На 25 и 26 февруари 2026 година, во просториите на Универзитетот на Југоисточна Европа во Тетово, во организација на ABSL, ќе се одржи „Global Digital City 2026“, регионален настан фокусиран на зајакнување на конкурентноста на ICT и BPO секторот преку млади таленти, партнерства и иновации.
Под мотото „Освојте конкурентска предност преку нови таленти и партнерства“, настанот ќе обедини компании од секторот на информатичка и комуникациска технологија, бизнис лидери, стартапи, млади професионалци, креатори на политики и претставници од академската заедница со цел поттикнување економски раст, вработување и долгорочна конкурентност на соодветните сектори во Северна Македонија и регионот.
„Global Digital City“ е конципиран како практична платформа каде дискусиите се насочени кон конкретни резултати. Првиот ден ќе биде посветен на панели и обраќања за иновации преку вештачка интелигенција, дигитални политики, развој на таленти и унапредување на конкурентноста на бизнисите. Во центарот на дебатата ќе биде усогласувањето на образованието со потребите на технолошкиот сектор, како и создавањето услови за развој и задржување на човечкиот капитал.
Вториот ден ќе биде ориентиран кон директна акција. Компаниите ќе ги претстават отворените позиции, ќе остварат средби со кандидати преку структурирани сесии како „speed networking“ и „business matchmaking“ и ќе реализираат интервјуа во посебно организирани простории. Паралелно ќе се одржат обуки и работилници за дигитални вештини и вработливост, а ќе функционира и изложбен простор за потпишување договори за соработка.
Со ваков пристап, „Global Digital City 2026“ има за цел да создаде конкретни врски меѓу бизнисите и младите таленти, генерирајќи реални можности за вработување и одржливи партнерства.
Настанот е поддржан од RECONOMY, регионална програма за инклузивен и зелен економски развој, финансирана од Swedish International Development Cooperation Agency (Sida) и имплементирана од HELVETAS Swiss Intercooperation во партнерство со Help – Hilfe zur Selbsthilfe и други регионални партнери.
Global Digital City 2026 се очекува да привлече учесници од Северна Македонија и регионот, позиционирајќи го Тетово како значајна точка на соработка меѓу бизнисот, образованието и новата генерација професионалци.
Тагови: Тетово