Агенцијата за храна и ветеринарство (АХВ) во координација со општините го најави почетокот на процесот за изградба на први уредени гробишта за миленици во Македонија – практика што веќе одамна функционира во Белград, Загреб, Љубљана и низ голем дел од Европа. Според АХВ, идејата е во „зародиш“, а локалните самоуправи треба да обезбедат соодветни локации, инфраструктура и опрема, како и модел на управување – самостојно по општина или преку заеднички регионални капацитети.
Недостигот на законски уредено решение со години ги принудува сопствениците на миленици сами да бараат начини да се збогуваат со своите животни, често со ризик од казни и потенцијална опасност по здравјето и животната средина. Многумина, како младата скопјанка која по 12 години заеднички живот го закопала своето куче кај селската викендица за да има место за сеќавање, велат дека „немаат срце“ телото да го фрлат во контејнер или покрај река. Од ЈП „Лајка“ ја поздравуваат иницијативата, потенцирајќи дека гробиштата за миленици се и хумано и практично решение, кое конечно би им овозможило на граѓаните достоинствен и законски уреден начин за погребување.
Во моментов, бездомните животни по закон завршуваат во т.н. јами-гробници при депониите, а „Лајка“ починатите кучиња ги одложува на Дрисла поради отсуство на друга алтернатива. Отворени остануваат прашањата за цената на гробните места и услугите за одржување, за што од АХВ упатуваат дека одговорот е во надлежност на општините, откако ќе го дефинираат моделот и инфраструктурата. Додека Загреб веќе се пофали со ултра современ комплекс за погребување миленици, останува да се види дали Македонија конечно ќе ги следи европските трендови во грижата за животните и нивните сопственици.
Тагови: Европа кучиња гробишта за миленици ЈП „Лајка“