Последното зголемување на цената на струјата не можеше да се избегне,  вели претседателот на Регулаторната комисија за енергетика, Марко Бислимоски во интервју за „360 степени“ на МРТ 1. 

Според Бислимовски, треба да се покаже разбирање за „Електрани на Северна Македонија“ (ЕСМ) бидејќи државната компанија, како што вели, мора да застане на здрави нозе.

Во тој дел ние каде што ги регулираме цените, во делот на мрежарините, ние ја намаливме цената за пренос и дистрибуција и како збир ја намаливме за 5 отсто бидејќи постоеше простор да ја намалиме. Ја намаливме и цената на МЕПСО, ја намаливме и цената на ‘Електродистрибуција’, ја намаливме и цената на МЕМО. Кај делот на ЕСМ треба сите да покажеме разбирање. Ситуацијата е тешка, ЕСМ работи во загуби и ЕСМ е стожерна компанија во енергетскиот сектор. За ЕСМ дали да опстои или да не опстои, ние немаме сценарио Б. ЕСМ мора да застане на здрави нозе, ЕСМ мора да си го зголеми своето производство на електрична енергија, но и треба полека да го гледаме ЕСМ не само како производна компанија, туку и како компанија која, покрај тоа што произведува електрична енергија, и продава електрична енергија, рече Бислимоски.

На прашањето дали можеа државните електрани да останат на 62 евра за мегават-час, како цена по која досега ја продаваа струјата на универзалниот снабдувач „ЕВН хоум“ и да не ја зголемуваат на 65 евра, Бислимоски рече дека ако останела истата цена, ситуацијата ќе се влошела.

ЕСМ и во 2024, 2023, 2022 и 2021 ги заврши годините со загуби. Сега не знам како беше, можеби во 2023 или 2024 прикажа одредена добивка, но тоа беше пред сѐ поради трансферите што се правеа од државниот буџет. Значи, да останеше истата цена, ситуацијата уште повеќе ќе се влошеше. ЕСМ го презема ризикот да ја обезбеди електричната енергија за потребите на домаќинствата по 65 евра, а реално неговата производна цена е помеѓу 90 и 100 евра за мегават-час. Значи, од старт ЕСМ, за да обезбеди околу три милијарди и 200 милиони киловат-часови, работи со загуба. Дополнително, ЕСМ продава електрична енергија и на ‘Електродистрибуција’ за покривање на загубите, тоа се околу 800 милиони киловат-часови, но таму цената е 105 евра за мегават-час. Значи, таму каде што му е најголемата продажба, таму се најголемите загуби. И сега, да останеше 62 евра, уште повеќе финансиските загуби во ЕСМ ќе се зголемуваа, така што треба да му дадеме шанса на ЕСМ полека финансиски да закрепнува и мислам дека тоа ќе се случи во наредниот период, вели претседателот на РКЕ.

Тагови: ЕСМ Марко Бислимовски поскапува струјата

Бугарија официјално го усвојува еврото како национална валута на 1 јануари, станувајќи 21-ва членка на еврозоната, откако ги исполни сите формални критериуми оваа година, вклучувајќи ја инфлацијата, буџетскиот дефицит, долгорочните каматни стапки и стабилноста на девизниот курс.

Приклучувањето кон еврозоната претставува важен институционален и економски чекор за земјата со 6,7 милиони жители, која е членка на Европската Унија од 2007 година, објави Ројтерс.

Освен што ќе го замени левотот со евро, Бугарија ќе добие и место во Советот на гувернери на Европската централна банка, што ќе ѝ овозможи директно учество во одлуките за монетарната политика.

За бизнис секторот во Бугарија, особено за компаниите што работат во странство, преминот кон еврото носи намалени трансакциски трошоци, елиминирање на конверзијата на валути и поедноставно фактурирање.

Бизнисмените истакнуваат дека новата валута ќе ја зголеми транспарентноста на цените, ќе ја олесни трговијата и ќе ја подобри инвестициската привлечност на земјата.

Сепак, некои Бугари се загрижени за можно зголемување на цените и политичка нестабилност, особено откако владата во Софија поднесе оставка овој месец поради протестите против предложеното зголемување на даноците.

Анкетите на јавното мислење покажуваат дека општеството е поделено по прашањето за усвојување на еврото, додека деловната заедница силно го поддржува влезот во еврозоната.

Државните институции веќе започнаа со подготовките за транзицијата, при што цените во продавниците низ Софија се прикажани и во лева и во евра, додека владините кампањи и медиумските реклами ги информираат граѓаните за фиксниот девизен курс и техничките аспекти на размената на валута.

Аналитичарите предупредуваат дека постарото население, особено во руралните области на Бугарија, би можело да има тешкотии да се прилагоди на европската валута.

Бугарија ќе се приклучи на еврозоната три години по Хрватска, која го воведе еврото во јануари 2023 година.

Со ова проширување, бројот на граѓани што го користат еврото ќе надмине 350 милиони, што дополнително ќе ја зајакне улогата на заедничката валута како еден од клучните столбови на европската економска интеграција, додава британската агенција.

Тагови: Бугарија евро

Секоја нова година носи и нови празнични филмови што полека стануваат дел од модерната новогодишна традиција. Ниту 2025 не отстапува од трендот, со филмови што носат свежи идеи, современ пристап и празнична атмосфера блиска до модерната публика.Ако сакате нешто ново, актуелно и „тазе“, ова се пет празнични филмови од 2025 што вреди да ги ставите на листа.

My Secret Santa

Романтична комедија за самохранa мајка што се маскира како Дедо Мраз за да добие работа во зимски одморен центар – филм полн со хумор, неочекувани случки и празнична магија.

Jingle Bell Heist

Романтична комедија со необична ситуација: двајца странци планираат „празнична кражба“ во лондонски огромен трговски центар, што води до искри, романса и забавни пресврти.

A Merry Little Ex-Mas

Современа празнична романтична приказна околу семејството и втори шанси – идеална за оние што сакаат емотивни, но празнични филмови.

Unexpected Christmas

Комедија за семејни празнични празнувања што завршуваат во хаос – забавна и лесна за гледање со целото семејство.

Merry Christmas, Ted Cooper!

Еден од најпопуларните 2025 празнични филмови според гледачите и критичарите – приказна за човек чии планови за Божиќ се преуредуваат низ необични случки и топли моменти.

Празничните филмови од 2025 година носат свеж пристап и приказни во кои лесно можеме да се пронајдеме. Без разлика дали барате романса, семејна топлина или лесна комедија, овие наслови се одличен избор за создавање нови празнични навики и убави спомени.

Тагови: новогодишна ноќ празници филм

Како и во изминатите три дена, така и денеска, грчките земјоделци планираат две четиричасовни блокади на граничниот премин Евзони кон нашата земја, со што ќе биде во прекин сообраќајот за сите возила за влез и излез од Грција во периодот од 11 до 15 часот по македонско, или од 12 до 16 по грчко време. Најавени се блокади и во попладневните часови од 17 до 21 часот, односно од 18 до 22 часот по локално време.

Се очекува земјоделците од утре до петок да ги тргнат блокадите поради новогодишните празници за да го олеснат патувањето на граѓаните, како што беше случај и минатата седмица за Божиќ, а в сабота на заеднички состанок да ги одредат нивните следни чекори.

Протестите на земјоделците траат веќе еден месец, започнаа на 30 ноември, поради зголемените трошоци за производство и ниските цени за продажба на нивните производи, поради скандалот со европските земјоделски субвенции, а главното барање е исплатата на заостанатите субвенции.

На граничниот премин Евзони, блокадата започна ден подоцна, на 1 декември откако земјоделци од северна Грција ги паркираа нивните трактори на грчката страна од границата, а речиси секојдневно во изминатиот месец на неколку часа го блокираат сообраќајот за сите возила.

Грчкиот премиер Кирјакос Мицотакис во интервју за телевизијата „Action 24“ се осврна и на протестите на земјоделците изразувајќи надеж дека во периодот од Нова година до Водици во вторник, земјоделците ќе ги тргнат блокадите и ќе го олеснат патувањето на граѓаните, „без големи тешкотии и непријатности“.

Колку повеќе се измачуваат граѓаните, толку повеќе земјоделците ја губат оправданоста на нивните барања, особено кога одбиваат да дојдат на дијалог, нагласи Мицотакис.

Додаде дека не треба да се заборави дека во Грција има речиси 400.000 професионални земјоделци, на блокадите можеби има 4.000 трактори, „но огромното мнозинство од земјоделците и сточарите не учествуваат во блокадите“. 

Тагови: Грција Евзони блокади грчките земјоделци