Министерот за внатрешни работи Панче Тошковски најави измени во Законот за безбедност на сообраќајот, со кои ќе се воведе забрана за користење мобилни телефони и електронски уреди не само за возачите на моторни возила, туку и за пешаците и велосипедистите.

Со измените се предвидува забрана за употреба на телефони и електронски уреди при управување со велосипед, мопед, мотоцикл, скутер, трактор и други возила, а истовремено и за пешаците при одење, преминување на коловоз или движење по велосипедска патека, изјави Тошковски.

Тој нагласи дека новите мерки се дел од проектот „Безбеден град“, чија цел е зголемување на безбедноста на улиците и намалување на бројот на сообраќајни прекршоци.

Со овие измени обезбедуваме поефикасна контрола на прекршоците – записникот со платен налог ќе биде единствен документ за помали прекршоци, а прекршоците ќе се утврдуваат и документираат преку техничка опрема, додаде министерот.

Проектот „Безбеден град“ е планирано да започне со примена во јануари 2026 година.

Тагови: казни Панче Тошковски Безбеден град

Почетокот на новата учебна година секогаш носи возбудување, но и многу подготовки. За учениците, тоа значи нови предизвици, нови пријателства и нови можности за учење. За родителите, пак, тоа е време кога треба да се обезбедат сите потребни работи за децата да започнат успешно.

Најважно е да се подготват основните училишни материјали – тетратки, моливи, пенкала, ранци и организатори. Дополнително, секако потребни се и практични работи како спортска опрема, кутија за ужина или дигитални алатки кои сè почесто се користат во наставата. Добро е да се направи список однапред за ништо да не се заборави.

Покрај материјалите, важно е и децата да бидат психолошки подготвени за враќање во училишните клупи. Разговорите за тоа што ги очекува, потсетување на убавите моменти и создавање позитивна атмосфера може многу да помогнат. Со добра организација и вистинска поддршка, учебната година може да започне без стрес и со многу ентузијазам.

Тагови: ученици школски прибор училиште

Од Јавното сообраќајно претпријатие информираат дека од денеска, жичницата на Водно е целосно сервисирана и повторно пуштена во редовна употреба.

Почитувани корисници на жичницата Милениумски крст, по изминатиот период во кој се спроведе предвидениот годишен сервис, жичницата од денес е ставена повторно во функција. Ве очекуваме на падините на Водно, соопштија од ЈСП.

Претходно од претпријатието ги демантираа информациите кои излегоа во јавноста и велеа дека е нарушена безбедноста на жичницата и оти таа подолг временски период работи без потребните дозволи, и појаснија дека жичницата е безбедна и е привремено затворена поради редовен годишен сервис.

Безбедноста на жичницата на Водно е по сите пропишани стандарди. Таа има валиден безбедносен сертификат до 25 септември годинава. Во тек е тековен сервис, кој се врши овој месец. Направен вонреден детален технички инспекциски надзор од Министерството за транспорт и врски во кој исто така не беа констатирани технички недостатоци, односно беше констатирано дека жичницата е во исправна и функционална состојба, реагираа тогаш од претпријатието.

Тагови: Жичницата „Милениумски крст“ Скопје Водно

Природниот прираст и во второто тримесечје од 2025 година e негативен и изнесува – 1.135 лица, што значи дека за толку лица е помал бројот на живородените деца од бројот на умрените лица.

Според податоците на Државниот завод за статистика, бројот на живородените деца во вториот квартал е 3.741 и во споредба со истиот период лани е намален за 4.2%.

Бројот на умрените лица, пак, во второто тримесечје од 2025 година бележи зголемување од 1.2% во споредба со истото тримесечје од 2024 година и изнесува 4 876 лица, а од нив 13 се умрени доенчиња.

Во ова тримесечје од годината се склучени 2.792 бракови и нивниот број е зголемен за 8.1% во споредба со истиот период од 2024 година, а регистрирани се 545 разведени бракови, што претставува зголемување од 0.4% во споредба со истиот период од 2024 година.

Тагови: Државен завод за статистика Македонија новороденче