Крај на агонијата за голем број граѓани: со новите предлог-правила за снабдување со топлинска енергија се брише одредбата со која исклучените од парно греење со години плаќаа фиксен надоместок, пишува Дојче веле.

Граѓаните кои се исклучeни од системот за парно греење повеќе нема да плаќаат надоместок. Како што дознава Дојче веле ова е предвидено во новите предлог-правила за снабдување со топлинска енергија, за кои денеска треба да се дискутира на подготвителна седница на Регулаторната комисија за енергетика (РКЕ). Со новите Правила за снабдување со топлинска енергија се укинува одредбата во членот 52, став 2, од старите Правила за снабдување со топлинска енергија, според која „исклучените потрошувачи се задолжуваат со плаќање на надоместокот за ангажирана моќност (фиксен дел) од надоместокот за топлинска енергија, кој се определува согласно тарифниот систем за топлинска енергија“.

Со новите Правила овој став комплетно се брише, а се воведува постапка на кој начин во иднина би можеле да се исклучуваат потрошувачите од системот за топлинска енергија. Владата уште во декември 2017 година вети дека домаќинствата во Скопје кои се исклучени од централното греење во 2018 година ќе бидат ослободени од плаќање, но тоа не се реализираше. Во меѓувреме се чекаше регулаторите од РКЕ да ја добијат Студијата од МАНУ, која во изминатиот период правеше анализи какво е влијанието на исклучените врз системот за парно греење.

Како што дознаваме, единствената дилема што останува е - дали од плаќање фиксен надоместок да бидат ослободени и сопственици на дел во станбени, станбено-деловни и деловни објекти, каде распределбата на надоместокот се врши преку еден мерен уред, а во кој сопственикот не живее или не го користи објектот за деловни потреби.

Неофицијално, преовладува мислењето дека и тие треба да бидат ослободени од плаќање фиксен надоместок, но конечниот став допрва треба да биде донесен.

Тагови: парно греење

Адреналински парк, кој ќе се состои од една централна куќа и од 14 до 18 станици по кои ќе се стигнува со одење по јажиња и буриња, е дел од проектот за новиот парк што Општината Карпош ќе го гради покрај Вардар. 

Изградбата на адреналинскиот парк кој ќе се протега на вкупна површина од 6.500 м2, се очекува да започне во мај годинава.  

Притоа, ќе биде реконструирано детското игралиште на површина од 480 м2,  скејт-паркот на 1.100 м2, ќе биде изградено ново игралиште за одбојка и фудбал на песок, а атрактивниот адреналински парк за возрасни и деца ќе биде изграден на три нивоа, кој ќе се позиционира на површина од 1.600 м2.

 Предвидено е просторот дополнително да биде облагороден со хортикултурно уредување, каде ќе бидат засадени повеќе од 100 дрвја. Ќе биде поставена и нова урбана опрема, клупи, корпи за отпадоци и лежалки за релаксација.

Планирано е да се изгради и плато за одмор со мини сквер, а во околината ќе се постават тоалети и четири дрвени куќички за продажба на безалкохолни пијалоци. Просторот ќе го осветлуваат енергетско ефикасни ЛЕД- светилки со соларни панели.

Наскоро ќе се легализира марихуаната во Македонија, пишува ТВ21 повикувајќи се на свои „блиски извори во Владата“. 

Според телевизијата, за почеток легализацијата ќе се спроведува во туристичките места, односно во Охрид и Струга. Телевизијата пишува дека анализите на владата покажале дека легализацијата ќе придонесела за поголем број на туристи и поголем девизен прилив.

Во Македонија, засега, марихуаната се користи само за медицински цели.

Со четири електрични коли ЈП „Паркинзи Општина Центар“ ќе патролира низ општината и ќе става блокатори на непрописно паркирани возила. Казнувањето ќе стартува од 10 април на паркинзите за резиденти, а сега контролорите ставаат само опомени кои ги лепат на возилата, пренесува СДК.

Имаме многу поплаки од граѓаните кои не можат да се паркираат на нивниот паркинг од други возила кои не се на станари. Затоа стартуваме со поставување блокатори. Казната за поставен блокатор е 1.200 денари. Доколку не си ја плати казната во рок од два часа, ќе биде повикан пајак и ќе го подигне. Прво почнуваме во Дебар Маало и Градски парк. Од 10 април буквално ќе имаме инвазија на овој дел, за да ги ослободиме паркинзите на станарите, а потоа продолжуваме во Буњаковец и Капиштец, вели Васко Кичевски, директор на ЈП „Паркинзи Општина Центар“.

Контролорите на терен откако ќе регистрираат неправилно паркирано возило, ќе ги повикуваат колегите со блокаторите. Оваа акција претпријатието ја спроведува со цел да воведат ред во паркирањето.