Францускиот институт во Скопје го објави годишниот отворен конкурс за престижната стипендиска програма „France Excellence“, наменета за македонски студенти кои сакаат да продолжат со мастер студии во Франција во академската 2026/2027 година. Програмата им нуди на младите академски таленти можност да се запишат на реномирани француски универзитети и високообразовни институции, со финансиска поддршка што покрива дел од трошоците за студирање и престој.

Покрај финансиската помош, избраните кандидати ќе добијат и дополнителни бенефиции, меѓу кои поддршка за сместување и здравствено осигурување, со цел полесна адаптација во новата академска и културна средина. Право на аплицирање имаат кандидати со македонско државјанство, кои не се постари од 30 години, а предност ќе имаат оние што планираат да студираат на француски јазик, особено во областа на природните науки. Ќе се разгледуваат и апликации за студиски програми на англиски јазик.

Изборот на добитниците ќе се врши врз основа на академскиот успех, квалитетот на мотивацијата и јасноста на планот за студии и професионален развој во Франција. Крајниот рок за аплицирање е 15 мај 2026 година, а сите информации за условите и потребната документација се достапни на официјалната веб-страница на Францускиот институт во Скопје.

Тагови: стипендија студенти Франција

Програмата е вистинска можност за младите што се на крај или, пак, ги завршиле своите студии и сакаат да работат во меѓународна компанија и да стекнат знаење и искуство преку работа на реални проекти. Станува збор за платена практика во времетраење од 6 (шест) месеци каде што практикантите работат со полно работно време и конкретни работни задачи.

А1 WayUp оваа година им овозможи на 16 студенти да го направат својот прв чекор во професионалната кариера, стекнувајќи искуство во клучни области како автоматизација, анализа на податоци, IT-инфраструктура, сајбер безбедност, бизнис трансформација и човечки ресурси.

Програмата A1 WayUp e одличен почеток за сите оние што сакаат нови искуства и знаења. А1 Македонија секогаш ги отвора вратите за оние што сакаат да го градат својот кариерен пат правилно, чекор по чекор. Верувам дека тоа што младите практиканти ги движи напред е чувството дека придонесуваат за А1 Македонија, дека се дел од големата слика, стратегијата и културата, поттик кон дигиталниот начин на живот и иновативните начини на работа. Ние сме дел од една интернационална компанија, која е предводена од доверба, тимска работа и агилен начин на работа. Никогаш не било полесно да размениш експертски познавања како дел од една голема групација или, пак, да работиш во меѓусекторски тимови и интернационални проекти или, пак, на дланка да ги имаш најсовремените технологии од областа. Тоа се прави на единствен и уникатен А1 начин – истакна Маја Анчевска, Talent Acquisition Expert во А1 Македонија.

Тоа што А1 Македонија со сигурност може да го понуди е работа со искусни експерти, можност за работа на креирања нови решенија, истражување нови работи и нивна реализација. Патот кон успехот е предводен од идеи, резултати и заемна почит, но не и хиерархија. Зборот практикант е нешто што е на напишано на парче хартија, а целосно ќе се уверите во тоа кога ќе влезете на вашиот прв состанок и ќе ги добиете првите работни задачи. Имајте доверба во себе и започнете да го градите својот пат.

Особено сме горди на фактот што набрзо ќе започнеме со подготовки за пречекување на шестата генерација по ред A1 WayUp млади таленти, па оттука сите информации ќе бидат навремено и транспарентно споделени, а во меѓувреме им посакуваме огромен успех на сите оние што испишаа 5-годишна приказна од оваа програма со А1 Македонија.

Тагови: А1 Македонија ДООЕЛ Скопје

По повеќе од 20 години, евробанкнотите ќе добијат целосно нов изглед, а крајот на април е важен рок за меѓународниот конкурс што ја отвора клучната фаза од процесот. Европската централна банка (ЕЦБ) ја почна модернизацијата на дизајнот со цел новата серија подобро да го отслика современиот европски идентитет и заедничките вредности.

Новите банкноти ќе ги задржат шесте апоени од 5 до 200 евра, додека банкнотата од 500 евра дефинитивно нема да се врати во оптек. Дизајнерите ги темелат своите предлози на две главни теми: европска култура и реки и птици, кои треба да станат новите препознатливи мотиви на европската валута.

Откако стручна комисија ќе избере до десет најдобри решенија, во текот на 2026 година ќе следуваат и јавни консултации со граѓаните. Иако производството и пуштањето во оптек ќе траат уште неколку години, целта е новите банкноти да понудат врвна безбедност, модерен дизајн и еколошка одржливост.

Тагови: евро ЕЦБ

ЛОНДОН — Кениецот Сабастијан Саве влезе во историјата како првиот маратонец што официјално ја истрча класичната дистанца под границата од два часа, триумфирајќи на Лондонскиот маратон со време од 1:59:30. Со овој резултат, 30-годишниот атлетичар го собори претходниот светски рекорд за 65 секунди, надминувајќи го достигнувањето на својот сонародник Келвин Киптум поставено во Чикаго во 2023 година.

Времето на Саве е и за 10 секунди побрзо од резултатот што Елиуд Кипчоге го истрча во Виена во 2019 година, но тој настап не беше признаен како официјален светски рекорд бидејќи не се одвиваше во отворена конкуренција и со помош на пејсмејкери. Така, Лондон стана местото каде конечно падна една од најголемите граници во атлетиката.

Историски моменти имаше и во женска конкуренција, каде што Етиопјанката Тигст Асефа ја одбрани титулата со 2:15:41, што е најбрзо време досега во трка само за жени. Во трките во инвалидски колички, Швајцарија оствари двоен успех: Марсел Хуг ја освои шестата титула по ред кај мажите и вкупно осма, додека Кетрин Дебранер ја задржа круната кај жените по тесна победа над Татјана Мекфаден.

Тагови: Лондон маратон атлетика Сабастијан Саве