Угостителските објекти ќе работат до 23 часот, државната администрација треба да го организира работењето од дома или во смени, а капацитетот на јавниот превоз ќе се ограничи за 50 отсто. Ова се дел од препораките на Комисијата за заразни болести со цел заштита од Ковид-19, кои Владата вчера ги усвои и истите веднаш стапија на сила.

Сите угостителски објекти ќе работат до 23 часот, освен оние кои вршат испорака, а целата државна и јавна администрација, општините и судовите треба да ја организираат работата во смени, онлајн од дома или пак редуцирано со систем на ротации.

Согласно владината одлука, атлетската трка „23 Октомври“ ќе се одложи, и ќе остане забраната за присуство на публика на спортските натпревари кои ги организира Ракометната федерација и другите спортски федерации. Исто така, вчера беше одобрен и Протоколот за постапување при полагање на стручен испит за наставници и стручни соработници во тек на пандемијата со КОВИД-19.

Овие предлози Владата ги прифати од Комисијата за заразни болести со цел заштита на јавното здравје и намалување на бројот на заболени од Ковид-19.

Инаку, измените и дополнувањата на Законот за заштита на населението од заразни болести, вчера не се најдоа на дневен ред на Собранието, откако опозицијата побара време да ги разгледа. Измените на овој Закон треба да бидат основа за спроведување на нови мерки за заштита од коронавирусот.

Со измените во Законот, задолжително ќе биде носење маска на отворено, ќе се забрани групирање на отворено после 22 часот и се ограничува бројот на гости во домовите на четири лица.

Од ВМРО-ДПМНЕ потврдуваат дека побарале пред да се изјаснат за законот да го разгледаат и да дадат свои предлози. Од опозициската партија велат дека сакаат да дадат свој придонес и поддршка во напорите за справување со Ковид-19.

Законот, би се нашол на дневен ред на следната собраниска седница на 27 октомври, кога се очекува на работа да се вратат и двајцата пратеници позитивни на Ковид – 19 од мнозинството, Лазе Танески и Исмаил Јахоски.

Министерот за здравство Венко Филипче пак, очекува пратениците да покажат одговорност и итно да ги донесат новите мерките за заштита од Ковид-19, бидејќи, нагласува, состојбата е сериозна.

– Пратениците да покажат одговорност и што поскоро едногласно да се изгласа овој пакет мерки за заштита на населението и спречување на понатамошно ширење на вирусот. Барам сите сложно да испратиме порака на единство околу важноста за почитување на мерките. Тие се целосно издржани, базирани на анализите на Институтот за јавно здравје и на меѓународните искуства. Исти или слични мерки во моментов веќе се на сила во сите европски држави, потенцираше вчера министерот Филипче.

Тој им порача на граѓаните дека постоечките мерки и препораки се во интерес на заштита на нивното здравје и мора доследно да се почитуваат.

Состојбата е сериозна, дополни вчера Филипче, кој информираше дека болничките капацитети се исполнуваат, а пациентите се сместуваат и во модуларната болница на Инфективната клиника.
Нема слободни болнички кревети во повеќе инфективни одделенија во државата, во болницата во Куманово, Штип, Струмица. Почна да се полнат и одделенијата во Кавадарци и Гостивар.

– Болничките капацитети забрзано се исполнуваат. Се преполнија некои болници. Почна да се полни одделението во Кавадарци и во Гостивар. Во Прилеп и Битола се менаџира меѓу двата центри. Во Охрид добро се менаџира бројот на хоспитализации и тука има слободни болнички кревети.

Според министерот за здравство, доколку се оцени дека овие капацитетите кои се димензионирани да бидат резерва се исполнуваат, тогаш ќе препорача целосна рестрикција во движењето, односно полициски час.

Тој додаде дека пред нас е најризичниот период од неколку месеци, есенски и зимски месеци во кои може да се комплицира епидемиската ситуација во земјата и со дополнителен број на случаи од други заболувања, сезонски грип и настинки.

– Почитувањето на мерките, носењето на маските и одржувањето на дистанца освен што значи заштита на сопственото, јавното здравје, здравјето на најблиските, значи и почит кон работата на здравствените работници кои деноноќно од почетокот се борат со оваа криза, рече Филипче.

Заменик министерот за зравство, Илир Хасани синоќа појасни дека рестриктивните мерки се единствени мерки со кои може да се спречи ширење на инфекцијата од Ковид-10.

Според Хасани, ние се наоѓаме во разумна долна граница на рестриктивни мерки, но ако бројката на новозаболени се зголемува, постои можност да ги засилиме.

– Ние се наоѓаме во разумна долна граница на рестриктивните мерки, тоа не значи дека треба да се опуштаме туку во доменот на долната граница што е разумна за да во секој момент се има ефект од мерките. но во никој случај не се исклучува дека рестриктиктивните мерки ќе може да ги засилиме врз основа на бројката која што се зголемува последните недели, посочи заменик министерот.

Во текот на вчерашниот ден беа регистрирани нови 408 случаи на Ковид-19. Оздравени се вкупно 281 пациент, а починале четири лица.

Вкупната бројка на ковид дијагностицирани во нашата земја од почетокот на епидемијата изнесува 24196, бројката на оздравени пациенти е 17673, а на починати е 850. Во моментов бројот на активни случаи во земјата изнесува 5673.

5.726 самохрани родители ќе добијат платежни картички преку четвртиот пакет мерки на Владата предводена од СДСМ, грижата за сите продолжува, велат од партијата.

„Владата предводена од СДСМ во текот на пандемијата со коронавирусот континуирано им помага на сите на коишто им е потребна помош, на граѓаните и на компаниите за ублажување, на негативните последици. Со ребалансот на буџетот за 2020 година се обезбедуваат 470 милиони евра за реализација на мерките од четвртиот пакет за помош и поддршка, кој обезбедува значајни средства за поддршка на економијата, за спас на работни места, за зајакнување на приватната потрошувачка“, се наведува во соопштението.

Измените и дополнувањата на буџетот за 2020 година, додаваат од СДСМ, треба да бидат усвоени во Собранието за да можат 283.000 граѓани да добијат домашни платежни картички во вредност од по 6.000 денари.

„Домашни платежни картички ќе добијат 5.726 самохрани родители, како поддршка во справувањето со последиците од економската криза. Тоа ќе значи зајакнување на семејните буџети на над 5.700 семејства и поттикнување на приватната потрошувачка. Платежни картички ќе добијат и пензионерите со пензии пониски од 15.000 денари, пасивните баратели на работа, самостојни уметници, филмски работници, културни работници и естрадни уметници, како и 540 студенти, но и граѓаните кои се над 64 години, а немаат пензија, ниту државна социјална пензија и се со приходи пониски од 15.000 денари, или воопшто немаат приходи. СДСМ како одговорна партија продолжува со креирање и спроведување мерки и политики за помош и поддршка на погодените со пандемијата, продолжува со вистинска грижа за сите“, велат од СДСМ.

11 поплаки од граѓани стигнале до Регулаторната комисија за ладни радијатори. И по почетокот на грејната сезона се уште немаат парно греење. Поплаки од граѓани стигнаа и до редакција на 24.мк.

Велат дека секоја година иста приказна. Почнува грејната сезона, а тие се без греење со денови. Тврдат дека никој не се јавува на дежурните телефони на дистрибутерот и немаат кому да се пожалат. 

Од Регулаторна пак тврдат дека тие интервенираат во истиот ден откако ќе ги добијат жалбите од граѓаните и бараат дистрибутерот БЕГ веднаш да излезе на терен. Во најголем број случаи, вели Марко Бислимоски, проблем со греење има кај постари згради каде има проблем со инсталацијата.  

„Тоа можеби се проблеми во инсталациите во некои од зградите. Почеток е на грејна сезона и се случуваат соодветни подесувања на самиот систем. Така што тие се главните причини. Во суштина целиот систем функционира нормално и на околу 60 илјади потрошувачи да имаме педесетина поплаки сметам дека е мала бројка. Но сите тие што имаат проблеми и што се обраќаат до Регулаторната во текот на истиот ден веднаш реагираме и бараме од БЕГ веднаш да постапи по нашите забелешки.“ - вели Марко Бислимоски, Регулаторна комисија за енергетика, за 24.мк.

Од операторот БЕГ повикуваат на поголема соработка со потрошувачите. Бараат граѓаните да ги отстранат сите дефекти на внатрешната инсталација, но и да проверат дали им се платени сметките за струја на подстаниците, зашто без напојување на електрична енергија парното не работи.

„Со цел испораката на топлинска енергија од системот за централно греење да се одвива непречено, потребно е потрошувачите кој кои има дефекти на внатрешната грејна инсталација, да ги отстранат во најкус можен рок и истото да го пријават во Центарот за грижа за потрошувачи. Исто така, апелираме до сите Управители односно Заедници на сопственици да овозможат непречен пристап на службените лица до топлинската подстаница на објектот и да обезбедат постојано напојување на топлинската станица со електрична енергија (платени сметки за електрична енергија за топлинската станица и функционална електрична инсталација)“. - велиЕмилија Мишева, лице за односи со јавност БЕГ. 

Оваа сезона освен на ладни радијатори, дури 37 скопјани се пожалиле и дека температурата во нивните станови е превисока, меѓу 25 и 27 степени, па барале од регулаторите да интервенираат за поладни радијатори. Од Регулаторната велат дека ваквите поплаки доаѓаат од поновите градби, кои се направени согласно стандардите за енегретска ефикасност.

Тагови: парно греење

За многимина, 2020 беше година исполнета со тешкотии и многу проблеми. Но, безбедносните камери неодамна ни ја покажаа среќата на една жена од САД по нејзиното успешно интервју за работа.

Станува збор за 21-годишната Калаја Џоунс која ја покажува својата среќа (иако несвесна дека безбедносните камери ја снимаат нејзината среќа) по добиената работа во he Spot Sports Bar and Grill ресторанот во Декатур, Џорџија. 

Тагови: интервју за работа