Последниот рок за исплата на Регрес за годишен одмор (К15) за 2020 година заврши со последниот ден од минатата година, а до почетокот на оваа недела до Државниот иснпекторат за труд пристигнале 135 пријави од неисплатени или само делумно исплатени работници. Од таму велат дека ова е почеток и дека очекуваат жалбите да се зголемуваат во текот на овој месец. До сега, за неисплатен К15 од 2019 се изречени 244 казни за работодавачите, додека за 2020 допрва ќе се работи.
- Државниот инспекторат за труд по завршувањето на законскиот рок за исплата, на 04.01.2021 година, започна со спроведување на инспекциски надзори кај работодавачите за кои има пристигнато пријави, како на веб страната на ДИТ, така и во Кол центарот и во архивата на инспекторатот. Во тек е прибирањето на податоците од извршените надзори од секој инспектор за оваа недела, и истите ќе бидат јавно објавени преку Соопштение од Државниот инспекторат за труд, ни одговори Јована Тренчевска, директорката на ДИТ.
Во текот на минатиот месец, односно од 01.12.2020 до 31.12.2020 година до инспекторатот има пристигнато вкупно 135 пријави по основ на неисплатен регрес или исплатен регрес во помал износ од предвидениот.
- Од нив најмногу има во Скопје, 71, потоа следуваат Штип со 12, 8 за Кичево, 6 за Прилеп, по 5 за Охрид, Струга и Тетово, 4 за Кавадарци, по 3 за Битола, Куманово и Ресен, по 2 за Струмица и Гостивар и по 1 за Велес, Кочани, Росоман, Пробиштип, Радовиш и Делчево. Од вкупно 135 пријави дури 97 биле поднесени од анонимен подносител, а само 38 од познат подносител. Пријави преку веб страницата на ДИТ и Кол Центарот, пристигнуваат и во првите денови од 2021 година, дополнува Тренчевска.
Во текот на 2020 се обработувале прекршените прописи за неисплата на регресот за годишен одмор во 2019, а ДИТ изрекол 244 мерки, односно казни за работодавачите.
- Секаде каде ќе се утврдат неправилности, инспекторот кој го врши надзорот согласно законските прописи ќе изрече соодветна мерка. Во 2020 во инспекциските надзори за почитување на правото за исплата на регрес за 2019 година, извршени се 431 надзори за К-15, донесени се 244 решение по чл.35 став 1 алинеја 7 од Општиот Колективен Договор за приватниот сектор од областа на стопанството, вели директорката.
Според планот на инспекторатот, во наредниот период приоритет ќе бидат надзорите по ова право на вработените граѓани.
- Државниот инспекторат за труд во наредниот период ќе постапува по сите добиени преставки за неисплата на регрес за годишен одмор (К15) за 2020 година. Приоритет во јануари 2021 ќе се стави на инспекциските надзори по ова право на работниците и секаде каде ќе се утврдат неправилности ќе бидат изречени соодветни мерки за работодавачите, најавува
Според „Гласен текстилец“, работниците се охрабрија да ги пријавуваат газдите за неисплата или за формална исплата на регресот за годишен одмор. Покрај пријавите на работниците до подрачните одделенија на Државниот трудов инспекторат, поплаки од работници имало и до граѓанското здружение.
Кристина Ампева од Гласен текстилец за штипската телевиија ТВ Стар изјави дека ако бројката на пријави од работниците до 6 јануари достигнал 66 пријави. Од таму сепак бараат да се ангажираат повеќе трудови инспектори, но и бараат законски измени.
Од Сојузот на синдикати на Македонија на последниот ден од минатата година објавија дека се пријавени повеќе од 100 газди кои не исплатиле во целост или исплатиле помалку К-15 на работниците за 2020 година.
Од таму предупредија дека ќе се бара одговорност и од надлежните инспектори и дека ќе ги објавуваат документите со кои располагаат ако, како што велат, не бидат санкционирани сите кои го прекршиле ова работничко право.