Во август 2025 година, просечната месечна исплатена нето-плата изнесуваше 45.310 денари, според податоците од Државниот завод за статистика. Дополнително, просечната месечна исплатена бруто-плата по вработен за истиот период изнесуваше 68.180 денари.

Во однос на август 2024 година, просечната месечна исплатена нето-плата по вработен се зголеми за 10,3 %. Главен придонес кон ова зголемување имаше растот на платите во секторите на здравствена и социјална заштита за 14,6 %, образование за 14,5 %, и административни и помошни услужни дејности за 14,1 %.

Исто така, во споредба со претходниот месец, забележано е значајно зголемување на платите во секторите на уметност, забава и рекреација за 5,2 %, објекти за сместување и сервисни дејности со храна за 4,7 %, и рударство и вадење камен за 4,5 %.

Тагови: Државен завод за статистика нето плата

Највисоките просечни цени на станови во третиот квартал од 2025 година се забележани во општина Центар, каде квадратниот метар достигнува цена од околу 3.100 евра, покажува Извештајот од Регистарот на цени и закупнини на недвижности за периодот јули – септември 2025, изготвен од Агенцијата за катастар на недвижности.

Според податоците, Карпош ја следи со просечна цена од 2.780 евра за м², а потоа Аеродром со 2.400 евра за м². Најниски цени се забележани во Демир Хисар, Кратово, Македонски Брод и Пехчево, каде просечниот квадрат се движи меѓу 400 и 500 евра.

Пазарот на недвижности во третиот квартал од 2025 година регистрира 12.214 продажби, од кои 59% се однесуваат на станови. Зголемен интерес за новоизградени станови се забележува и преку 937 продажби од инвеститори, потврдувајќи го трендот на зголемена активност особено во градовите како Скопје, Тетово, Куманово и Охрид.

Тагови: Општина Центар Скопје цени на станови

Македонија и следната 2026 година нема да се врати на Евровизија, објави Македонската радио телевизија (МРТ). Според записникот од последната седница на Програмскиот совет, директорот Захарија Вулгаракис изјавил дека учеството на натпреварот претставува сериозен финансиски и организациски предизвик за јавниот сервис. Наместо тоа, МРТ ќе се фокусира на изработка на долгорочна стратегија и подготовка за можен настап во 2027 година со „квалитетен производ и јасна концепција“.

Во текот на 2026-та година, јавниот сервис ќе инвестира во развој на домашната музичка сцена — преку фестивали како „Цветници“ и „Скопски фестивал“, поддршка на локални автори и пејачи и создавање стабилна продукциска инфраструктура. Целта е да се зголемат продукциските капацитети и да се создаде континуитет во македонската музичка индустрија, што во иднина ќе овозможи посериозен настап на меѓународната сцена.

Иако Македонија втора година по ред ја пропушта можноста за настап, МРТ не ја исклучува можноста за силно враќање на Евровизија во 2027 година. Вулгаракис потенцира дека целта не е само учество, туку настап кој со достоинство ќе ја претстави Македонија со современ звук и продукција на европско ниво. Последниот настап на земјата беше во 2022 година со Андреа Коевска и песната Circles.

Тагови: Македонија настани Евровизија Македонската радио телевизија (МРТ)

Во секоја компанија постои група на луѓе кои ја движат организацијата напред креативни, мотивирани и посветени. Тие се „талентите“ што секој менаџер сака да ги задржи. Но токму тие најчесто први си заминуваат. Зошто?

1. Не чувствуваат вреднување

Талентираните луѓе сакаат да знаат дека нивната работа има значење. Ако трудот не им се признава, ако идеите се игнорираат или успехот минува незабележано – тие ќе заминат таму каде што нивниот потенцијал ќе биде забележан.

Совет: Редовно давајте искрено признание, благодарност и повратна информација. Малите гестови значат многу.

2. Недостиг на можност за развој

Еден од најчестите причини за заминување е стагнацијата. Кога талентот ќе почувствува дека нема каде да расте – ќе бара нови предизвици.

Совет: Инвестирајте во обуки, менторства и јасни кариерни патеки. Луѓето што растат – остануваат.

3. Лоша работна култура

Токсичната средина, слабата комуникација и несоодветното лидерство се тивок „убиец“ на мотивацијата. Дури и најдобрите вработени нема да издржат во култура каде што нема доверба и почит.

Совет: Градете организација во која луѓето се чувствуваат слушнати, вклучени и поддржани.

4. Недостаток на смисла

Сè повеќе професионалци денес не работат само за плата – туку за цел. Ако не ја гледаат поврзаноста меѓу својата работа и пошироката мисија на компанијата, ќе ја побараат на друго место.

Совет: Споделувајте визија. Покажете им зошто нивниот придонес е важен.

5. Неусогласеност со вредностите

Кога личните вредности на вработениот не се совпаѓаат со оние на организацијата, секојдневието станува борба. Талентираните луѓе не сакаат да трошат енергија таму каде што не се пронаоѓаат.

Совет: Вработувајте луѓе не само според вештини, туку и според вредности.

Задржувањето на талентите не е прашање на среќа – туку на свесно лидерство. Создадете култура на почит, раст и смисла, и нема да треба да се прашувате зошто си заминуваат. Ќе гледате како остануваат.

Прочитајте и за: 10 кариерни тајни што не ги учат ниту на факултет

Тагови: HR совети за работа