Од почетокот на наредната година, родителите ќе можат да го добијат изводот на своето новороденче директно во болница, без потреба да чекаат редови пред матичните служби. Процесот на пријавување на новороденчиња ќе биде целосно автоматизиран, со што ќе се избегнат долги постапки и административни грешки при внесување на податоците. За користење на услугата, родителите ќе треба да креираат личен профил на ниско ниво на порталот uslugi.gov.mk.
Министерството за дигитална трансформација, во соработка со Министерството за внатрешни работи, Управата за водење на матичните книги, Министерството за здравство и јавните здравствени установи, формира работна група со цел воведување на проектот „е-бебе“. Овој проект, поддржан и од канцеларијата на УНИЦЕФ, предвидува изводот да биде издаден во рок од 48 часа по раѓањето на бебето, со што се олеснува процедурата за родителите и се модернизира системот.
Во следната фаза, „е-бебе“ ќе овозможи и автоматско поврзување со Фондот за здравствено осигурување и со Министерството за социјална политика, демографија и млади, за полесно добивање здравствено осигурување и финансиска поддршка за новороденчињата. Со овој чекор, државата го прави првиот голем исчекор кон потполна дигитализација на административните услуги за новите родители.
Тагови: Министерството за внатрешни работи-(МВР) Министерството за дигитална трансформација Министерството за здравство е-бебе