека системот нема да служи само за откривање вандали, туку и за спречување на намерно предизвикување пожари, создавање диви депонии и незаконско фрлање отпад. Според најавите, целта е јавните простори во главниот град да станат почисти, побезбедни и поуредни.
За управување со видеонадзорот ќе биде формиран Контролен центар во просториите на Град Скопје, каде пет вработени ќе работат во три смени. Пристапот до снимките ќе биде ограничен и евидентиран, а нивното прегледување ќе биде возможно само со писмено барање и одобрение од градоначалникот. Снимките ќе се чуваат до 30 дена, освен кога закон предвидува подолг рок, додека на секоја локација ќе има јасно известување дека просторот е под видео надзор. Засега не се познати трошоците за системот ниту рокот за негово поставување.
Тагови: камери Сејф сити - Безбеден град