Министерството за градежништво, транспорт и инфраструктура на Србија денес објави дека од 4 јули ќе се применува нова Одлука за висината на посебната такса за користење на јавни патишта, односно патарини.
Во соопштението се наведува дека во согласност со редовните годишни активности, износите во динари на таксите се прилагодени со годишниот индекс на потрошувачки цени и зголемувањето на малопродажните цени, но без да се прецизираат новите износи на патарина.
Патарините во Србија ги собира Јавното претпријатие „Патишта на Србија“, а вкупната должина на автопатите со наплата на патарина е 905,2 километри.
Наплатата на патарина се врши преку автоматски технички систем за наплата кој се состои од 72 наплатни станици.
Основата на патарината е должината на делницата од патот што ја поминало возилото, изразена во километри, а цената на патарината се одредува во однос на три критериуми - цената на патарината по километар, категоријата на возилото и должината на поминатата рута.
Системот за наплата на патарините се применува на следните делници од автопатот: Белград-Шабац-Шид, Белград-Суботица, Белград-Врњачка Бања-Прешево-Димитровград и Белград-Пожега.
Тагови: патарини Србија