Од идната година Владата планира да воведе нов систем таканаречен „Повеќе пари кај граѓаните“ со кои ќе се овозможи поврат на ДДВ на граѓаните при купување на стока од широка потрошувачка.

Премиерот на Владата на РМ, Зоран Заев, на оваа тема најави дека проектот за поврат на 15 отсто од платениот ДДВ за потрошувачка до 30.000 денари, кој требаше да стартува од 1 февруари 2019 година, ќе започне да се реализира од 1 јули 2019 година. Првите шест месеци од проектот ќе биде експериментален, а реално тој би стартувал од 1 јануари 2020 година.

Пилот-проектот е замислен да биде наменет за посиромашните граѓани во државата и затоа нема да се однесува за купување на луксузни производи. Првично тој треба да стартува во неколку општини во земјава, но засега не се открива кои ќе бидат тие.

Оваа новина за граѓаните Заев ја најавуваше уште во неговата предизборка кампања, но таа повеќе од година и пол доцни.

Повратот на ДДВ на граѓаните не е новина и тој е практикуван во повеќе европски држави и искуството покажало дека дава добри резултати.

Според премиерот оваа одлука е донесена бидејќи смета дека не е фер некој побогат со големи примања да добие многу поголем поврат од некој со мали приходи.

– Првите 6 месеци ќе бидат ексериментални за да може да ги провериме резултатите, така што ако е се во ред ќе стартуваме од први јануари 2020 – вели Заев и дополни дека експериментот ќе се однесува на сите граѓани кои се приматели на социјална помош, кои што имаат еден вработен во семејството за да може државата внимателно да го постави како е најдобро за оваа категорија на население.

Во Македонија ДДВ од 18 проценти плаќа секој граѓанин при секое пазарување. Поволностите на проектот можат да се согледаат преку еден практичен пример. Така ако сметката е 1.000 денари, тогаш на државата и се плаќа ДДВ од 180 денари. Со поврат на данокот, купувачот треба да добие назад 15 проценти од таа сума, односно 27 денари.

Проценките на Заев се дека на овој начин поголемите потрошувачи на годишно ниво би можеле да имаат поврат на ДДВ и до 30.000 денари, сума која е во висина на една солидна плата за македонски услови.

Град Скопје планира да го поскапи паркирањето во центарот на Градот во случај на енормно загадување на воздухот во деновите кога ќе бидат прогласени вонредни мерки поради надминување на праговите на алармирање на ПМ10 честички.

На следната седница Советот на Град Скопје ќе одлучува за измена на цената за час паркирање на јавните површини и паркиралишта со кои стопанисува “Градски паркинг”. Со оваа измена, градоначалникот на Град Скопје по прогласување вонредни и интервентни мерки во одредени денови има можност да даде предлог на одредени паркиралишта цената за паркирање двојно да се зголеми, само во тие денови. Во случај на енормно загадување на воздухот, ова би се применило во централното градско подрачје за да се стимулираат граѓаните кои патуваат во овој дел од градот да користат јавен превоз со цел намалување на сообраќајниот метеж, а со тоа и намалување на количината на издувни гасови од возилата кои го загадуваат воздухот – информираат градските власти.

Лани, само два пати Градот прогласи вонредни денови. Оттаму додаваат дека статистичките бројки покажуваат оти има напредок во однос на намалување на загаденоста на воздухот година по сите преземени мерки изминативе месеци.

Највисоко измерената вредност на концентрација на ПМ10 во периодот јануари-септември имаше во 2016 година – 560,3 микрограми на кубен метар, во 2017 година највисоко измерената вредност беше 380,2 мг/м3, додека оваа година највисоко измерена вредност е 334,9 мг/м3. Веруваме дека сите мерки за намалување на загадувањето што Градот ги презема изминатава година влијаат на намалување на концентрацијата на ПМ10 честички во воздухот – велат од Град Скопје.

Во централното градско подрачје ЈП “Градски паркинг” стопанисува на околу 28 паркинзи на кои цената за час паркирање се движи од 25 до 100 денари.

Граѓаните побараа од премиерот Зоран Заев побргу да се истурка процедурата со новиот Закон за извршување, што веќе е во собраниска процедура, по синоќешната најава од страна на Владата дека ќе се намалат прекршочните казни за физичките и правните лица од максимални 1.000, односно 2.000 евра, на 250, односно 500 евра.

Следно што народот очекува е да се донесе Законот за извршителите на кои што Никола груевски им остави одврзани раце па тие преку разни трикови уништија стотици илјади семејства. Од 2.000 денари основен долг со нивните трикови долгот со креваа на 20.000 денари - му напиша Томе Симеонов на неговиот профил.

Во реакциите доминираат ваквиот тип на барања, а граѓаните сметаат дека кај прекршоците нема голем простор за манипулации и секој треба да си сноси одговорност за грешката.

Најголем проблем за правните лица се високите цени за нотарите, извршителите и адвокатите. За да едно лице приговори на нотарско решение мора да плати адвокат за приговорот. Таа одредба мора да се промени. Користењето на адвокат е право, не смее да биде обврска. На пример, мојот сопруг за да приговара на нотарско решение за сума од 700 денари, треба да покрие трошок од 1600 денари за адвокатот, и ако не добие треба да го покрие трошокот за адвокат на другата страна од 1600 денари. Ова нема логика. Треба да се стават под лупа сумите на адвокатската тарифа - пишува Андријана Богдановска. 

Со новиот Закон за извршители нотарската награда ќе изнесува 10% од главниот долг, но не повеќе од 500 денари. Наградата за извршител за долгови за комуналии не може да надмине 20% од главниот долг.

Со предложените измени во Законот за прекршоци ќе се намалат казните за прекршоци за физичките лица и за компаниите. Казните за физичките лица ќе се намалат за 75 отсто, а за правните тоа намалување ќе биде и до 150 отсто. Ако досега казната за нерегистрирано возило изнесувала 500 евра, со новиот закон ќе изнесува 250 евра, за предизвикување бучава казната сега изнесува 450 евра. Со новиот закон сега казната нема да смее да надмине 250 евра, изјавија вчера премиерот Зоран Заев и министерката за правда Рената Дескоска.

Според предложените владини измени минималната глоба за физичко лице ќе биде 15 евра, а максималната 250 наместо досегашните 1.000 евра. За правните лица, при одредување на глобата ќе се води сметка за приходот остварен во претходната година, бројот на вработени и претходно санкционирање за исти или слични прекршоци.

Во законот се прави градација помеѓу мали, средни и големи претпријатија. Кај малите компании казните се намалуваат од 50 до 2.000 евра, а за средните и големите компании казните се намалуваат за два и пол пати, од 250 минимална до 10.000 максимална казна, кажа премиерот Заев.

Дескоска рече дека казнената политика нема да биде политика за полнење на буџетот, туку ќе биде насочена кон опомена на оние кои што згрешиле.

Околу 200 закони во кои е уредена висината на казната, ќе треба да се усогласат со Законот за прекршоци и нема да смеат да го надминат утврдениот минимум и максимум.  Ако досега казната за нерегистрирано возило изнесувала 500 евра, со новиот закон ќе изнесува 250 евра, казната за технички неисправно возило сега изнесува 400 евра, со новиот закон истата не смее да надминува 250 евра, за предизвикување бучава казната сега изнесува 450 евра, со новиот закон сега казната нема да смее да надмине 250 евра, рече Дескоска.

Сега акцентот ќе се стави на опомената и на она што често пати се случуваше, некогаш самата грешка што ќе биде увидена од страна на правните лица, често пати беше казнувана без оглед што самите ја увиделе грешката, пријавиле, значи направиле корекција. Законот не дозволуваше инспекциските служби да се повлечат и фирмите беа казнувани. Сега, доколку самото претпријатие направи корекција, доколку станува збор за ненамерна грешка која што не оставила штетни последици и доколку се отстранат штетните последици, тогаш нема да има казнувања, рече министерката за правда.

Владата не предвиде измени во казните за предизвикување општествена опасност, за загадување на животната средина и за уништување на културното богатство.