Мотивационото писмо е вашата можност да се претставите пред работодавачот надвор од биографијата. Тоа е документ кој не само што ја покажува вашата заинтересираност за позицијата, туку и вашата личност, страст и мотивација. Добро напишано мотивационо писмо може да биде клучниот фактор што ќе ве одвои од другите кандидати.

1. Истражете ја компанијата и позицијата

Пред да започнете со пишување, посветете време на истражување:

• Која е мисијата и визијата на компанијата?
• Каков е описот на позицијата?
• Кои вредности ги нагласуваат?

Овие информации ќе ви помогнат да го прилагодите писмото на конкретниот оглас и да покажете дека навистина сте заинтересирани.

2. Почеток – Привлечете внимание

Започнете со краток вовед каде ќе наведете:

• На која позиција аплицирате
• Од каде дознавте за огласот
• Зошто ве интересира токму таа компанија или улога

Пример: Со голем интерес аплицирам за позицијата "Маркетинг асистент" во вашата компанија, која ја забележав на KARIERA.mk. Веќе подолго време ја следам вашата работа и верувам дека мојот профил одлично се вклопува со вашата динамична и креативна работна средина.

3. Средина – Покажете што ве издвојува

Ова е делот каде треба да се поврзете со барањата од огласот:

• Опишете ги вашите релевантни вештини, искуства и постигнувања
• Не ја повторувајте биографијата – додадете контекст и приказна
• Користете конкретни примери

Пример: Во моето претходно работно искуство како асистент во маркетинг агенција, водев кампањи на социјални мрежи кои резултираа со зголемување на ангажманот за 35%. Исто така, редовно анализирав податоци и предлагав креативни решенија базирани на реални резултати.

4. Завршеток – Повикајте на акција

Завршете со позитивен и самоуверен тон:

• Изразете подготвеност за интервју
• Поблагодарете се за разгледувањето
• Вметнете контакт информација (ако не се бара посебен образец)

Пример: Би бил благодарен за можноста да разговараме подетално за тоа како можам да придонесам за вашиот тим. Ви благодарам што одвоивте време да ја разгледате мојата апликација.

5. Проверка пред испраќање

Не испраќајте го писмото без:

• Проверка на граматика и правопис
• Прилагодување на секое писмо според огласот
• Проверка дали сте го навеле точното име на компанијата и позицијата

Краток шаблон за мотивационо писмо:

Почитувани [Име или Назив на компанијата],

Со ова мотивационо писмо аплицирам за позицијата [назив на позицијата] која ја објавивте на [извор].

[Краток опис на вашата мотивација и заинтересираност]

[Еден или два параграфа со вашите релевантни искуства, вештини и постигнувања]

Би бил благодарен за можноста да ве запознаам со мојот профил во личен разговор. Ви благодарам на вниманието и очекувам позитивен одговор.

Со почит,  
[Вашето име и контакт]

Одењето на работа ви претставува потешкотија, прочитајте и за: 7 сигнали дека вашето работно место е токсично

Тагови: HR мотивациско писмо совети за работа

Компанијата Workday, која обезбедува софтвер за човечки ресурси, се соочува со колективна тужба поради наводна дискриминација во технологијата за регрутирање, што отвора нови прашања за примена на вештачката интелигенција.

Тужбата тврди дека алгоритмите и АИ алатките на Workday систематски ги отфрлаат постарите кандидати. Оваа тужба можеби ќе постави нов преседан за начинот на кој компаниите можат да користат одредени видови на автоматизирани системи за вработување.

Дерек Мобли ја иницираше тужбата против Workday во 2023 година, тврдејќи дека софтверот на технолошката компанија предизвикал да биде отфрлен од повеќе од 100 работни места во текот на седум години. Тој наведува дека основата за отфрлањето се неговата возраст, раса и попречености.

Четири дополнителни тужители, сите над 40 години, исто така се приклучија на тужбата со обвинувања за дискриминација по основ на возраст. Тие тврдат дека аплицирале за стотици работни позиции низ Workday, секојпат одбивани, понекогаш во рок од неколку минути или часови. Компанијата Workday ги негираше обвиненијата, наведувајќи дека веруваат дека случајот е неоснован.

Тагови: вештачка интелигенција Workday

Меѓународна возачка дозвола – Што треба да знаете

Секој возач кој поседува валидна македонска возачка дозвола може, доколку има потреба, да поднесе барање за издавање меѓународна возачка дозвола.
Важно е да се напомене дека оваа дозвола не може да се издаде доколку на возачот му е изречена забрана за управување со моторно возило – додека трае забраната, тој нема право на меѓународна дозвола. Дополнително, меѓународната дозвола издадена во Македонија не важи на територијата на самата држава, туку исклучиво за странство.
Благодарение на билатералните договори, македонските возачи не мора да имаат меѓународна дозвола за да управуваат возило во следниве земји: Албанија, Италија, Шпанија, Србија, Црна Гора, Босна и Херцеговина, Германија и Косово.

Што ви е потребно за аплицирање?

За да добиете меѓународна возачка дозвола, треба да поднесете:

• Важечка македонска возачка дозвола
• Важечка лична карта или пасош
• Две колор фотографии со димензии 3,5 x 4,5 cm (една за образецот, една за самото барање)

Рок на важност

Меѓународната возачка дозвола важи до три години од денот на издавање, или до истекот на вашата национална возачка дозвола – во зависност од тоа кој датум ќе настапи прв.

Тагови: меѓународна возачка дозвола Министерството за внатрешни работи-(МВР)

Не секој проблем на работа значи дека сте во токсична средина. Но кога секој ден ви станува тежок, кога чувствувате анксиозност уште од недела вечер и кога мотивацијата исчезнува – можеби не е само до вас. Токсичните работни места се почести отколку што мислиме, а последиците од нив може да се одразат сериозно врз вашето ментално и физичко здравје.

Еве 7 знаци дека вашата работна средина можеби е токсична:

1. Континуиран стрес и анксиозност

Ако чувствувате постојана напнатост, немир или ви е тешко да се опуштите дури и по работното време – тоа е јасен сигнал дека нешто не е во ред. Токсичната средина ве држи под постојан притисок.

2. Недостаток на почит и комуникација

Кога шефот или колегите ве игнорираат, ве навредуваат, или ве прекинуваат без причина – тоа е знак на непочит. Во здраво работно опкружување, комуникацијата е отворена и базирана на взаемна почит.

3. Манипулација и фаворизирање

Токсичните лидери често користат манипулативни тактики – ве критикуваат во четири очи, а пофалбите ги чуваат за "омилените". Ако чувствувате дека нема фер третман, тоа може да влијае на вашата самодоверба и кариерен развој.

4. Недефинирани улоги и нереални очекувања

Ако постојано добивате задачи кои не се дел од вашата работна улога, со кратки рокови и без поддршка – тоа не е „тимска работа“, туку експлоатација. Јасната улога и границите се основа за здрава работна средина.

5. Отсуство на поддршка и развој

Во токсична околина, нема простор за раст. Не постојат обуки, фидбек или охрабрување. Наместо тоа, има „држи го главата долу и работи“. Добрите работодавци вложуваат во своите луѓе.

6. Токсични колеги и озборување

Ако постојано сте сведок на трачеви, саботажи, пасивна агресија или „играње игри“ меѓу колегите – тоа сериозно го нарушува тимскиот дух. Некогаш не е до работата, туку до луѓето во неа.

7. Физички симптоми

Хроничен замор, главоболки, проблеми со спиење или гастроинтестинални тегоби? Телото ви испраќа сигнали. Стресот од токсично работно место може да остави сериозни последици по вашето здравје.

Што можете да направите?

Ако препознавте некои од овие знаци – не ги игнорирајте. Разговарајте со доверливи колеги, обратете се до HR (ако постои), и размислете дали вреди да останете таму. Вашето здравје, достоинство и кариерен напредок секогаш треба да ви бидат приоритет.

Запомнете: Работа има секогаш – но вие имате само едно здравје.

Надредениот цело време ги проверува твоите работни обврски, прочитајте и за: Микроменаџирање: Тивок убиец на продуктивноста и довербата во тимот

Тагови: HR совети за работа токсично работно место