По регистрирањето на над 600 нови случаи на инфицирани со Ковид-19 во изминативе три дена, Владата синоќа ги прифати мерките што ги претходно ги препопрача Комисијата за заразни болести, кои предвидуваат забрана на гостување на пејачи и ограничување на јачината на музиката и на бројот на гости во угостителските објекти.

– Тоа значи дека повеќе нема да има гостување на пејачи и ди-џеи во угостителските објекти. Потсетуваме повторно дека дискотеките и ноќните клубови немаа, односно во ниту еден момент не добија дозвола за работа. Понатаму се намалува дозволената јачина на звукот на 55 децибели за да се одржи препорачаната дистанца и се намалува бројот на лица коишто седат на една маса од 12 на 4 лица, изјави министерот за здравство Венко Филипче.

Комисијата за заразни болести, вчера и предложи на Владата, со цел намалување на растот на новозаболени од Корона, да донесе одлука за забрана за гостување на пејачи и ди-џеи во сите угостителски објекти, за ограничување на јачината на музиката до 55 децибели и за намалување на бројот на луѓе кои може да седат на една маса во угостителски објект од сега дозволените 12 на четири.

Покрај ова ќе се инсистира на стриктно почитување на точка 3 од Протоколот за отворање и работа на угостителските објекти и од Протоколот за отворање и работа на кафетериите, со која не е дозволено послужување на гости на стоење на шанк и стоечки маси.

Владата го прифати и укажувањето на Комисијата за потребата од строго почитување на забраната за работа на ноќни барови и дискотеки и потребата од преземање на ригорозни мерки од страна на надлежните институции во случај на прекршување на забраната.

Филипче оцени дека ваквите мерки се апсолутно оправдани и дека сега е добар период кога треба да се имплементираат.

Државниот пазарен инспекторат само во саботата, спроведе над 100 контроли низ целата држава и притоа кај 19 субјекти изрече казни за непочитување на здравствените протоколи и други прекршоци. Конкретно, седум субјекти организирале свадби и тоа во Струга (1), Тетово (2) и Скопје (4). Кај осум субјекти е констатирано непочитување на здравствените протоколи, односно во Струмица (2), Скопје (5) и Битола (1).

Поради непостапување според здравствени прописи за време на епидемија, вчера бил приведен и управителот на барот „Мош“. Конкретно, лицето организирало музички настан – концерт каде што помеѓу гостите не се почитувало дозволеното растојание од 1,5 до 2 метри и повеќето лица не носеле заштитни маски на лицето, и не биле исполнети и други одредби од пропишаните здравствени протоколи.

Поради ваквите појави министерот за здравство посочи дека една од можните мерки, понатаму е и ограничување на работа на одредени економски субјекти и на бројот на луѓе во јавниот превоз, како и мерката за носење маски на отворено.

Од друга страна, министерот Филипче вели дека ја следат ситуацијата и понатаму доколку треба има план и за дополнителни рестрикции ако тоа биде потребно, посочувајќи дека зголемениот притисок или мини бран е очекуван и го најавувале, како есенски бран, по завршување на годишните одмори.

Според него, за други рестриктивни мерки би размислувале во подоцнежните есенски месеци, кога се очекува и појава на сезонскиот грип, настинки поради студеното време, како и зголемена загаденост на воздухот.

Владата на вечерашната осмама седница, на предлог на Министерството за финансии го утврди Предлог-законот за изменување и дополнувањe на Законот за враќање на дел од данокот на додадена вредност на физичките лица.

Како што се наведува во соопштението од владината седница, со измената и дополнувањето на Законот за враќање на дел од данокот на додадена вредност на физичките лица за време на вонредна состојба се создава можност физичките лица кои се пријавени и се корисници на апликативниот софтвер на Управата за јавни приходи преку која се пријавуваат фискалните сметки, со цел враќање на ДДВ-то за фискалните сметки издадени на 10, 11 и 12 октомври да им се врати целиот износ на данокот на додадена вредност.

– Заради поттикнување на прометот на домашни производи и услуги како заради зголемена дигитализација на нашето општество враќањето на целиот износ на ДДВ-то ќе се однесува за прометот на домашни производи и услуги како и за компјутерска опрема кој не надминува 30 000 денари по лице за сите фискални сметки издадени на 10, 11 и 12 октомври 2020 година, се додава во соопштението на владината прес-служба.

Таканаречениот викенд без ДДВ за првпат ќе се случи следниот викенд, на 10, 11 и 12 октомври. Тоа всушност ќе биде продолжен викенд кој ќе трае три дена, бидејќи ќе има и еден споен неработен ден поради празникот 11 Октомври.

Иако првенствено не беше така презентиран начинот на кој ќе се одвива, сепак, во привилегиите од овој викенд ќе може да уживаат само корисниците на апликацијата „МојДДВ“, кои ќе купат домашни производи и услуги или компјутери и друга ИТ опрема во вредност од најмногу 30.000 денари. Повратот на целиот платен ДДВ ќе го добијат назад во рок од неколку дена на своите сметки.

Што можат да купат, каде и по колку? Граѓаните имаат многу нејаснотии. Од Владата за „Фактор“ велат дека ќе има можност за поставување прашања на посебен мејл.

Генерално за да им биде вратен ДДВ во цел износ ќе мора да купат сè што е македонско – дали храна и каков било производ произведен во Македонија или пак да добијат некаква услуга во домашен дуќан – фризерница на пример. Сепак, ќе им се враќа цел ДДВ и на купен компјутер или лаптоп, на пример, односно сè што е ИТ опрема.

Но, што друго треба да знаат граѓаните и на што ќе треба да внимаваат?

Една од работите што треба да се знае е дека дуќанот од кој што ќе се пазарува, ќе мора да има апарат со фискални сметки, каде што точно е определено што е од македонски производи, а што промет од производи од странство.

Исто така, за да се добие повратот на целиот ДДВ, граѓаните ќе мора фискалната сметка да ја скенираат веднаш, односно само во тие три дена додека важи викендот без ДДВ, а не потоа.

Инаку, како што е познато, за регуларниот поврат на ДДВ, фискалната сметка има рок да се скенира во следните 10 дена откако ќе се пазарува, но за викендот без ДДВ, скенирањето ќе мора да се направи на 10,11 или 12 октомври.

Читање од дланка отсега не им е привилегија само на гатачите, кои ќе ви ја предвидат иднината, бидејќи компанијата Амазон тестира нешто слично за плаќање во продавници.

Неодамна воведениот систем за биометрија на дланка, наречен Amazon One, започна да се тестира во две продавници во Сиетл и наскоро може да се појави во сите продавници, стадиони, концертни сали, згради и можеби за отклучување стан наместо отпечаток од прст, препознавање на лице или скенирање на очите, пишува порталот Bankar.me.

На начин што го користи Амазон, биометријата со препознавање на крвните садови ќе ги претвори вашите дланки во кредитна картичка, лична карта, билет или друг документ за идентификација.

Од Амазон велат дека биометријата на дланката е многу подобра работа во споредба со другите технологии што се користат денес, бидејќи носи предност во однос на приватноста, па повеќе ќе им се допадне на корисниците, затоа што не делува „полициски“ како на пример системот за препознавање лице.