Сите вработени со плата под 15 илјади денари ќе добијат ваучер од 6000 денари за да одат на одмор, за така да му се помогне на туристичкиот сектор во корона-кризата. Дел од туристичките работници се сомневаат дека дел од граѓаните може да ги продаваат ваучерите во некои хотели за половина цена, а воопшто да не летуваат. Властите уверуваат дека шансите за такво нешто се многу мали.

Туристичките ваучери, кои ги најави владата ќе му помогнат на домашниот туристички сектор колку – толку да го преживее ударот од пандемијата на коронавирусот, велат туристичките работници. Со оглед на тоа што се работи за ваучери од 6000 денари за луѓето со ниски примања, веројатно повеќе ќе се офајдат приватните станоиздавачи, кои се поевтини, отколку хотелите, во кои со тие пари може да се уплатат само неколку ноќевања. Од друга страна, туристичките работници предупредуваат дека се можни итарпејовски злоупотреби.

Мерката предвидува сите вработени граѓани кои имаат приходи пониски од 15 илјади денари месечно, односно да не заработиле повеќе од 60 илјади денари од почетокот на годинава до крајот на април, да добијат ваучер од 6000 денари, кој може да го искористат во сите категоризирани угостителско – туристички објекти во земјава од 15 јули до 15 декември. Во Министерството за економијата велат дека оние кои ќе заминат на одмор и ќе го активираат ваучерот, ќе добијат и џепарлак од 3000 денари, односно платежна картичка со која ќе може да плаќаат во кафеани и кафулиња. Граѓаните не треба да аплицираат за добивање ваучер, туку на сите кои ги исполнуваат условите УЈП ќе им го испрати на е-маил адресата која ја имаат доставено до нив. Во Министерството за економијата очекуваат ваучери да добијат 115 илјади граѓани.

Претседателот на Хотелската асоцијација на Македонија – ХОТАМ, Крсте Блажевски вели дека во секој случај ваучерите ќе му помогнат на туризмот за да ја преживее оваа сезона. Сепак, главна мерка за помош би била намалување на бројот на заболени од коронавирус, зашто во ваква ситуација на луѓето им е страв, вели тој.

„Заработка нема да има, туку работата е кој колку може да издржи да финансира во бизнисот за да нема отпуштања, да може и вработените во тој сектор да преживеат. Не е само за бизнисот да ги отпушти сите вработени, да стави клуч на врата и да отвори кога ќе дојдат подобри времиња. Зборуваме за опстанок“, вели тој.

Со оглед на тоа што 6000 денари се малку за одмор во хотел, Блажевски очекува и цените да паднат зашто сега сите се трудат да заработат некој денар повеќе, а оваа година не може да се надеваат на странски гости.

повеќе на https://www.slobodnaevropa.mk

Тагови: туристи

На работниците заболени од Корона вирус, COVID – 19, работниците кои се во изолација или во самоизолација поради изложеност на коронавирус, да им биде исплатен надомест на плата за боледување, односно надомест за професионално заболување во висина од 100 отсто.

Ова го бара најголемиот синдикат во земјава, Сојузот на синдикатите на Македонија.

„Во изминатиот период, сведоци сме дека голем број на работници не по нивна вина, или се заболени од COVID – 19, или се во изолација или самоизолација поради контакт со друг работник кој бил изложен на заразната болест, дали на работното место или при превоз до и од работното места и од тие причини потребно е Владата, веднаш преку носење на Уредба да го регулира статусот на тие работници и да спречи исплата на плата пониска од 100 отсто како надомест на плата за боледување, односно за време на привремена неспособност за работа“, велат од ССМ.

Со ваквата Уредба, според нив, ќе се спречат сите несовесни работодавачи да ги кршат правата на работниците во тие исклучително сложени и тешки моменти за нив, а со тоа ќе се обезбеди и сигурност на платата и егзистенција на работниците се со цел наминување на таквата состојба.

„Потсетуваме дека обврска на сите нас е да ги зачуваме здрави работниците, бидејќи само здрави работници, можат да ја вратат економијата на здрави нозе“, велат од ССМ. 

Дополнително, укажуваат дека реагирале на појави во одредени компании кога  работодавачите иако добиле субвенции од државата во висина од 14.500 денари по работник за исплата на платата, на работниците им исплаќаат понизок износ на плата од она кое што го добиле како помош, а има и такви компании кои иако земале Државна помош воопшто не исплатиле плати на работниците.

„Управата за јавни приходи потребно е веднаш да информира кои компании, корисници на финансиската помош, исплатиле плата пониска од 14.500 на работниците, поради тоа што на крајот на денот, таа државна помош ќе биде враќана преку даноците кои ги плаќаат токму работниците, а во тој случај за нашите пари бараме транспарентност и отчетност. Владата потребно е да го има ова во предвид при продолжување на финансиската поддршка за исплата на плати“, соопштуваат од синдикатот.

Породилното отсуство ќе биде продолжено до 31 јули, а скринингот на градинките сè уште трае, но ќе заврши за кратко време, најави денеска на прес-конференција министерот за здравство Венко Филипче.

Директорот на Центарот за јавно здравје Арбен Зибери изјави дека што се однесува до главниот град Скопје, скринигот на вработените во градинките по пауза од три дена, продолжил денеска.

-Поради растот на случаите со Ковид-19 повеќе се посветивме на случаите кои беа поургентни и лица со хронични болести и што побрзо откривање на нивните резултати кои на крај испаднаа позитивни, рече Зибери.

Ќе се тестираат околу 2.000 лица вработени во градинките, а досега се тестирани 1.667, како и 545 вработени од домовите за стари лица. 

Малопродажните цени на нафтените деривати согласно Методологијата за формирање на цените, се зголемуваат во просек за 3,23%.

Малопродажните цени на бензинот ЕУРОСУПЕР БС-95 и на ЕУРОДИЗЕЛ (Д-Е V), се зголемуваат за 1,00 денар/литар, во однос на малопродажните цени утврдени со Одлуката од 01.06.2020 година и со тоа малопродажната цена на ЕУРОСУПЕР БС-95 изнесува 58,00 ден/лит, додека малопродажната цена на дизелот ЕУРОДИЗЕЛ (Д-Е V) изнесува 50,00 ден/лит.

Малопродажните цени на бензинот ЕУРОСУПЕР БС-98 и на Екстра лесното масло за домаќинство (ЕЛ-1), се зголемуваат за 1,50 денар/литар, во однос на малопродажните цени утврдени со Одлуката од 01.06.2020 година и со тоа малопродажната цена на ЕУРОСУПЕР БС-98 изнесува 60,50 ден/лит, додека малопродажната цена на Екстра лесното масло за домаќинство (ЕЛ-1), изнесува 39,00 ден/литар.