Неколку моменти пред полноќ, во Собранието на Република Северна Македонија, Трајко Славески беше избран за челник на Народната банка на Република Северна Македонија. За Славески гласаа „за“ 68 пратеници, додека 16 беа против.
За време на дебатата, пратениците презентираа различни гледишта. Членовите на парламентот од владејачката партија ја потенцираа неговата експертиза и способност, додека опозицијата ја критикуваше политичката припадност на Славески и неговата визија за автономијата на институцијата.
Пратеникот од ВМРО-ДПМНЕ, Бојан Стојановски, го пофали Славески како „визионерски пионер на мерки кои што давале резултати“.
Треба да бидат земени предвид и неговата економска и неговата општествена активност. Тој е визионерски пионер на мерки кои што давале резултати. Сакаме да разговараме од аспект на неговата стручност, сите други теми се неважни, изјави Стојановски.
Координаторот на пратеничката група на Движење ЗНАМ – За наша Македонија, пратеникот Бобан Карапејовски, рече дека ако Славески е квалификуван стручњак, што е потврдено со неговите професионални компетенции, не треба да биде клучно тоа како приватно се чувствува или дали е член на политичка партија.
Најголемата иронија во сето ова е што за унивезитетски професор по економија и за функција во Народна банка зборуваат еден социолог и еден лингвист. Да им оставиме на стручњаците, а тоа најдобро се гледа од профеисоналната кариера од Славески, рече Карапејовски.
Елми Азири, пратеник од Алијанса за Албанците, изрази сомневање во неговата пригодност за функцијата, велејќи дека „фактот што професор Славески над 25 години има политички функции нѐ става во дилема за зачувување на централната власт“.
Според координаторот на пратеничката група на СДСМ, пратеникот Оливер Спасовски, Славески со искуството што е потребно, како критериум се исполнува, со оглед на возраста и академската кариера и сите функции што ги имал, но не ги исполнува критериумите за висок морален кредибилитет и дигнитет, подготвеност за отчетност и за јавна комуникација со граѓаните и со институциите.
Според него, Славески, како што рече, знае секогаш да стои на страната на крупниот капитал наспроти работниците. Пратеникот Спасовски се изјасни дека ќе гласа против.
Во дискусијата се приклучи и пратеникот Фатмир Битиќи од СДСМ, кој потенцираше дека критериумите не произлегуваат од компетентноста, туку може да се поврзани со одредени политички фактори. Тој укажа дека во контекст на носење одлука за гувернер треба да се разгледаат сите аспекти за да се осигура дека Народната банка ќе продолжи да функционира како независна институција.
Пратеникот од политичката партија Левица, Реџеп Исмаил, во неговото објаснување зошто Славески не е добар предлог-кандидат за гувернер, меѓу другото спомена дека тој бил најголем противник на зголемување на минималната плата, а дополнително, како што рече, ќе придонесе да се развие корупцијата и јазот меѓу богатите и сиромашните.
Пратеникот Халил Снопче од Алијанса за Албанците оцени дека именувањето на лице како Славески кое никогаш не ја крие политичката припадност е закана за автономијата на институцијата“. Пратеничката Сања Лукаревска порача дека СДСМ нема да гласа за гувернер со ваков профил.
Согласно биографијата доставена во предлогот на претседателката Гордана Сиљановска Давкова, проф. д-р Трајко Славески е роден во Охрид во 1960 година. Тој е редовен професор на Економски факултет при универзитетот „Св. Кирил и Методиј” во Скопје. Студирал на истиот универзитет, а бил на постдипломски студии во САД (Калифорниски државен универзитет 1986/87год. и на Универзитетот Харвард 1989/90 год.) Во 1997 година престојувал шест месеци на Државниот универзитет Аризона во Темпи, Аризона, САД, како визитинг професор.
Славески е ко-автор на првата Антиинфлаторна програма, важен документ при монетарното осамостојување на Република Македонија во април 1992 година во борбата со тогаш присутната хиперинфлација и воведувањето на националната валута – денарот.
Во минатото проф. Славески ги извршуваше функциите министер за развој (1999-2000) и министер за финансии (2006-2009) во Македонската влада. За време на извршувањето на функцијата министер за финансии во Влада на Република Македонија ја вршеше функцијата гувернер во Светска Банка и гувернер во Европска банка за обнова и развој. Како член на Влада на Република Македонија има иницирано и водено бројни реформи во економскиот и финансискиот систем на земјата, како, на пример, воведување на рамниот данок (2007 г.), осовременување на системот за вршење на плаќања, интегрирана наплата на придонесите за социјално осигурување (системот бруто плата, 2009 г. ) и др.
На локалните избори одржани во 2021 година беше носител на листа за советници на коалицијата за Обнова на Македонија предводена од ВМРО-ДПМНЕ. На конститутивната седница на Совет на град Скопје, одржана на 17,11. 2021 год, беше избран за претседател на Советот, функција што и денес ја извршува. Проф. Славески е долгогодишен активен учесник во домашните јавни дебати за економски и финансиски прашања. Тој е исто така плоден автор на 8 книги (неколку во ко-авторство) и бројни статин во домашни и странски академски списанија, како електронски медиуми за пошироката јавност. во печатени и електронски медиуми за пошироката јавност.
Тагови: гувернер Народна банка -НБРМ Трајко Славески