На Меѓународниот аеродром Скопје денеска беше промовиран првиот лет на „Визер“ од Скопје до Прага, со што нискобуџетната авиокомпанија додава уште една европска престолнина на својата мрежа на дестинации од главниот град. Новата линија се очекува да ја олесни туристичката и бизнис-комуникацијата меѓу Северна Македонија и Чешка и да придонесе за зголемување на авиосообраќајот од скопскиот аеродром.
Линијата Прага – Скопје беше најавена уште во јули од вицепремиерот и министер за транспорт Александар Николоски, заедно со уште четири нови рути: Стокхолм – Скопје и Мадрид – Скопје од ноември, како и Бари – Скопје, Келн – Скопје и Прага – Скопје од декември. Со ова проширување, „Визер“ дополнително ја зацврстува својата позиција како еден од клучните превозници на македонскиот пазар.
На денешната промоција присуствуваа генералниот директор на „ТАВ Македонија“ Неџат Курт, чешкиот амбасадор Јарослав Лудва, раководителот за комуникации во „Виз ер“ Андраш Радо и министерката за енергетика, рударство и минерални суровини Сања Божиновска. Од аеродромските власти и од авиокомпанијата беше истакнато дека новата линија е чекор кон поголема поврзаност на регионот и дополнителен поттик за економска и туристичка соработка меѓу двете земји.
Тагови: Wizz Air дестинација Прага