Европските социјалисти бараат истрага за доделувањето бугарски државјанства.

Тие денеска побараа Европската комисија да ги разгледа тврдењата за незаконско доделување на бугарски државјанства на странци.

Европските социјалисти велат дека ова прашање е значајно и за ЕУ, затоа што лицата кои добиваат бугарско државјанство се стекнуваат со правото за слободно патување и работа во Унијата.

Сметаат дека овој случај е „поврзан со чесноста и безбедноста“ и дека тврдењата за злоупотреби го поткопуваат кредибилитетот на ЕУ.

Заменик премиер, министер и пратеник во Европскиот парламент се последните имиња кои се појавија во аферата со бугарските пасоши, открива Еуроактив. Станува збор за Красимир Каракачанов, Екатерина Захариева и Андреј Ковачев и тројцата еминентни бугарски политичари. Нивната поврзаност во скандалот, за Еуроактив ја открива Катја Манева, поранешна директор на Советот за државјанство, која била сменета од страна на Захариева под притисок на Каракачанов и Ковачев. Манева до бугарското овинителство кое ја води истрагата, доставила документи и дала исказ според кој партијата ВМРО на Каракачанов финансиски опстојувала единствено од митото добивано за бугарските пасоши. Матева тврди дека таа во 2016-та година стопирала 7.000 сомнителни барања за издавање потврди за потекло, со што го навлекла бесот на заменик премиерот. Каракачанов побарал од Захариева, која во тој период била министерка за правда, да ја отпушти Матева и да го одблокира процесот за издавање пасоши на странци. Захариева од почеток застанала во одбрана на својата подредена, но по состанокот кој го организирал европратеникот Ковачев со бугарски невладини организации од Македонија, попуштила под притисокот.

Каракачанов земал меѓу 550 и 1.500 евра од секој Македонец кој аплицирал за бугарски пасош во оваа шема, а дневно имало меѓу 150 и 200 кандидати.

Захариева и Ковачев изјавија дека се изненадени од обвинувањата. 

Бугарскиот премиер, Бојко Борисов минатата недела им наложи на Министерството за внатрешни работи и на Државната агенција за национална безбедност да извршат проверка на бугарските патни документи издадени на странци во последните пет години.

Обвинителството во земјата минатиот месец започна истрага против службеници во Државната агенција за Бугарите во странство во врска со наводите за корупција и злоупотреби при издавањето на бугарски државјанства на странци.

Во врска со овие сомнежи на 31 октомври беа приведени претседателот на Агенцијата, Петар Харалампиев и 19 нејзини службеници. По првичната истрага, обвиненија беа покренати само против Харалампиев, главниот секретар на Агенцијата, Красимир Томов и против уште две лица.

По ова бугарската Влада најави дека планира да ја затвори Агенцијата, а нејзините надлежности да се поделат на неколку други државни институции.

Претседателот на ИАБ Македонија, Борис Ефтимовски ги повика најголемите огласувачи во Македонија во своите адвертајзинг буџети за наредната година да го зголемат делот предвиден за огласување преку домашните веб портали.

Очекуваме од домашните компании и медиски агенции во своите буџети за наредната 2019 година да издвојат поголем дел за дигиталните издавачи и македонски веб портали, пропорционално на импактот кој тие го имаат во секојневието на македонските граѓани“ – вели Ефтимовски и надополнува: “Просто неверојатно звучи податокот дека третата најголема национална телевизија има поголеми приходи од водечките 30 македонски веб портали заедно. Овој сооднос помеѓу огласувањето на двата водечки канали, телевизијата и интернетот, е неприфатлив и целосно не одговара на улогата која веб порталите ја имаат во општеството во делот на информирање, едукација, забава и во севкупното поминато време на медиско конзумирање.

Според него, огласувачите треба дополнително да го поддржат развојот на квалитетните веб портали во Македонија и процесот на само-регулација, преку поголема застапеност на веб медиумите кои го прифаќаат Етичкиот Кодекс на ИАБ во нивните медиски планови.

ИАБ Македонија е дел од интернационалната мрежа IAB Worldwide со седиште во Њујорк, која преставува најголема глобална мрежа што ги обединува медиумите, маркетинг агенциите и огласувачите со цел развој на онлајн огласувањето.

Новите еколошки автобуси за потребите на јавното сообраќајно претпријатие „Скопје“ ќе се набават со 12 милиони евра од кои 10 милиони евра ќе бидат заем од Европската банка за обнова и развој, а останатите од буџетот на јавното претпријатие.

За средствата во износ од 10.000.000 евра заемопримач ќе биде ЈСП Скопје, а Република Македонија ќе издаде државна гаранција, информираат од Владата по денешната седница на која е усвоен Предлог-Законот за гаранција на Република Македонија на обврските по Договорот за заем за финансирање на набавката на нови автобуси за Град Скопје (ЈСП).

Од Владата соопштуваат дека ќе се набават нископодни автобуси кои работат на компримиран природен гас, со голема економска исплатливост и еколошка предност во учеството на намалувањето на аерозагадувањето.

Оваа одлука, Владата ја донесе тргнувајќи од состојбата со возниот парк на ЈСП Скопје како исклучително скап за одржување и кој е еден од факторите за загадување на животната средина, односно на воздухот во градот, се наведува во соопштението од владината седница. 

Македонија е една од 28 предлог дестинации кои треба да се посетат во 2019 година според светскиот сервис National Geographic.

Опишувајќи ја Македонија во својата интересна објава тие велат: Без разлика дали ќе го стават "Северна" пред името на нивната земја, неодамнешните вести за овој долготраен спор со Грција го подигнаа профилот на малата балканска нација. Опкружена од Грција, Бугарија, Србија, Косово и Албанија, без излез на море, Македонија можеби нема морски брег, но е богата со планини и езера. Големите врвови, длабоките клисури и водопади ги оплеменуваат трите национални паркови на земјата: Галичица, Маврово и Пелистер. Вистинската убавина е кајакарење на во Охридското Езеро - едно од најстарите и најдлабоките езера во Европа и полетувањето над Пелагониската долина од македонскиот параглајдерски центар и највисокиот град Крушево, височина 4.429 стапки.

На листата на дестинации кои покрај Македонија треба да се посетат во 2019 година се наоѓаат и: Мексико, Кина, Сенегал, Франција, Нов Зеланд и Црна Гора од Балканот.