Министерството за финансии ќе го финализира ребалансот за годинава и најверојатно веднаш ќе почне со подготовка на буџетот за следната година. Станува збор за буџет кој треба да ги решава проблемите од економската криза, но и да ги вметне и преку него да се остварат дел од ветувањата кои беа во програмата за работа на новата Влада. Од неа, најавените пензиски реформи најмногу ја разбрануваа јавноста, но според наши информации уште нема конкретни анализи и законско решение за можноста за предвремено пензионирање. Се прават модуси само како да се примени законски задолжителното пензионирање на 64 години за мажи и 62 за жени. 

Од Фондот за Пензиско и инвалидско осигурување за Фактор велат дека нема никаква активност, но не сакаа да коментираат. Директорот Шаип Зендели вели дека нема конечни законски измени и затоа не може да каже било што. Сепак измените секако треба да следуваат по анализа во која ќе е вклучен и Фондот но се тврди дека нема најави. 

Можноста за предвремено пензионирање до максимум пет години пред остварувањето на правото на пензија, ама со намален износ, ја најави Владата во новата програма за работа од 2020 до 2024 година. Во програмата не беа наведени рокови ама се тврдеше дека тоа ќе биде од 2021 година. Сепак дали идниот буџет ќе го издржи овој „товар“ допрва ќе се прават пресметки. 

„Ќе овозможиме флексибилен пензиски систем со воведување можност за предвремено пензионирање до максимум 5 години пред остварувањето на правото на пензија, со пропорционално намален износ на редовната пензија. Зајакнување на улогата на старите лица во локалните заедници и обезбедување услови за вклучување во јавниот живот, стои во програмата. 

Повеќе прочитајте на Фактор.мк

Премиерот Зоран Заев ги повика компаниите кои годинава имаат загуба, но во претходните години акумулирале поголеми добивки, да исплатат регрес за своите работници.

- Работниците се трајното добро и за компаниите и за државата. Апелирам уште еднаш дека законот и самите колективни договори регулираат дека компаниите кога покажуваат загуби, тогаш нивната задолжителност да исплатат К-15 паѓа. Но имаме компании кои до Нова Година ќе покажат загуба, но имаат акумулирана добра добивка од претходната година или знаат дека имаат потенцијал загубата веднаш да биде покриена со успешен резултат во 2021. Заради тоа секогаш препорачувам тие да водат грижа за работниците, кои се најважниот капитал во државата, рече Заев како одговор на новинарско прашање.

Претседателот на Владата додаде дека исплатата на регресот за годишен одмор ќе ја зголеми приватната потрошувачка и истовремено ја раздвижува економијата во земјата.

Групацијата на забавни, рекреативни и едукативни дејности во рамки на Услужната комора при Сојуз на стопански комори на Македонија го поздрави носењето на протоколите за отворање и работа на игротеките кое значи и нивно повторно отпочнување со работа.

Според нив со целосно почитување на протоколите, игротеките се подготвени да овозможат безбеден и сигурен престој на децата.

Протоколите изготвени од Комисијата за заразни болести содржат над триесет мерки и активности со чие почитување и имплементирање во пракса ќе се спречи ширење за заразни заболувања. Вработените во игротеките, родителите и децата ќе ги почитуваат протоколите, просторите и предметите редовно ќе се дезинфицираат и проветруваат.

-Групацијата на игротеки при ССК ги известува родителите и дечињата дека согласно протоколите подготвени од Комисијата за заразни болести при Министерството за здравство, а прифатени од Владата, по седум месечна пауза се овозможува игротеките да ги отворат своите врати за прослава на детските родендени. Конечно родендените ќе може да се слават во безбеден, сигурен и дезинфициран простор. Многу подобро за сите нас е дејноста да продолжи и да се одвива во чиста средина, во контролирани услови со почитување на протоколите и преземање на ригорозни мерките за заштита на личното како и на колективното здравје. Затоа повелете резервирајте термин во вашата омилена игротека, да продолжи детската радост за нивниот најважен ден, вели Трајко Николовски, претседател на Групацијата за забавни, рекреативни и едукативни дејности.

Игротеките и едукативните центри беа затворени со владина уредба пред седум месеци и се меѓу последните дејности за кои се дефинираат правилата за отворање и работа. Во изминатиот период прославите на детски родендени се организираа, во небезбедни неконтролирани услови без работа на игротеките, што со носењето на протоколите се очекува да се надмине.

Жените полесно ја губат работата во кризни времиња бидејќи работат на несигурни и пониско платени работни места. Жените почесто работат на понесигурни работни позиции и имаат договори на определено време, што ги прави поподложни на губењето на работата, особено сега за време на корона кризата.

Според податоците на Агенцијата за вработување до 31.03.2020 имало 52.331 невработени жени, додека пак до 31.08.2020 се 71.574. Односно за период од 31.03.2020 до 31.08.2020 без работа останале 19.243 жени. Што е доста голема бројка за Република Македонија.

Ковид најсилно удри во Штип

Речиси и да нема работници кои нема да ги почувствуваат последиците од пандемијата на коронавирус, но се чини дека барем засега текстилните работнички се изложени на најголем удар, велат во Хелсиншкиот комитет на Македонија. Работниците во земјава во изминатите неколку месеци се соочуваат со губење на работните места, намалување на платите, кршење на работничките права, но во текстилниот сектор има и изразено загрозување на здравјето и безбедноста на вработените поради непочитување на мерките за заштита од коронавирусот.
Во општина Штип според податокот од 31.03.2020 невработени жени имало 1.290, додека пак според последните податоци евидентирани на 31.08.2020 се 1.934. Односно во рок од неколку месеци без работа останале 644 жени.

Голем број текстилни работнички беа превезувани во автобуси на начин на кој беше прекршувана уредбата за организирање на јавниот транспорт, односно не можеа да држат растојание во автобусите, дел од нив немаа заштитни маски, па тука беше речиси сигурно дека ќе почне да се шири вирусот, затоа што оваа уредба не беше почитувана. Понатаму, на самите работни места имавме доста поплаки дека текстилните работнички работат во услови коишто значат непочитување на мерките за заштита од коронавирусот на работни места, во смисла на одржување физичка дистанца на работните места, работа во дезинфицирани услови, како и добивање на заштитна опрема од страна на нивните работодавачи – вели Игор Јадровски од Хелсишински Комитет за Радио слободна Европа.

Најпогодени возрасти

Според податоците на АВРМ, најголем дел од оние кои ја изгубиле работата во земјава поради КОВИД-19 биле со основно или средно образование, а најпогодени сектори биле преработувачката индустрија, трговијата на големо и мало, како и угостителско-туристичкиот сектор. Најголем дел од оние кои изгубиле работа во овој период, односно скоро половина, биле вработени на определено време.

На ниво на држава, жени на возраст од 20 до 24 години до 31.03.2020 имало 4.721 невработени. А, до 31.08.2020 има 7.011. Односно за период од 31.03.2020 до 31.08.2020 има 2.290 невработени на возраст од 20 до 24 години.

Додека пак жени на возраст од 45 до 49 години до 31.03.2020 имало 5.891 невработени. А, до 31.08.2020 има 8.123. Односно за период од 31.03.2020 до 31.08.2020 има 2.232 невработени на возраст од 45 до 49 години.

Жени на возраст од 50 до 54 година до 31.03.2020 година имало 6.423 невработени, додека пак до 31.08.2020 изнесува 8.506. Односно од период 31.03.2020 до 31.08.2020 жени на возраст од 50 до 54 години останале 2.803 жени без работа на ниво на држава.

Стапката на невработеност, за време на кризата ќе ја држиме стабилна, а по нејзиното завршување ќе продолжиме да ја намалуваме за 3% годишно како што тоа го правевме во изминатите 3 години. Конечна цел е – едноцифрена стапка на невработеност до крајот на мандатот на новата влада предовдена од СДСМ, пишува во соопштението на СДСМ објавено пред неколку дена.

А, пак во соопштението на ВМРО-ДПМНЕ од пред неколку дена пишува: Заев не одговори зошто има над 40.000 граѓани невработени.Заев не одговори зошто Македонија има пад на БДП на -12.7%.Заев не одговори зошто над 500.000 граѓани живеат со 50-тина денари дневно и се на раб на егзистенција!

Во Македонија невработеноста расте рапидно и најпогодени се жените, а тоа не може да се сокрие, го потврдуваат и податоците од АВРМ.