Владата го утврди Предлог законот за финансиска поддршка на работодавачите погодени од здравствено економската криза предизвикана од вирусот КОВИД-19, заради исплата на платите за месеците октомври, ноември и декември 2020 година на синоќешната седница.

Со овој закон, се уредуваат условите и постапката за добивање на финансиска поддршка на работодавачите погодени од здравствено-економската криза предизвикана од вирусот КОВИД-19, заради исплата на платите на работниците за месеците октомври, ноември и декември 2020 година, стои во објавата.

За да почне примената измените треба да се усвојат и во Собранието. Министерот Крешник Бектеши рече дека се надева дека пратениците ќе успеат да стасаат и измените да се донесат до ноември. Им порача да не водат дневна политика.

Поддршката за исплата на плати до крајот на годината ќе биде скалеста, од 14.500 до 21.776 денари. Таа ќе се однесува на компании кои се погодени од ковид кризата, односно нивните приходи се намалени за 30 и над 30 проценти. Државата ќе ги субвенционира платите на работниците во овие фирми во месеците октомври, ноември и декември, односно до крајот на годината. Со неа Владата очекува дека ќе се поддржат 250.000 работни места, за кои ќе се издвојат 70 милиони евра.

Храната и пијалоците кои се служат во ресторани и кафулиња ќе се даночат по нова повластена стапка од 10%, наместо од 18% како што беше досега и ова ќе почне да важи од 1 јануари 2021, истото ќе важи и за кетеринг услуги, со исклучок на алкохолни пијалаци.

Воедно Владата одлучи исто така од 1 јануари ќе има и повластена даночна стапка од 5% за определени занаетчиски услуги коишто се вршат од занаетчии коишто се запишани во занаетчиски регистар.

Финансиската поддршка за работодавачите за исплата на плати ќе биде скалеста согласно падот на приходите на компанијата односно од 14.500 до 21.776 денари по работник. Ова е предвидено со новиот Предлог-закон за финансиска поддршка на работодавци погодени од здравствено-економската криза предизвикана од новата болест, за што денеска дебатираше Економско-социјалниот совет на својата трета седница.

Финансиска помош се однесува за исплата на плати за октомври, ноември и декември годинава.

На седницата, која се одржа онлајн, а со која заседаваше претседателката на ЕСС и министерка за труд и социјална политика, Јагода Шахпаска, разгледани се поединечно сите членови од новиот предлог закон за што свое мислење можеле да дадат сите членови на ЕСС.

Во август македонските работници во просек примале нето плата над 27.000 денари. 

Просечната бруто плата изнесува 41.070 денари и има раст од 10 отсто.

Ова го покажуваат статистичките податоци на Државниот завод за статистика. 

Просечната месечна исплатена нето-плата по вработен, во август 2020 година, изнесувала 27.535 денари.

Индексот на просечната месечна исплатена нето-плата по вработен во август 2020 година, во однос на август 2019 година, изнесува 109,6.

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: уметност, забава и рекреација (20,4 %), земјоделство, шумарство и рибарство (16,9 %) и дејности на здравствена и социјална заштита (13,2 %).

Зголемување на просечната месечна исплатена нето-плата по вработен, во однос на претходниот месец, е забележано во секторите: уметност, забава и рекреација (18,4 %), земјоделство, шумарство и рибарство (9,0 %) и објекти за сместување и сервисни дејности со храна (4,7 %).

Северна Македонија и остатокот од Европа, со исклучок на Русија, Белорусија и Исланд, ноќта меѓу сабота (24 октомври и недела 25 октомври) ќе прејдат на зимско сметање на времето. Во три часот по полноќ часовниците се враќаат еден час наназад, односно времето во три ќе се смета како два часот.

Зимското сметање на времето почнува секој последен викенд во октомври и трае до последниот викенд во март следната година, кога повторно настапува летното сметање на времето.

Европскиот парламент на 4 март лани изгласа да биде укинато сезонското поместување на времето од 2021 година. Но, Советот на ЕУ сè уште нема донесено конечна одлука, па не е сосема сигурно дека ова ќе биде последното поместување на часовниците во ЕУ.

Сезонското менување на времето, освен во Европа, се применува и во повеќето земји од Северна и Централна Америка, како и во повеќе други држави во светот.

Времето не се менува во Јапонија, Кина, Јужна Кореја, ниту во земјите од африканскиот континент.