Телекомуникациската компанија Vip, која е присутна на македонскиот пазар речиси 12 години e член на А1 Телеком Австрија Групацијата, водечкиот комуникациски провајдер во Централна и Источна Европа. А1 Телеком Австрија Групацијата обезбедува услуги (мобилни и фиксни) за приближно 24 милиони корисници вклучувајќи телефонија, безжичен интернет, мултимедијални услуги, податочни услуги, решенија во облак и ИТ услуги, решенија за наплата и дигитални услуги.

Во 2017 година, А1 Телеком Австрија Групацијата ја објави одлуката постепено да го воведува моќниот А1 бренд за сите свои компании, вклучувајќи го и Vip на македонскиот пазар. Оттука, во текот на оваа година Vipбрендот ќе биде заменет со А1брендот.
Со континуираните инвестиции и иновации уште од самиот влез на македонскиот пазар, Vip значително придонесува во развојот и унапредувањето на телекомуникацискиот пазар во земјата. Овој тренд и натаму ќе продолжи и под брендот А1, со нови вложувања во мобилната и фиксната инфраструктура, технологии и мрежа на нови генерации, притоа поттикнувајќи го развојот на дигитално општество. Во исто време, под новиот А1 бренд, компанијата ќе продолжи да нуди иновативни решенија кои ќе одговараат на сите комуникациски потреби на корисниците , притоа зацврстувајќи ја дигиталната трансформација на македонското општество.
“Пред речиси 12 години, Vip влезе на македонскиот телекомуникациски пазар и предизвика вистински конкурентен натпревар. Благодарение на револуционерните промени кои ги воведуваме уште од првиот ден, Vip силно го раздвижи македонскиот телекомуникациски пазар и успеа да го збогати и издигне целокупното корисничко искуство на едно сосема повисоко ниво. Водејќи се од едноставното мото „Повеќе за вас“, им овозможивме на корисниците да уживаат во неограничена мобилна комуникација при што тие зборуваат повеќе, а плаќаат помалку. Оттогаш па сè до денеска, континуирано воведуваме иновативни производи и услуги, како и изградба на сопствена 3G и 4G мрежа. Во текот на овие години, Vip се трансформираше од само-мобилен оператор, во потполно конвергентна компанија која нуди мобилна и фиксна телефонија, ТВ и ИКТ услуги. Но, ние не застануваме тука. Со прилагодување на дигиталната еволуција која се случува околу нас, еволуираме и ние и стануваме дигитална компанија. Со брендот А1, сакаме да ја зајакнеме нашата позиција како партнер од доверба за нашите корисници, кој ќе им понуди соодветни решенија кои ќе ги збогатат нивните животи и потреби за дигиталната ера. Во соработка со нашите корисници, ќе осмислуваме нови паметни решенија со кои тие ќе можат да уживаат во дигиталното време“, изјави Мислав Галер, извршен директор на Вип.
Воведувањето на А1 брендот на сите пазари каде работи А1 Телеком Австрија Групацијата, не само што ќе ја зајакне позицијата на европскиот пазар, туку ќе им овозможи на сите А1 корисници од сите А1 пазари, доследно и единствено бренд искуство. И покрај најавата за промена на името, сите претходно стекнати права и обврски на корисниците, деловни партнери, клиенти или добавувачи остануваат непроменети и важечки, без потреба за промена на веќе постоечките договори. Корисниците немаат потреба за замена на СИМ картичка, броеви, модеми или било каква опрема, а сите услуги и договорени процеси ќе продолжат да функционираат како и досега.

Откако се случија две убиства во казино во Косово минатата недела, земјата ги забрани сите форми на коцкање за период од десет години, пренесува „Еуроњуз“.

Косовските власти по брза собраниска процедура го усвоиле законот на 28 март, а стапил на сила истиот закон од први април.

Коцкањето во Косово станало голем проблем, истакнува „Еуроњуз“.

Инаку Косово е една од најсиромашните земји во Европа со околу една третина невработени работоспособни лица.

Управата за јавни приходи од први април, па сè до крајот на месецов, ќе ги доставува претпополнетите годишни даночни пријави. Даночните обврзници кои оствариле дополнителни приходи во текот на минатата година ќе имаат рок до крајот на мај да ја потврдат или коригираат пресметката.

Откако ќе добијат електронско известување дека годишната даночна пријава е пополнета од страна на УЈП, корисниците треба да влезат во својот профил што веќе го креирале во електронскиот систем за да ја проверат својата пресметка.

Доколку даночниот обврзник иманекои корекции, постои можност да ги коригира директно на самата претпополнета годишна даночна пријава. Таму постојат полиња каде што ќе ги запипат тие корекции, ќе ја достават до УЈП и потоа нашите служби ќе ја утврдат фактичката состојба и ќе донесат решение за даночниот обврзник. Доколку нема никаков одговор од даночниот обврзник до 31-ви мај, пријавата ќе се смета за потврдена. Значи, сите даночни обврзници ќе мора да ја отворат претпополнетата даночна пријава, да видат дали е сè во ред и да потврдат, објаснува Михајло Михаилов, раководител на контакт центар во Управата за јавни приходи.

Од УЈП не очекуваат проблеми со оглед на тоа што ова е нов начин на пресметка на годишните даночни пријави. Сепак, доколку се случи некој корисник да не добие такво известување до крајот на месецов, треба да пријави во Управата.

Доколку, пак, не ја добијат претпополнетата годишна даночна пријава, ќе се обратат до УЈП, ќе видиме каде настанал проблемот и ќе се отстранат тие грешки, вели Михајло Михаилов, раководител на контакт центар во Управата за јавни приходи.

Во електронскиот систем се регистрирале околу 700.000 граѓани кои лани оствариле дополнителни приходи.

Тагови: УЈП

Само 26 од 100 жители во Македонија се вработени, од кои 18 во приватниот, а 8 во државниот сектор. Тие 18 луѓе треба да заработат за плати, даноци и сите услуги за останатите 82 пензионери, деца, невработени, администрација и оние што се неактивни на пазарот на труд, покажуваат податоците на Светската банка.

Да се подобри ефикасноста на јавните трошења, да се зајакне продуктивноста, која е најниска во регионот, да се бараат различни начини за пристап до пари, да се инвестира во човечкиот капитал, да се подобри ефикасноста на трошењата во здравството, образованието и социјалата, а младите, жените и малцинствата повеќе да се вклучат во пазарот на труд за економскиот раст да биде инклузивен, односно да опфати што е можно повеќе луѓе за да биде одржлив, препорачува Светската банка.

Според нивните проценки, економскиот раст во Македонија годинава ќе биде 2,9 отсто, а догодина треба да биде 3,2 отсто.

Сања Маџаревиќ Шуистер од Светската банка вели дека има потреба за забрзување на растот, но во исто време да се не се зголемува долгот. Таа посочува дека просечниот работник во Македонија губи меѓу 25 и 30 години од продуктивниот работен век во невработеност или неактивност.

„На секои 100 луѓе кои живеат во земјата, само 26 се вработени. Од тие 26, упростено кажано, 8 работат во јавниот сектор и 18 во приватниот сектор. Тоа е екстремно голема зависност. Многу малку луѓе вистински заработуваат за плати и за даноци и се грижат за услугите за неактивните и за останатите невработени и ранливи категории“, вели таа.

На тие 26 луѓе сепак треба да се додадат и самовработените и неплатените домашни работници.

Светската банка очекува економскиот раст годинава да биде 2,9 отсто, а догодина да порасне на 3,2 отсто, а невработеноста годинава да биде 19,4 за догодина да се намали на 18 проценти. Буџетскиот дефицит е намален, но Светската банка очекува јавниот долг да се зголеми до 54,4 проценти од БДП во 2020 година. Платите растат главно под притисок на зголемувањето на минималната плата во трудово интензивните дејности.

Бојан Шимбов од Светска банка вели дека ова сценарио за раст е проследено со ризици, како што се забавениот раст во ЕУ, трговските војни во светот и политичката нестабилност во регионот. Влегувањето на НАТО и отворањето на преговори со ЕУ позитивно би влијаеле на структурните реформи во земјата, но изборните циклуси негативно се одразуваат на економијата, вели тој.

„Во овој период којшто следи треба да се искористи обновената политичка стабилност во земјата за интензивирање на структурните реформи и забрзување на конверзијата кон ЕУ“, вели Шимбов.

Светската банка смета дека се потребни сериозни анализи за тоа дели е можно уште едно покачување на минималната плата, со оглед на тоа што продуктивноста не е зголемена.