Граѓаните кои скенираат сметки за поврат на дел од платениот данок се разочарани и крајно револтирани од новиот начин на пресметка, посебно од начинот на кој таа почна да се применува, објавува „Вечер Прес“.

На најголемиот дел од нив износот за поврат, што за второто тримесечје, според апликацијата МојДДВ им била пресметана минатата недела, викендов им е намалена за 100, 200, па дури и за 500 денари. Причина за ова е владината уредба со која наместо 15 проценти од вкупниот ДДВ на фискалната сметка, како што се враќаше во изминатава година, сега повратот за домашните производи е 20 проценти, а за странските само 10. Соопштението дека се прават нови пресметки по тој терк и дека конечниот износ за исплата може да претрпи промени, УЈП го пушти во средата, за во текот на викендов граѓаните да останат шокирани од намалениот поврат.

Ова ги зовре социјалните мрежи. Речиси сите коментари за овој потег се негативни. Граѓани се жалат дека за тримесечјето го достигнале максималниот износ од 1.800 денари, па престанале да скенираат. Велат дека да знаеле дека сметката ќе им се намали за 300, 400 или 500 денари, ќе продолжеле со скенирање на фискалните. Некои прашуваат како е можно законите да се применуваат ретроактивно. Има и такви забелешки дека со ова се надоместуваат донациите од кои голем број граѓани се откажаа.

Сметката наеднаш ми се намали за 100 денари. Не знам зошто, ми рекоа дека е зголемен повратот за домашните производи, а намален на странските. Па во продавниците има многу малку домашни производи. Овој месец добив домашна платежна картичка, но бавно ја трошам, зашто има многу малку прехранбени производи, козметика и слично од домашни производители. Мислам дека и понатаму од МојДДВ ќе добивам помалку пари, вели студентка од Скопје.

Инаку, граѓаните за второто тримесечје добија помалку од МојДДВ, иако различен процент на повратот за домашните и странските производи не им се пресметува за сите три месеци, односно за април, мај и за јуни, туку само за јуни и тоа од 12 до крајот на месецот.

Од Управата за јавни приходи велат дека не се работи за кратење на парите, туку за примена на уредбата на Владата која важи од 12 јуни, најдоцна до крајот на годината. Според таа уредба се двојат македонските од другите производи.

Оваа пресметка се врши од денот на влегување во сила на уредбата со законска сила и не подоцна од 31.12.2020 година. Со оваа уредба се поттикува потрошувачката на македонски добра и услуги. УЈП согласно Уредбата ја приспособи апликацијата МојДДВ, соопштија од Управата.

Оттаму додаваат дека со оваа  нова функционалност, МојДДВ освен враќањето назад пари кај граѓаните и борбата против неформалната економија, ќе придонесе и кон ревитализирањето на домашната економија.

ЕВН Македонија со задоволство ја најавува новата програма за стипендии „ЛОСТ“ за која ќе можат да конкурираат студентки и студенти со ниски семејни месечни примања запишани на електро-енергетските насоки на некој од електротехничките факултети во земјава. За поддршка на 10 студентки и студенти, кои потекнуваат од семејства со вкупни месечни примања пониски од две минимални плати, во текот на една учебна година, ЕВН ќе одвојува по 8000 денари месечно и ќе овозможи учење преку работа, менторска поддршка, како и личен и професионален развој.

Можност да добијат стипендија имаат и кандидатки и кандидати кои за прв пат годинава сакаат да се запишат на факултет. Услов за добивање на стипендија ќе биде да бидат примени како студенти на соодветните факултети.

Обврска на стипендистите е редовно да ги полагаат испитите од тековната година.

Сите заинтересирани своите прашања и апликации можат да ги испратат електронски на [email protected] до 30 септември 2020.

При доделувањето на стипендии ќе се овозможат еднакви можности и правичен третман на сите, без оглед на нивниот пол, религија, национална припадност, раса, вид на попреченост или политичка припадност.ЕВН Македонија веќе 10 години доделува стипендии за студентите на енергетските насоки на Електротехничките факултети. Досега се доделени 50-ина стипендии, и дел од стипендистите веќе ја развиваат својата професионална кариера во ЕВН. Со овие активности интересот за насоките кои се поддржани од ЕВН Македонија од година во година е се поголем, а со тоа и бројот на стручни кадри кои се иднината на енергетиката во земјава.

Фатмир Битиќи, претседателот на комисијата за финансии на СДСМ, на денешната прес-конференција, одговарајќи на новинарско прашање, рече дека четвртиот пакет на економски мерки за справување со корона-кризата ќе следува дури во септември.

- Пакетот ќе биде донесен дури откако ќе завршат преговорите на партиите и формирањето на Владата. Очекувам во август да биде формирана Владата, а во септември да биде донесен новиот пакет на економски мерки кој ќе им помогне на граѓаните, како што тоа го направивме со платите од 14.500 и платежните картички, рече Битиќи.

Тој претходно најави дека рокот за издавање на домашните платежни картички е продолжен и во текот на оваа недела, по прифаќањето на дел од приговорите и по проширувањето на други групи на добитници.

Управување на моторно возило под дејство на алкохол е еден од најсериозните прекршоци кој го прават одредени возачи.  Да се управува моторено возило под дејство на алкохол значи да се нема ниту најмала почит кон себе, кон сопствениот живот, кон семејството, кон другите учесници во сообраќајот и кон општеството во целина.  Со жалење може да се констатира дека и покрај сѐ,  одредени поединци  се уште се осудуваат да седнат позади воланот и тогаш  кога се под дејство на алкохол. 

Покрај слабиот карактер и комплетната неодговорност, една од причините за еден возач  да седне  „пијан “ позади воланот е потценувањето на ризикот и опасноста дека може да се случи сообраќајна незгода и убедувањето дека на кратко растојание може да се управува моторно возило и под дејство на алкохол.  Во однос на оваа констатација РСБСП со потсетување дека ниту еден возач кој учествувал во сообраќајна незгода со фатални последици не ни претпоставувал дека тоа може да му се случи токму нему и со потсетување дека  ниту еден возач,  не тргнал  под дејство на алкохол, да управува моторно возило на патување од 1000 км, напротив, најголем број од возачите кои биле под дејство на алкохол и кои учествувале во сообраќајна незгода со тешки и фатални последици, патувале на пократка дестинација а многу често патувале во рамките на населеното место или регионот во кој престојуваат или живеат.

Водејќи се од тоа, РСБСП со потсетување, совети и пораки до возачите:

    •   Возач под дејство на алкохол не смее да започне да управува возило во сообраќај на пат. 

    •  Дозволено количество алкохол во крвта кај возачите изнесува 0,5 г/кг. Кај професионалните возачи и возачите почетници, не е дозволено никакво количество алкохол во крвта (0,09 г/кг). Глобата за непочитување на оваа законска обврска изнесува од 225 до 375 евра во денарска противвредност.

     •  Полицискиот службеник на самото место привремено ќе му ја одземе возачката дозвола и ќе го исклучи од сообраќај возачот за кого ќе утврди дека е под дејство на алкохол.

     •  Управувањето на моторно возило под дејство на алкохол носи закана за одземање на возачката дозвола до 12 месеци.

Истражувањата покажуваат дека алкохолот ја намалува возачката способност, ја намалува концентрацијата и ја намалува функцијата на сетилата за слух и вид. Возачите под дејство на алкохол не се во способност благовремено да ги препознаат ризиците и опасностите во сообраќајот и се склони кон преземање на ризик и ги потценуваат последиците од сообраќајните незгоди.

РСБСП потсетува дека како последица на неодговорното учество во сообраќајот, изминатата година во Република Северна Македонија, 132 лица го загубија животот во сообраќајни незгоди, а 5164 лица беа  повредени.

Согласно тоа,  РСБСП со апел до сите возачи:

„Оваа лето безбедноста нека ви биде на прво место. Никогаш немојте да возите под дејство на алкохол затоа што возењето под дејство на алкохол носи смрт на патиштата!“