Доналд Трамп, претседателот на САД, објави дека наскоро ќе бидат воведени долгонајавувани царини за фармацевтски производи, што предизвика сериозна загриженост во индустријата. Предлогот за царина од дури 200 проценти би можел значително да ги зголеми цените на лековите и да ги загрози маржите на профит на фармацевтските компании.
Во вторник, Трамп рече дека мерките ќе стапат на сила „многу наскоро“, но дека пред тоа би можеле да бидат воведени во преоден период од „околу една година, година и пол“. И покрај најавеното одложување, аналитичарите предупредуваат дека последиците би биле сериозни.
Царина од 200 проценти би ги зголемила трошоците за производство, би ги намалила маржите на профит и би предизвикала нарушувања во синџирот на снабдување, што би довело до недостиг на лекови и повисоки цени за потрошувачите во САД - изјавија аналитичарите во банката Барклис.
UBS, исто така, проценува дека овој потег би имал „значително негативно влијание“ врз профитабилноста, особено за производите произведени надвор од САД. Афсанех Бешлос, основач и директор на инвестициската фирма RockCreek Group, проценила дека царината од 100% веќе би била „катастрофална“ за пациентот, пренесува BLic.
Ова би можело да биде катастрофално за секој човек бидејќи ни се потребни овие лекови, а на компаниите им е потребно долго време да започнат со производство во САД – изјави таа за CNBC.
И царината од 25% значително би ја зголемила цената на лековите
Студијата на здружението на фармацевтската индустрија PhRMA покажува дека царината од 25% на увезените лекови би ги зголемила трошоците за речиси 51 милијарда долари годишно, што би можело да ги зголеми цените на лековите во САД до 12,9% ако трошоците се пренесат на потрошувачите. Здружението ги оцени предлозите на Трамп како „контрапродуктивни“ за здравјето на граѓаните.
Фармацевтските компании инвестираат во САД, но велат дека времето истекува
Фармацевтските производи досега беа во голема мера ослободени од трговските царини поради нивната важност. Но, Трамп постојано ја критикуваше индустријата за она што тој го нарекува неправедни практики на одредување цени и ги повика компаниите да го преместат производството во САД.
Како одговор на тоа, глобалните фармацевтски гиганти како што се „Новартис“, „Санофи“, „Рош“, како и американските компании „Ели Лили“ и „Џонсон и Џонсон“, ветија нови инвестиции во САД.
УБС предупредува дека предложениот преоден период од 12 до 18 месеци не е доволен. „Обично се потребни 4 до 5 години за да се премести комерцијалното производство на нова локација“, велат аналитичарите.
Индустријата сега чека повеќе информации на крајот од месецот, кога треба да биде објавен конечниот извештај од таканаречената истрага по Член 232. Дотогаш, компаниите се принудени да подготвуваат различни сценарија.
Рош изјави дека „внимателно ја следат ситуацијата“ и работат со засегнатите страни за да се залагаат за политики што го подобруваат пристапот на пациентите до терапија и создаваат пофер систем на здравствена заштита. Иако претходно предупредија дека мерките на Трамп би можеле да ги загрозат нивните инвестиции, во среда потврдија дека ќе продолжат да го прошируваат производствениот капацитет во САД.
Баер, исто така, вели дека ги следат „различните најави за царината“ и дека работат на зачувување на синџирите на снабдување и минимизирање на можните последици. „Новартис“ изјави дека продолжува да соработува со американската администрација и партнерите и дека засега нема промени во планираните инвестиции.
„АстраЗенека“ и „Санофи“ не одговорија на прашањето на CNBC, додека „Ново Нордиск“ одби да коментира поради периодот пред објавувањето на резултатите.
Надежи за исклучоци и трговски договори
Индустријата претходно се обидуваше да добие целосно ослободување од царинските мерки, но како што тие надежи бледнеат, вниманието сега се свртува кон потенцијалните трговски договори како можен штит.
Неодамна објавениот трговски договор меѓу САД и Велика Британија, иако оскуден во деталите, предвидува дека двете страни ќе преговараат за „поволен третман за британската фармацевтска индустрија“, во зависност од исходот од истрагата по Член 232.
Фармацевтите во Швајцарија и Европската Унија, исто така, би можеле да бараат слични исклучоци. Сепак, сè додека не се добие поголема јасност, неизвесноста останува - и за компаниите и за потрошувачите.
Колку подолго трае оваа неизвесност, толку поголеми ќе бидат негативните ефекти, изјави за CNBC Берт Колин, главен економист во ING.
Тагови: Доналд Трамп царина лекови