Кој е Младен Мицевски? Кажете ни нешто повеќе за себе – каде започна вашиот професионален пат и што ве донесе токму до професијата професор?
Мојот професионален пат би рекол дека е доста интердисциплинарен, од причина што спојувам повеќе работи кои сум ги сакал и работел во текот на мојот живот. Моментално сум докторанд на Катедрата по туризам на Економскиот факултет при Југозападен универзитет „Неофит Рилски“ – Благоевград, Бугарија, додека претходното образование ми е исто така поврзано со туризмот и угостителството на Факултетот за туризам и бизнис логистика во Штип.
Всушност, и оттаму започна сè. Големиот ангажман на факултет и во воннаставни активности придонесе сè повеќе и повеќе да навлезам во сферата на туризмот и угостителството. Имам работно искуство во повеќе европски хотелски капацитети во различни оддели (кујна, послужување, анимации и др.), како и во туристичка агенција.
Сепак, со мојата одлука да се вратам во Кратово, барем на кратко, излезе можноста да работам како наставник по стручни предмети од секторот угостителство и туризам. Тоа беше одлична можност да ги спојам моите професионални знаења и вештини со желбата за работа со млади, како долгогодишен младински активист, а од друга страна да се насочам кон културата и традицијата со која располага Кратово, што беше еден од мотивите за моето образование од областа на туризмот.
Работата со млади луѓе е секогаш инспиративна, ентузијастичка, но и предизвикувачка. Како и да е, сепак станува збор за непроценливи искуства и неисцрпна енергија со која ме исполнуваат учениците.
Што е она што најмногу ве исполнува во работата со младите – моментот кога ќе научат нешто ново, кога ќе се осмелат да пробаат нешто поинаку или кога ќе сфатите дека сте им помогнале да поверуваат во себе?
Најпрвин, вербата во себе и нивниот личен карактерен напредок ми се она што најмногу ме исполнува. Секако, постигнувањата што ги имаат ме мотивираат и мене за понатаму, но доколку пред мене имам среќни млади луѓе, сè друго се постигнува полесно.
Кога креираме нови работи, се трудам да имаат највисок можен степен на слобода во работата, за да излезе на површина она што го чуваат во себе, а што може да биде воодушевувачко. Секако, јас сум покрај нив со практични совети за кои дискутираме.
Всушност, искрените и поддржувачки релации кои ги имаме придонесуваат да се оствари мојата мисија во образованието на младите.
Според вашето искуство, што им недостига на младите за да поверуваат дека и во својот град можат да изградат успешна приказна?
Градењето на успешна приказна не е едноставно. Трендовите и егзистенцијалните потреби влијаат на одлуките каде да се градат животните и професионалните приказни.
Мојот совет е секогаш да соберат доволно искуство во тоа што го прават, за да можат потоа да го пренесат во својата средина доколку го сакаат тоа, за да се развие и локалната заедница.
Сепак, можеби поддршката од повозрасните и креирањето на постабилна и поразнолика средина за младите е една од можностите да се врати довербата на младите во своите градови, особено во помалите.
Во кој момент сфативте дека гастрономијата не е само професија, туку и начин да се зачуваат традицијата, приказните и идентитетот на едно место?
Потекнувам од семејство каде што секогаш се негувала традицијата и локалните, регионалните и националните рецепти. Тоа придонесе да имам основни познавања за нашата гастрономија, но сепак со студиите, а уште повеќе со работата со учениците, сфатив дека ние сме тие што треба да ја негуваме и пренесеме гастрономската култура и да се гордееме со тоа што го поседуваме.
Всушност, со нашите активности ние станавме чувари на гастрономското наследство и со текот на времето станавме препознатливи по локалната гастрономија и нашиот ангажман.
Всушност, тоа беше и причина јас да продолжам и научно да се занимавам со одржливоста на гастрономијата.
Кратово има богата историја, но колку самите жители се свесни за потенцијалот што го има нивниот град? Што мислите дека сè уште не сме успеале доволно да му го покажеме на светот?
За жал, уште сите не сме целосно свесни за неисцрпниот потенцијал што го поседува Кратово. Многу ми е мило што последните децении сè повеќе се зборува за валоризација на историјата преку туризмот и имаме зголемување на посетите, но сепак локалната заедница е еден од клучните фактори.
Имено, можеби потребна е едукација на целата наша заедница за потенцијалот. Затоа и во моите ангажмани со учениците секогаш го работиме потенцијалот на Кратово. Среќен сум што младите генерации ќе имаат поголема свесност за туристичкиот развој, бидејќи тие ќе треба да бидат носители на развојот во иднина.
И дефинитивно, не сме успеале доволно да му го покажеме на светот. Секој еден турист останува воодушевен од Кратово, а сепак неговиот реален капацитет не се користи соодветно.
Кога би требало на турист кој никогаш досега не бил во Кратово да му го претставите градот преку само три нешта, кои би ги избрале и зошто?
Тоа би биле: приказни, културен крстопат и гастрономија.
Кратово е полно со приказни и легенди за секој еден објект кој се наоѓа во него и неговата околина. Од друга страна, тука живееле повеќе народности и заедници во текот на историјата (Пајонци, Римјани, Дубровчани, Османлии, Шлези, Саксонци, Евреи, Македонци, Роми итн.), така што Кратово во себе го чува тој мултикултурализам преку секој направен чекор низ градот.
Гастрономијата е неповторлива. Кратовската пастрмајка, мантиите, арм’кот и многу други се специјалитети кои никого не оставаат рамнодушен.
Колку е тешко денес да се задржи вниманието на младите и да ги мотивирате да се заинтересираат за нешто што бара време, труд и многу практика?
Предизвиците на современото општество се сè поголеми и ние треба да изнаоѓаме решенија, но и да се прилагодуваме до одредени граници.
Јас би кажал дека вниманието сепак зависи од пристапот и комуникацијата која ја водиме. Моето искуство покажа дека со менување на пристапите, со сослушување на младите, со долги, длабоки и отворени дискусии се постигнуваат целите во едукацијата на младите.
Давањето постојана поддршка, посветувањето на заслуженото внимание и менторирањето се едни од пристапите кои кај мене најчесто даваат резултати.
Кога би можеле да вратите еден стар рецепт, обичај или гастрономска приказна од Кратово која полека исчезнува, што би избрале?
Има многу такви рецепти, кои полека се видоизменуваат или пак се заменуваат со посовремени варијанти, пред сè поврзани со некои празнувања, обичаи, ритуали и традиции.
Но, може да го издвојам она нешто што го подготвивме со учениците претходната есен, а е поврзано со гроздоберските традиции во Кратовско.
Кратово, поради вулканската подлога, има одличен тероар за одгледување на винова лоза, така што во минатото секое домаќинство имало лозје. Денес се прават обиди лозарството повторно да заживее.
Имено, во соработка со повеќе локални институции, минатата година за првпат го реализиравме настанот „Кратовски гроздоберски традиции“, на кој беа вклучени и гастрономски традиции, така што подготвивме „гроздоберска манџа“ со јагнешко и погача.
Буквално, за голем број од повозрасните посетители, пробувањето на оваа чорба беше враќање во нивното детство и во вкусовите кои останале длабоко врежани во нивната меморија.
Ако денес пред вас стои млад човек кој се сомнева во себе и мисли дека нема доволно талент за да успее, што би му кажале?
Би му кажал дека талентот е само почеток, а не гаранција за успех. Многу поважни се љубопитноста, упорноста и подготвеноста да учиш.
Не треба да чека да стане доволно добар за да започне треба да започне, да греши, да учи и постепено да стане подобар.
Буквално, за успех јас го употребувам зборот „ролеркостер“. Понекогаш најголемиот талент е едноставно да не се откажеш од себе.
Која е вашата најголема желба за младите во Кратово и за иднината на градот преку гастрономијата и туризмот?
Мојата најголема желба е младите да имаат избор. Ако сакаат да останат да создадеме можности да останат, а ако сакаат да заминат да заминат за да стекнат знаење и искуство, но да имаат причина повторно да се вратат.
Би сакал Кратово да стане место кое ги задржува младите со можности и поддршка на младински иницијативи и младински бизнис идеи.
А одржливиот развој на гастрономијата и туризмот може да биде еден од начините тоа да го постигнеме.
Тагови: традиции храна гастрономија Младен Мицевски Кратово