Медицински сестри предвреме биле враќани на работа од годишен одмор, на други пак не им се дозволувало одморот да го користат во јули поради недостиг на ваков кадар во клиниките и болниците низ Македонија.

Повеќе вакви реакции изминатиот период стигнале до Унијата на медицински сестри, техничари и акушерки. Според нив законското право на овој здравствен персонал целосно им било оневозможено. Од друга страна дополнителен проблем е што и оние сестри кои останувале на работа работеле 24 часовни дежурства и во смени со само еден слободен ден, а трудот не им бил соодветно платен, велат од здружението “За нас”.

Вишокот работни часови и работата во дежурства не се дефинирани дали ќе бидат исплатени по основ на дежурства, на ноќна работа или пак преку слободни денови за кои не се знае дали ќе може да ги искористат поради дефицитот. Голем дел од медицинските сестри се повикуваат да ги прекинат и веќе започнатите годишни одмори и да се вратат на работа. Правото на користење годишен одмор согласно сопствените потреби им е целосно оневозможено бидејќи дополнително се условени и во кој период истиот може да го искористат, изјави сестра Горданка Бешлиовска, претседател на ЗМСТА- ЗА НАС и Унијата на ЗМСТАСЛ.

За проблемот со ускратеното законско право за годишен одмор од Унијата го известиле министерот за здравство и очекуваат надлежните да изнајдат соодветни решенија за да го заштитат кадарот кој масовно си оди од државата и работи во странство.

Одливот на работната сила од Македонија може да се спречи со зголемување на платите и бенифициран стаж, сметаат од синдикатот на градежните работници.

Тие бараат работниците од потешките струки како  ракувачите на градежни машини, кранисти и возачи на тешки товарни возила најмалку една година порано да заминуваат во пензија. Бидејќи работат во несоодветни услови од синдикатот сметаат дека со тоа се намалува животниот век на работниците.

Од Министерството за труд и социјала веќе дадоа зелено светло на иницијативата за бенефициран стаж за рударите. Најавија дека наскоро, повластен стаж ќе добијат и други професии.

Расте бруто платата во Македонија од месец во месец. 

Просечната месечна исплатена бруто-плата по вработен во мај 2018 изнесува 35 983 денари.

Oва вчера го објави Државниот завод за статистика. 

Еден месец претходно, бруто-плата по вработен била  35 117 денари.

Според податоците на Државниот завод за статистика, просечната месечна исплатена бруто-плата по вработен во април годинава во однос на април 2017 година е повисока за 5,5 отсто.

Просечната месечна исплатена бруто-плата по вработен во март 2018 година беше 34 764 денари.

Во февруари 2018 година изнесувала 33 994 денари, а тримесечјето (ноември, декември 2017 година и јануари 2018 година) била 34 783 денари.

Стандардно неколку сектори придонесуваат за повисока просечна плата. 

На пазарот веќе нема да се продаваат пакувањата на цигари кои немаат форма на квадар, кои содржат помалку од 20 цигари и кои содржат ознаки, зборови или изрази што упатуваат или сугерираат на тоа дека тој вид на производ е помалку штетен. 

Со новиот Закон за тутун се предвидува единечното пакување на цигари да содржи најмалку 20 цигари за разлика од досега кога поголем дел од цигарите кои се продаваа на пазарот имаа по 19 цигари во кутиите. Освен тутунските производи ќе се регулира прометот и на сродните производи на тутун како што се електронските цигари и несогорливиот тутун за пушење.

Исто така, не смее да се продаваат цигари кои содржат ознаки, зборови или изрази што упатуваат или сугерираат на тоа дека тој вид на производ е помалку штетен. Така на пример на пазарот веќе нема да се продаваат цигари на чии кутии стојат ознаките лајт, ултра, односно малку катран, лесен, благ, ултра лесен и слично.

Од Министерството за земјоделство, шумарство и водостопанство информираат дека освен тутунските производи за прв пат ќе се регулираат и сродните производи на тутун како што се електронските цигари и несогорливиот тутун за пушење кои се појавија на пазарот во ЕУ и кај нас.

Новиот Законот за тутун е во согласност со Директивата 40/2014 и првпат ќе го регулира прометот со електронските цигари и несогорливиот тутун за пушење. Со негова примена се очекува поголема и посуштинска контрола на состојките и адитивите во цигарите, како и да се намали достапноста до цигарите, особено за младата популација. Република Македонија со ова ќе биде првата земја во Југоисточна Европа која ќе ги регулира овие производи, а во склад со најдобрите примери од ЕУ.

Се забранува пуштање во промет на пакувањата на цигари кои немаат форма на квадар, кои содржат помалку од 20 цигари, со исклучок на пакувањата на цигари кои се наменети за извоз, стои во нацрт-законот.

Според одредбите, единечното пакување на цигари се состои од картон или мек материјал и не треба да има отвор кој ќе може повторно да се затвори или повторно да се залепи откако е еднаш отворено, освен капакот со преклоп (флип-топ) и капаците со преклопување.

Остануваат одредбите дека на кутијата јасно треба да е наведено за каков производ станува збор, и колку содржи катран, никотин и јаглероден моноксид. Ако тоа не е наведено производот не смее да биде пуштен во продажба.

Тагови: цигари