До утре треба да се издадат последните платежни картички како дел од третиот сет на економски мерки за надминување на последиците од корона кризата според зададениот рок. Граѓаните ќе можат да ги искористат најдоцна до 15 август. До 8 јули издадени се и предадени над 187 илјади домашни платежни картички од проектот „Купувам домашно“.

На списоците се најдоа над 324 илјади граѓани, во четири категории како добитници на платежната картичка.. Во првата група околу 114.000 илјади граѓани домашна платежна картичка во вредност од 9.000 денари добија лица со низок доход, приматели на социјална помош и активни баратели на работа, кои во минатата година немале поголеми приходи од 180 илјади денари, или годинава од јануари до април не повеќе од 60 илјади денари. Во втората група се околу 117 илјади лица кои добиваат по 3.000 денари за граѓани кои се во работен однос, но чии примања во првите четири месеци не надминуваат 60 илјади денари. 

Во третата група влегуваат младите од 16 до 29 години кои се дел од државното образование и кои добија финансиска поддршка по 3.000 денари, а во четвртата група се здравствените работници со поддршка од 40 отсто од последната нето-плата. 

Нина Ангеловска, министерката за финансии, веќе објави дека се прифатени дури 5.000 приговори за домашната платежна картичка испратени од средношколци и студенти, односно млади лица од 16 до 29 години. Заедно со претходно усвоените приговори, досега вкупно се прифатени 7.000 приговори.

Актуелната власт во предизборната кампања најави четврт сет на економски мерки за справување со последиците од корона-кризата со доделување платежни картички и за пензионерите кои имаат приходи до 15.000 денари, како и стечакните работници. невработените кои не се активни баратели на работа, како и секој самохран родител.

Грција го продолжи до 31 јули 2020 година привременото ограничување на сите авионски, железнички и копнени поврзувања со Македонија, како и забраната за влез на грчка територија на лица од Македонија, јави дописничката на МИА од Атина.

Ограничувањата се „од превентивни причини за заштита на јавното здравје од дополнително ширење на коронавирусот Ковид-19 на грчка територија за временскиот период од 16 јули 2020 година до 31 јули 2020 година”.

Одлуката потпишана од министрите за здравство, за транспорт и инфраструктура и за поморство, а се однесува на Македонија, на Албанија и на Турција, вчера беше објавена во Службен весник на Грција, а денеска стапува во сила.

Забраната не се однесува на: грчки државјани, на лица кои имаат дозвола за престој и лица кои живеат во Грција, како и за транспорт на стоки, за влез на лица за апсолутно неопходни професионални причини, но и за транзит на болнички возила кои од Косово преку Македонија влегуваат во Грција за хоспитализирање на пациенти кои припаѓаат на дипломатскиот, воениот или административниот персонал на земјите членки на ЕУ и EULEX на Косово.

Авиокомпанијата Визер соопшти дека од 31 јули ги суспендира сите летови помеѓу Италија и  Македонија. Ова, според најавата, е како резултат на рестрикциите за патување од страна на италијанските власти наменети за летовите до Македонија.  

-Патниците со резервирани билети погодени од овие суспендирани летови кои ги направиле резервациите директно на wizzair.com или на мобилната апликација на авиокомпанијата, ќе бидат автоматски известени преку електронска порака. 120% од целата сума ќе им бидe автоматски префрлена на Визер сметката на корисникот, и истите ќе можат да ги искористат во текот на наредните 24 месеци за купување на сите производи и услуги на Визер. Патниците исто така можат да одберат опција за враќање на парите – за која треба подолго време да се реализира – и ќе бидат информирани за сите потребни чекори за трансфер на парите преку банка или преку картичка во посебна електронска порака. Во овој случај, патниците ќе можат да изберат 100% поврат на сумата. Патниците кои направиле резервација преку туристички агенции – вклучувајќи ги и онлајн туристичките агенции – треба да ја контактираат компанијата преку која ги купиле своите билети, соопштуваат од Визер.

Бугарија воведе привремена забрана за влез на сите лица од Македонија, без оглед на нивното државјанство, од 16 јули до 31 јули.

Одлуката е донесена поради влошување на епидемиолошката ситуација во земјата и се однесува на сите гранични премини, воздушни, железнички и копнени патишта.

Исклучок од забраната е дозволата за македонските државјани да транзитираат преку Бугарија со цел нивно враќање во државата. Транзитот се дозволува единствено во случаи кога може да се гарантира неодложно напуштање на територијата на Бугарија, се додава во соопштението.

Бугарската агенција „Новините“ јавува дека истите правила како за Македонија важат и за Србија, БиХ, Црна Гора, Македонија, Косово, Албанија и Турција.