Тестовите, пологинот и градското возење потребни за добивање возачка дозвола од скоро ќе се полагаат во нова фирма која пред неколку денови добила овластување од МВР за оваа дејност. Авто-испитен центар Скопје, сега ќе го работи тоа што беше работа на АМСМ во изминативе десет години, а лиценцата за работа, штотуку отворената фирма ја добила од Министерството за внатрешни работи на 14-ти август, објави телевизија Алфа.

Фирмата „Авто-испитен центар Скопје“ била отворена само седум дена пред МВР да го распишат јавниот конкурс за ангажирање фирма за полагање возачки испити. Според податоците од Централниот регистар, „Авто-испитен центар Скопје“, е друштво формирано на 19-ти јуни  2018 година. МВР, пак, јавниот конкурс за избор на фирма која ќе врши полагање возачки го распишале на 25 јуни, една недела по отворањето на фирмата.

Според одлуката на Министерството, штотуку основаната компанија победила на тендерот, па од игра неофицијално биле исфрлени АМСМ, АСУЦ Боро Петрушевски, ПСС и Ауто Македонија.

„Авто испитен центар Скопје“ доби милионски бизнис бидејќи во наредните пет години тие ќе бидат единствените што ќе спроведуваат теоретски и практични тестирања за возачки испити. Од овој бизнис во град со над 700.000 жители, годишниот обрт достигнува и до милион евра, а познавачите велат дека фирмата стара седум дена до распишување на огласот, годишно може да има заработка и над 300.000 евра.

Владата на вчерашната редовна седница донесе одлука за зголемување на платите на вработените во основно и во средно образование за пет отсто, почнувајќи од исплатата на септемвриската плата годинава.

За покачувањето на платите во основно образование, за четвртиот квартал од 2018-тата година, Министерството за образование и наука ќе издвои 99 милиони денари, додека за покачувањето на платите во средно образование, вкупно 40 милиони денари, соопшти владината прес-служба.

За реализација на предвиденото покачување на платите Министерството за образование и наука, како што велат од Владата, ќе потпише спогодби со Самостојниот синдикат за образование, наука и култура на Република Македонија.

Со Спогодбите се утврдуваат најниската плата за најнискиот степен на сложеност на вработените во основните училишта која ќе изнесува 12.714 денари и најниската плата за најнискиот степен на сложеност на вработените во средните училишта која ќе изнесува 13.117 денари.

Службениците и вработени во администрацијата и другите институции под буџетска капа имаат законско право да замат слободен ден за да ги испратат своите деца-првачиња на првиот училишен час в понеделник на 3 септември.

Од Министерството за труд и социјална политика за deca.mk објаснуваат дека согласно Општиот колективен договор за јавниот сектор, работникот има право на платен одмор од еден ден за првиот училиштен ден на своето дете. Оттаму објаснуваат дека ова отсуство, како и сите други случаи на платен одмор заради лични и семејни околности, се остварува без оглед на барањата на процесот на работата.

Од друга страна, вработените во приватниот сектор можат тоа да го остварат само со претходен договор со сопственикот, односно одговорното лице или управителот во претпријатието во кое работат.

Општиот колективен договор за приватниот сектор од областа на стопанството, објаснуваат од Министерството, не содржи одредби со кои се предвидува слободен ден ниту за прв училиштен ден ниту за прв ден во градинка. 

Во поголемите градови има поголем број на разводи, додека во дел од малите места во земјава воопшто немало разводи. 

Разведените бракови во второто тримесечје од 2018 година, бележат намалување од 19.4% во споредба со истиот период од 2017 година и изнесува 394 разведени бракови.

Од нив 58 разводи се во Скопје, 20 во Битола, 10 во Врапчиште, 23 во Гостивар, 23 во Кочани, по 8 во Крушево и Кавадарци. 

Во Куманово имало 6 разводи, во Липково, Конче, Зрновци, Могила, Росоман и Чучер Сандево по 1. 

Во наведениот период имало 44 разводи во Тетово, 4 во Теарце, 2 во Студеничани, 19 во Струмица и 11 во Струга, 4 во Свети Николе, 7 во Штип, 3 во Ресен, 17 во Радовиш, 36 во Прилеп, 2 во Петровец, 32 во Охрид, 5 во Ново Село, 6 во Неготино, 3 во Јегуновце, 2 во Илинден, 8 Желино, 5 Долнени, 2 Демир Хисар и 4 Дебарца, Гевгелија 5, Виница 2, Велес 7, Василево 2, Брвеница 3, Богданци 1. Има и рурални општини во земјава каде воопшто немало разводи во вториот квартал.