Доколку навреме не проверите до кога ви важи пасошот и кои се роковите што ги прифаќаат земјите во кои планирате да патувате, лесно може да се случи да не ви биде дозволено да ја напуштите државата.

Фактот дека пасошот сè уште е важечки не значи автоматски дека ќе можете да отпатувате во странство. Секоја држава има свои правила за тоа колку време пред истек на важност документот мора да важи за да се помине границата. Непочитувањето на овие правила може да резултира со откажано патување, пропаднати авионски или автобуски карти, резервации и платен сместувачки капацитет. Во Министерството за надворешни работи беа проверени условите за патување во државите кои најчесто ги посетуваат македонските граѓани.

Правила за најчести дестинации

За влез во земјите-членки на ЕУ и Шенген-зоната, пасошот мора да важи најмалку три месеци по планираниот датум на напуштање на територијата, со одредени исклучоци предвидени со закон. Македонските граѓани со биометриски пасош можат да престојуваат до 90 дена во период од 180 дена, сметано од датумот на првиот влез.

За патување во Србија и Црна Гора, пасошот треба да биде валиден за времетраењето на престојот, односно може да се користи сè до датумот на истекување. За Албанија, пак, потребно е пасошот да важи најмалку три месеци по планираното напуштање на земјата. При патување во Турција, пасошот не смее да истече најмалку шест месеци по враќањето.

За престој во САД е потребен важечки пасош за целото времетраење на патувањето, како и претходно обезбедена виза. Доколку патувате во Египет, пасошот мора да биде валиден најмалку шест месеци од денот на влез во земјата.

Правила за влез во Македонија

За странски државјани кои влегуваат во Македонија, пасошот мора да важи најмалку три месеци по планираниот датум на заминување од земјата и да биде издаден во последните десет години.

Тагови: документи Пасош странство престој

Европската Унија го помести целосното воведување на системот за влез/излез (EES) од април на септември 2026 година, откако првичната примена покажа дека новите биометриски контроли создаваат сериозен метеж на граничните премини, особено во периодот на интензивен туристички сообраќај, соопшти Европската комисија.

EES постепено се применува од октомври 2025 година, но на аеродромите и пристаништата веќе се регистрирани долги редици, доцнења и пропуштени летови, бидејќи патниците од земјите кои не се членки на ЕУ мора да даваат биометриски податоци. Според податоците на ACI Europe, времето за обработка на патниците на некои аеродроми е зголемено и до 70 проценти, а во екстремни случаи чекaњето достигнува и до три часа, додека аеродромот во Лисабон во декември дури привремено го суспендираше системот поради редици и до седум часа.

Брисел нагласува дека одложувањето ќе им даде на земјите-членки поголема флексибилност за прилагодување на инфраструктурата и процедурите, а до целосната имплементација на EES патниците и понатаму ќе добиваат класични печати во пасошите при влез и излез од ЕУ.

Тагови: EEC граница ЕУ

Еден вработен во холандската филијала на голема американска технолошка компанија стана вирален на социјалните мрежи откако му било приговорено дека не е доволно посветен на работа затоа што редовно си заминувал од работа во 17:00 часот, не одговарал на мејлови за време на викенд и одбил да учествува на Zoom состаноци надвор од работно време. Менаџерот со седиште во Њујорк го критикувал за неговата недостапност надвор од вообичаеното работно време, што ја отсликува „hustle“ културата на некои американски работни места.

Работникот му поставил граници на менаџерот и им објаснил дека во Холандија е нормално да се држи до утврдено работно време и дека завршувањето на обврските до 17:00 не значи непосветеност, туку добра организација. Кога менаџерот заплашил со план за следење на учинокот, вработениот го пријавил случајот кај локалната служба за човечки ресурси.

Холандскиот HR потоа ја отфрлил забелешката на американскиот менаџер и го потсетил на локалните закони за работа, кои јасно ги штитат правата на вработените за фиксно работно време и недостапност надвор од него. По интервенцијата, менаџерот престанал да контактира со вработениот надвор од работното време, а случајот предизвика широка дискусија за разликите помеѓу американскиот и европскиот пристап кон работа и баланс меѓу приватен и професионален живот.

Тагови: закон менаџирање на луѓе работнички права Холандија

Од 1 февруари 2026 година стапија во сила измените на Кривичниот законик со кои се воведува една од најстрогите санкции во сообраќајот: одземање на моторното возило од лица кои управуваат без стекнато право на возачка дозвола. Доколку сторителот со тоа изврши кривично дело против безбедноста на јавниот сообраќај, возилото со кое е сторено делото ќе биде одземено, под услов да е во негова сопственост.

Кога возилото е во сопственост на трето лице, ќе може да биде одземено само доколку се утврди дека сопственикот знаел или бил должен да знае дека лицето што управувало немало право да вози. Новите правила важат за сите видови моторни возила – патнички автомобили, мотоцикли, скутери и други моторизирани превозни средства – и предвидуваат и кривична, а не само прекршочна одговорност за ваквите случаи.

Законот пропишува одземање на возилото и при екстремно пречекорување на брзината: најмалку 70 км/ч над дозволената брзина во населено место или 90 км/ч надвор од населено место. Доколку возачот веќе бил осудуван за вакво кривично дело, одземањето на возилото е задолжително. Надлежните институции истакнуваат дека целта на мерката е драстично намалување на тешките сообраќајни несреќи, зголемување на дисциплината и отстранување на најризичните учесници од патиштата.

Тагови: возачка дозвола полиција