„Како веќе е август?“ „Каде ми помина цела година?“ „До вчера беше јануари, а еве веќе наближува септември.“ Ова се реченици што веројатно сме ги кажале барем еднаш. Но, зошто како што старееме имаме чувство дека времето сè побрзо ни „бега“?

Времето, секако, не се движи побрзо. Она што се менува е начинот на кој нашиот мозок го доживува и го памети времето. Едно од главните објаснувања е дека со возраста животот станува порутински. Работата, патувањето до работа, обврските, купувањето, домашните задачи и секојдневните навики се повторуваат. Кога деновите се слични еден на друг, мозокот има помалку нови детали што треба да ги запамети, па кога ќе погледнеме наназад, периодот ни изгледа пократок.

Замислете го првото патување на некое место. Сè е ново улиците, луѓето, мирисите, храната, звуците. Во текот на неколку дена создавате огромен број нови спомени и подоцна имате чувство дека сте биле таму многу подолго. За разлика од тоа, една обична недела исполнета со исти обврски може да исчезне во сеќавањето како еден единствен момент. Новите и необични искуства привлекуваат повеќе внимание и оставаат подетални спомени, поради што периодот подоцна може да ни изгледа „подолг“.

Постои и уште едно интересно објаснување: една година претставува многу поголем дел од животот кога сме деца отколку кога сме возрасни. За петгодишно дете, една година е 20% од целиот живот. За 50-годишен човек, истата година е само 2%. Ова е еден од начините на кои истото времетраење субјективно може да изгледа различно во различни периоди од животот.

Но, не значи дека времето секогаш мора да ни „бега“. Истражувањата за перцепцијата на времето покажуваат дека новитетот, вниманието и интересните искуства можат да влијаат врз тоа како го доживуваме времето. Ново хоби, патување, учење нешто непознато, запознавање нови луѓе или едноставно промена на секојдневната рутина создаваат повеќе различни спомени, наместо деновите да се спојуваат во една голема рутина.

Затоа, можеби проблемот не е во тоа што времето поминува побрзо, туку во тоа што понекогаш премногу од деновите ни личат еден на друг. Календарот продолжува да оди со исто темпо, но нашиот ум не ги памети сите денови подеднакво.

А можеби токму затоа најдобриот начин да имаме чувство дека годината траела подолго не е да се обидуваме да го „запреме“ времето, туку да направиме повеќе моменти што вреди да ги запомниме.

Тагови: навики патување работен час стареење

Од Свети Николе до пазарите во регионот и Европа – ЛИОН повеќе од 25 години создава кондиторски производи препознатливи по квалитетот и вкусот.

Основана во 1998 година, компанијата денес е дел од прехранбената индустрија и континуирано инвестира во развој, иновации и своите вработени. Со тим од околу 200 професионалци, ЛИОН гради работна средина во која се ценат тимската работа, одговорноста, иницијативноста и професионалниот развој.

Во моментов ЛИОН ДОО Свети Николе има отворени позиции:

Референт за продажба
Референт за набавка
Специјалист за електро-машинско оддржување (Мајстор)

За кандидатите ЛИОН нуди конкурентни услови, можности за професионален развој и средина во која трудот и способностите се препознаваат.

Доколку барате нов професионален предизвик и сакате да станете дел од тимот на ЛИОН, погледнете ги деталите за позициите и аплицирајте преку KARIERA.mk.

Тагови: ЛИОН ДОО Свети Николе

Критиката на работното место не е секогаш лесна за прифаќање. Дури и кога е добронамерна, може да предизвика разочарување, несигурност или чувство дека вашиот труд не е доволно ценет. Но, конструктивниот фидбек може да биде една од најкорисните алатки за професионален развој. Наместо критиката веднаш да ја сфатите лично, обидете се да ја искористите како можност да научите нешто ново.

1. Не реагирајте импулсивно

Кога ќе слушнете нешто со кое не се согласувате, природно е веднаш да сакате да се оправдате. Наместо тоа, земете момент и внимателно слушајте. Не мора веднаш да одговорите. Понекогаш кратката пауза ќе ви помогне да реагирате професионално и смирено.

2. Побарајте конкретни примери

Ако менаџерот ви каже дека треба да ја подобрите комуникацијата, прашајте што точно подразбира тоа. На пример: „Можете ли да ми дадете конкретен пример за ситуација во која можев подобро да комуницирам?“

Конкретниот пример ќе ви помогне полесно да разберете што треба да промените.

3. Одделете ја критиката од личната вредност

Критика на одредена задача или однесување не значи дека сте лош вработен. Секој професионалец има области во кои може да се подобри. Фокусирајте се на тоа што можете да направите подобро, наместо на тоа дали критиката ве дефинира како личност.

4. Не се плашете да поставувате прашања

Ако не сте сигурни што се очекува од вас, прашајте. Наместо само да прифатите критика, обидете се да добиете јасна насока за следниот чекор. Прашања како „Што би сакале да направам поинаку следниот пат?“ можат да го претворат непријатниот разговор во корисен план за подобрување.

5. Претворете го фидбекот во конкретна акција

Критиката има најголема вредност кога ќе следи промена.Ако сте добиле забелешка дека не ги почитувате роковите, на пример, размислете како подобро да ги организирате задачите. Ако станува збор за комуникација, работете на начинот на кој ги презентирате информациите.

Важно е менаџерот да види дека сте го слушнале фидбекот и дека преземате чекори.

6. Не ја сфаќајте секоја критика како напад

Добриот менаџер треба да даде фидбек со цел вработениот да се подобри, а не да биде понижен. Ако критиката е конструктивна и конкретна, обидете се да ја прифатите во таа насока.

Сепак, навредување, омаловажување, закани или постојано понижување не се конструктивен фидбек. Во такви ситуации проблемот не е само во начинот на кој ја примате критиката, туку и во начинот на кој таа е дадена.

7. Побарајте повторен фидбек

По одреден период, прашајте го менаџерот дали забележува подобрување. На овој начин покажувате иницијатива и интерес за сопствениот развој. Исто така, ќе добиете јасна слика дали промените што ги правите даваат резултат.

Критиката не мора да биде нешто од кое треба да се плашите. Правилно дадениот фидбек може да ви покаже што треба да подобрите, да ви помогне да развиете нови вештини и да ве направи подобар професионалец.

Следниот пат кога менаџерот ќе ви даде критика, наместо да се прашате „Зошто ме критикува?“, обидете се да прашате: „Што можам да научам од ова и како можам следниот пат да бидам подобар?“

Прочитајте и за: 5 знаци дека сте подготвени за лидерска позиција

Тагови: менаџирање на луѓе совети за работа

Министерството за внатрешни работи завчера спроведе засилена сообраќајна контрола на територијата на целата држава, насочена кон прекршоците што ги прават пешаците. Во периодот од 09:00 до 15:00 часот, санкционирани биле 166 пешаци, од кои 137 поради небезбедно преминување на улица надвор од обележан пешачки премин.

Покрај прекршоците на пешаците, за време на акцијата биле евидентирани и 167 други видови сообраќајни прекршоци. Од МВР посочуваат дека ваквите контроли имаат за цел да ја зголемат безбедноста во сообраќајот и да потсетат дека непочитувањето на правилата носи санкции.

Надлежните најавуваат дека сообраќајните контроли ќе продолжат и во наредните денови, со апел до граѓаните доследно да ги почитуваат прописите. Пешаците се повикуваат коловозот да го минуваат исклучиво на обележани пешачки премини, бидејќи само со заедничка одговорност може да се придонесе за побезбедни сообраќајници.

Тагови: казни Министерство за внатрешни работи (МВР) пешаци