Македонските граѓани кои патуваат во земјите од Шенген зоната наскоро ќе се соочат со нови правила, според кои покрај пасош ќе мора однапред да обезбедат и ETIAS електронско одобрение за патување. Оваа авторизација не е виза, туку задолжителна електронска дозвола за државјани од земји со безвизен режим, а нејзината цена ќе изнесува 20 евра. Од плаќање ќе бидат ослободени лицата помлади од 18 и постари од 70 години, но и тие ќе мора да аплицираат пред патувањето.

Одобрениот ETIAS ќе биде поврзан со пасошот и ќе важи до три години или до истекот на пасошот. Со него ќе може да се патува повеќепати, но и натаму ќе важи ограничувањето за престој од 90 дена во период од 180 дена. Важна новина е што без ова одобрение патникот може да не биде пуштен ниту да се качи во авион или автобус, бидејќи превозниците ќе имаат обврска да проверат дали патната документација е комплетна уште пред тргнување.

Дополнителна забуна создава и воведувањето на два различни системи — ETIAS и EES. Додека ETIAS служи како претходна електронска авторизација пред патувањето, EES е систем што ќе го евидентира влезот и излезот на патниците на надворешните граници на Шенген со користење и на биометриски податоци. И покрај одобрениот ETIAS, конечната одлука за влез и понатаму ќе ја носат граничните органи, што значи дека за патување во Европа македонските граѓани ќе мора навреме и внимателно да ја завршат целата постапка.

Тагови: EEC ETIAS

Да бидете љубезни, кооперативни и подготвени да помогнете е одлична особина на работното место. Но, постои момент кога желбата да им угодите на сите почнува да работи против вас.

Постојано велите „да“, иако немате време. Се плашите некого да не разочарате. Преземате дополнителни задачи за да не изгледате „тешки“. А кога ќе направите нешто за себе, веднаш чувствувате грижа на совест.

Проблемот е што не можете да ги задоволите сите, а обидот да го направите тоа може да ве остави без енергија, време и јасни граници.

Еве пет знаци дека можеби премногу се обидувате да им угодите на сите на работа.

1. Велите „да“ и кога всушност сакате да кажете „не“

Колегата ве замолува да преземете уште една задача. Менаџерот ви додава нешто во веќе полниот распоред. Некој бара помош токму кога сте пред крај со вашиот проект.

Првата реакција ви е: „Нема проблем, ќе завршам.“ Дури и кога знаете дека немате време. Понекогаш велиме „да“ не затоа што можеме, туку затоа што не сакаме да изгледаме нељубезно, несоработливо или неспособно.

Но, секое автоматско „да“ на туѓите барања може да стане „не“ за вашето време, енергија и приоритети.

2. Постојано се грижите што мислат другите за вас

Дали после состанок долго размислувате дали некого сте навредиле? Дали се прашувате дали колегите мислат дека сте доволно добри? Дали внимавате на секој збор затоа што не сакате некој да се налути? Ако премногу ја мерите сопствената вредност преку реакциите на другите, лесно можете да станете зависни од нивното одобрување.

На работното место не мора секој да се согласува со вас, да ве сака или секогаш да биде задоволен од вашите одлуки. Професионалноста не значи постојано одобрување од сите.

3. Преземате туѓа работа за да избегнете конфликт

„Ќе го направам јас, побрзо ќе биде.“ Ова можеби ви звучи како практично решение. Но, ако постојано ги завршувате задачите на другите затоа што не сакате да се расправате или да им кажете дека не си ја завршиле работата, со текот на времето создавате нездрава динамика.

Колегите може да се навикнат дека секогаш ќе помогнете. А вие постепено станувате личноста која има најмногу обврски не затоа што тоа е формално нејзина работа, туку затоа што никогаш не кажува „не“.

Помагањето е позитивно. Преземањето туѓа одговорност по автоматизам е нешто сосема друго.

4. Се чувствувате виновно кога ќе поставите граница

Одбивате дополнителна задача затоа што веќе сте преоптоварени. И веднаш почнувате да размислувате: „Можеби требаше да прифатам.“ „Ќе мислат дека не сум тимски играч.“ „Можев да најдам време.“

А всушност сте направиле нешто сосема нормално сте поставиле граница. Границата не значи дека не сакате да помогнете. Значи дека знаете што реално можете да преземете без да ги загрозите останатите обврски. Понекогаш најпрофесионалното „не“ може да звучи вака: „Во моментов имам приоритети со кратки рокови. Можам да ја преземам задачата, но ќе треба да поместиме нешто од тековниот список.“

Тоа не е одбивање. Тоа е јасна комуникација.

5. Вашите потреби секогаш се на последно место

Ова е можеби најголемиот знак. Постојано им помагате на другите, останувате подолго, прифаќате промени во последен момент, ги покривате колегите и се обидувате сите да бидат задоволни.

Но кога станува збор за вас нема време. Нема време за пауза. Нема време за развој. Нема време за одмор.

Нема време да кажете дека сте преоптоварени

На долг рок, ова може да доведе до замор, фрустрација и чувство дека вашиот труд се зема здраво за готово. Како да престанете да им угодувате на сите? Не мора од утре да станете личност која на сè одговара со „не“.

Почнете со мали промени

Пред да прифатите нешто, направете пауза и прашајте се: „Дали навистина можам да го направам ова или само се плашам да кажам не?“ Не одговарајте веднаш на секое барање. Дозволете си да кажете: „Ќе проверам што имам како приоритети и ќе ти кажам.“

Научете да ги разликувате љубезноста и попустливоста

И запомнете: ако некој се разочара затоа што сте поставиле разумна граница, тоа не значи дека сте направиле нешто погрешно. Не мора сите да бидат задоволни од вас

На работното место вашата цел не треба да биде сите да ве сакаат. Вашата цел е да бидете професионални, одговорни, коректни и да ја завршувате својата работа. Понекогаш ќе кажете „не“. Некогаш некој нема да се согласи со вас. Некогаш ќе поставите граница која некому нема да му се допадне. И тоа е во ред. Не можете да им угодите на сите. Но можете да научите да не се изгубите себеси додека се обидувате.

Прочитајте и за: Како да престанете да размислувате за работа по работното време?

Тагови: совети за работа

Единаесетгодишниот пијанист од Скопје, Андреј Цековски, во Њујорк ги прими златниот медал и пехарот за освоеното прво место на меѓународниот натпревар International Youth Music Competitions.

Цековски победи во категоријата „USA Classical Hobbyist“ на натпреварот што се одржа во март годинава. Признанијата му беа врачени минатата недела на гала-вечер во The DiMenna Center for Classical Music, каде што младиот пијанист настапи пред меѓународна публика.

На сцената тој го претстави и македонското знаме, а настапот го сподели со победниците од останатите категории, меѓу кои млади музичари од Австралија, Канада, Кина, Полска, САД, Украина, Мексико, Романија, Црна Гора и Турција.

Според оценката на жирито, Цековски се издвоил со музикалност, техничка сигурност и уметничка зрелост, квалитети кои, како што било посочено, ретко се среќаваат кај музичари на негова возраст.

Андреј е ученик во шесто одделение во Државното музичко училиште „Илија Николовски-Луј“ во Скопје, каде што по пијано работи со наставничката Марија Диманин-Богоевска. Пијано започнал да изучува на четиригодишна возраст.

Паралелно со музичкото образование, тој е ученик и во ООУ „Блаже Конески“. Има освоено повеќе државни награди по различни предмети, а последните две години тренира и ракомет.

Неговиот успех во Њујорк е уште едно меѓународно признание за млад македонски музички талент.

Тагови: ученици училиште награда

Денешното утро, петок (11 септември), во Македонија започна со ведро и сончево време во поголем дел од земјата. Утрото помина претежно мирно, со слаб ветер и без позначителни воздушни струења.

И денес нашата земја останува под влијание на топлотниот бран кој пристигнува од југ и веќе подолг период носи невообичаено високи температури за овој дел од годината. Температурите ќе бидат за околу 6 до 8 степени над просекот за средината на септември.

Во текот на денот се очекува сончево и топло време, со појава на мала до умерена облачност. Ќе дува слаб до умерен ветер од јужен правец.

Во Скопје ќе преовладува сончево и топло време, со мала до умерена облачност и слаб до умерен ветер од југоисточен правец. Во одредени делови од Скопската Котлина, во текот на денот постои можност за развој на нестабилна облачност, која локално може да донесе краткотраен пороен дожд и ретки грмежи.

Временска прогноза за Скопје. За другите градови кликни ТУКА.

11.9.2026 Петок   25° / 32° 08:11   20:54

12.9.2026 Сабота   19° / 27° 08:12   20:52

13.9.2026 Недела   15° / 25° 08:13   20:50