Граѓаните ќе имаат продолжен викенд во октомври, бидејќи следниот неработен ден за сите е 11 Октомври – Денот на народното востание. Со оглед дека празникот во 2026 година се паѓа во недела, како неработен ден ќе се одбележи понеделник, 12 Октомври.

По овој празник, следува и 23 Октомври – Денот на македонската револуционерна борба, кој годинава се паѓа во петок, што значи уште една можност за продолжен викенд за сите граѓани.

До крајот на годината остануваат уште неколку неработни денови, меѓу кои и 8 Декември – „Св. Климент Охридски“, кој во 2026 година се одбележува во вторник. Според календарот, до крајот на годината остануваат уште три неработни денови за сите граѓани.

Тагови: неработни денови продолжен викенд

Системот „Безбеден град“ наскоро би можел да добие нова функција со која автоматски ќе се препознаваат мотоциклисти што управуваат мотор без заштитна кацига. Надградбата, која предвидува користење вештачка интелигенција, ја најави министерот за внатрешни работи Панче Тошковски при посетата на фестивалот „Мото Илинден урбан драјв“ во Скопје.

Според најавите, камерите во рамки на системот ќе можат да утврдуваат дали возачот носи соодветна заштитна кацига, а доколку се детектира прекршок, ќе следува постапка за негово утврдување и евентуално санкционирање согласно законските прописи. Сепак, новата функционалност сè уште не е ставена во употреба, а засега нема конкретен датум за почеток на примената, ниту детали за начинот на проверка на снимките пред изрекување казни.

Тошковски нагласи дека мотоциклистите се меѓу најранливите учесници во сообраќајот, поради што носењето заштитна опрема е од особено значење. Освен кацигата, тој потсети и на важноста од почитување на ограничувањата на брзината и сообраќајните правила, додека до воведувањето на новата алатка контролите ќе продолжат преку постојните полициски механизми.

Тагови: мотори Сејф сити - Безбеден град

Скопје доби ново место каде што десертите, доброто кафе и пријатната атмосфера се спојуваат во едно поинакво искуство. На 3 октомври, на Кеј 13-ти Ноември, официјално беше отворен Mamma’s Sugar, кој со своето големо отворање внесе нова енергија на скопската гастрономска сцена.

Отворањето помина во знакот на музика, дружење и одлично расположение, а за атмосферата се погрижија Steffan Sax, Тања Бојковска,  Давид Темелков, Acoustic Division и Deejay Skywalker. Вечерта беше исполнета со гости кои имаа можност први да го запознаат новиот простор и да бидат дел од почетокот на една нова приказна во градот.

Основач на Mamma’s Sugar е Ален Осман, кој стои зад концептот на новото место и идејата за создавање простор во кој слатките задоволства, доброто кафе и пријатната атмосфера се спојуваат во едно.

Mamma’s Sugar е замислено како место во кое слатките задоволства се надополнуваат со убав амбиент и моменти создадени за уживање. Од десерти и креативни слатки комбинации, до кафе и пријатно поминато време со пријателите, новиот локал има амбиција да стане едно од местата што скопјани со задоволство ќе го посетуваат.

По успешното отворање, новото слатко катче веќе ги очекува скопјани кои сакаат да откриваат нови вкусови и да уживаат во пријатен амбиент.

Новиот локал се наоѓа на Кеј 13-ти Ноември бр. 1, ГТЦ Кула, во срцето на Скопје.

Тагови: Ален Осман Бела ноќ гастрономија традиции Mamma’s Sugar Отворање слатки ХОЛДИНГ МАММА’С СУГАР ДООЕЛ Скопје

Стопанската комора денеска ќе презентира предлог за измени во системот на празници и неработни денови во Македонија, оценувајќи дека сегашното решение има негативно влијание врз продуктивноста и економската ефикасност. На прес-конференцијата посветена на темата „Празниците во Македонија и нивното влијание врз економијата“ ќе бидат претставени актуелните законски решенија, но и конкретни насоки за можно менување на Законот за празниците.

Засега не се открива кои празници или правила би биле опфатени со предложените измени, но темата дополнително добива на значење бидејќи годинава три државни празници паѓаат во недела — 24 Мај, 2 Август и 11 Октомври, што значи дека и следниот ден се третира како неработен. Токму ова правило, според очекувањата, би можело да биде меѓу клучните точки на дебатата.

Од Комората и претходно бараа поголема флексибилност во организацијата на работното време, особено по воведувањето на недела како неработен ден. По денешната прес-конференција се очекува да стане појасно дали предлогот ќе значи намалување на бројот на неработни денови, нивна поинаква распределба, измени на правилото за празник во недела или отворање поширока дебата за сегашниот модел на работно време.

Тагови: неработни денови Стопанската комора