Ден кога водите се сметаат за лековити
Именден денес слават: Богдан (со значење „даден од Бога“), Богдана, Божана, Бојан, Бонка, Богомил („мил на Бога“), Јордан, Данчо, Јорданка, Данка, Даница, Дарин, Јован, Јованка, Јонко, Јонка, Јоана и други.
Празникот Водици – Богојавление во народната традиција се смета за еден од најзначајните христијански празници, бидејќи токму на овој ден Исус Христос бил крстен од Свети Јован Крстител во реката Јордан. Со овој настан се нагласува важноста на крштевањето како света тајна, која симболизира духовно обновување и влегување во живот исполнет со вера. Поради тоа, кумот се смета за духовен родител и особено близок член на семејството. Со Водици завршуваат Некрстените денови, како и целиот циклус на зимски празници, меѓу кои се Бадник, Божик, Василица и други народни свечености.
Богојавление е празник кој се поврзува со крштевањето на Христос од страна на Свети Јован, познат и како Претеча, бидејќи со своето учење и проповеди му претходел на Исус. Тој го повикувал народот на покајание и ги подготвувал луѓето за доаѓањето на Спасителот, крштевајќи ги со вода и најавувајќи дека Оној што доаѓа по него ќе крштева со Светиот Дух. Како што стои во Светото писмо: „Јас ве крштевам со вода, но Оној што доаѓа по мене ќе ве крштева со Свети Дух и со оган.“
Со денешниот празник се поврзани бројни обичаи и верувања. Во православните храмови се врши осветување на водата, а верниците традиционално носат дома светена вода, верувајќи во нејзината заштитна и лековита моќ.
Според старите народни верувања, ако на Водици времето е студено, со мраз и снег, годината ќе биде родна и успешна, додека топлото време се сметало за знак на послаба жетва.
Тагови: водици обичаи традиции