Согласно со протоколот за иселување на студенти од објектите на државните студентски домови, кој Владата го усвои на вчерашната 64-та седница, Државниот студентски дом „Скопје"  соопшти дека иселувањето ќе почне во понеделник.

-Процесот ќе започне во понеделник на 15 јуни 2020 и ќе се спроведува во период до 3 јули 2020 година, во работните денови од 8 до 16 часот, објави на Фејсбук Дарио Николовски, директор на Државниот студентски дом „Скопје".

Домашната платежна картичка „Купувам домашно“ ќе ја добијат 324.479 граѓани, 28 милиони евра пари за граѓаните, наменети за купување домашни производи и услуги за рестартирање на македонската економија, напиша премиерот Оливер Спасовски на Фејсбук.

Корисниците, како што наведува, ќе ја добијат платежната картичка едноставно и без постапки за аплицирање. Тие ќе добијат Домашна платежна картичка препознатлива со слоган „Купувам домашно“ која ќе ја издаваат банките, на која ќе се наоѓаат средствата и која ќе можат да ја користат. Листата на граѓани на кои им следи финансиска поддршка e објавена на страната www.kupuvamdomasno.gov.mk. Со внесување на својот ЕМБГ секој граѓанин ќе може да го провери износот кој му следи и да добие информација за банката издавач која ќе му ја издаде картичката. Банките ќе ја доставуваат картичката до адресата на корисникот на финансиска поддршка, или лицето ќе може да ја подигне во банка. Банките оваа информација ќе ја објават на својата веб-страна и ќе исконтактираат во јавност.

-Корисници на Домашната платежна картичка се граѓани со низок доход, односно 115.927 лица – приматели на социјална помош и невработени евидентирани како активни баратели на работа во АВРСМ до 22 мај 2020, кои оствариле нето-доход до 180.000 ден во 2019 и нето-доход до 60.000 денари во период јануари-април 2020 согласно евиденцијата на УЈП. Овие лица еднократно ќе добијат 9.000 денари на платежната картичка.

Корисници се и вработени со низок доход кои се 117.144 лица и тие ќе добијат 3.000 денари еднократно. Ова се лица кои се во работен однос и кои за периодот јануари- април 2020 година оствариле доход само по основ на плата и надоместоци на плата во нето-износ не поголем од 60.000 денари на ниво на полно работно време, според евиденцијата на УЈП. Тие ќе добијат и ваучер за домашен туризам од 6.000 денари преку мерката за јакнење на домашниот туризам на Министерство за економија.

Домашна картичка добиваат млади лица чиј број изнесува 87.014 кои ќе добијат еднократно 3.000 денари. Станува збор за лица со наполнети 16 години и не постари од 29 години заклучно со 22 мај 2020 година, активни учесници во државното формално средно образование и високото додипломско образование.

Домашна картичка ќе добијат и 4394 здравствени работници ангажирани во справување со КОВИД-19, кои ќе добијат 40 отсто од последната основна нето-плата. Станува збор за вработени во ЈЗУ, Клиника за инфективни болести, Институт за јавно здравје, Центри за јавно здравје, Итна помош, инфективните одделенија и вработени во други одделенија ангажирани за тестирање, дијагностицирање и лекување на граѓани заболени од КОВИД-19, стои во објавата на премиерот.

Како што додава домашната платежна картичка е дел од третиот сет економски мерки кои имаат за цел да ја заживеат економијата во фазата на нејзино постепено реотварање и креирање на нова развојна македонска економија.

Приватните универзитети преку Конференцијата на приватни високообразовни установи побара уредбата со законска сила на Владата за издавање домашна платежна картичка, да важи и за нивните студенти. Од таму сметаат дека тоа право им е загарантирано со член 9 од Уставот на РСМ и Законот за високо образование.

Од таму сметаат дека финансиска поддршка за младите лица до 29 години, ги става во нерамноправна положба студентите од приватните универзитети. Мерката засега важи само за редовните студенти на државните универзитети во земјава., а од вчера проверките започнаа на www.kupuvamdomasno.gov.mk.

-Тоа значи дека оваа поддршка не може да ја добијат студентите на приватните високообразовни установи, со што тие се ставаат во нерамноправна положба. Со тоа, се крши уставното право на студентите да ги имаат истите можности за добивање финансиска помош од државниот буџет во услови на вирусна пандемија и загрозена егзистенција на нивните семејства поради економските последици од здравствената криза, едвакво како и студентите од јавните универзитети, се вели во реакцијата на асоцијацијата.

На состанокот на приватните универзитети било заклучено дека Уставот не прави разлика во статусот на студент запишан на државен или на приватен универзитет и дека студентите од приватните универзитети се дискриминирани и им е повредено правото на еднаквост. 

-Оттука, Конференцијата на приватни високообразовни установи, бара во најкус можен рок да се исправи оваа неправда и да им се додели финансиска помош на сите студенти, вклучително и оние од приватните универзитети, бараат од таму.

Здружението на приватни градинки ПОЛЕТ од властите бара со забрзано темпо да се доврши скринингот на вработените во нивната дејност. На тој начин приватните градинки ќе треба само да бидат дезинфицирани од страна на локалната власт или од страна на Центарот за јавно здравје. Потоа Комисијата за заразни болести ќе треба да даде зелено светло за повторно приватните градинки да бидат отворени за најмладите. Градинките се затворени три месеци, Андреј Поповски, претседател на Асоцијацијата на приватни градинки вели дека се подготвени да ги спроведат протоколите и правилата кои се препишани за работење во овие установи.

„Сите мерки кои се пропишани со протоколите ние сме подготвени да ги спроведеме и сме подготвени за згрижување на децата. Според она што стои во протоколите околу 80 отсто од тоа што се бара сега од нас како превентивни мерки, ние тоа и го правевме и пред пандемијата. Да се има 15 деца во една група во одредена квадратура. На 15 деца треба да има една воспитувачка и една негувателка. Во јаслите пак на шест деца треба да има две негувателки.  Она што се разликува сега е тоа што групите не треба во никој случај да се мешаат, односно децата ќе се носат во одредено време да не се прави гужва пред вратата, и да може да се држи растојание помеѓу родителите“, вели за Денар Андреј Поповски.

извор -денар.мк