Бремени жени кои биле вработени на определено време годинава најмногу поднеле претставки до Комисијата за заштита од дискриминација, бидејќи останувале без работа веднаш откако работодавецот ќе дознаел дека се бремени.

За жал и покрај тоа што сме свесни дека постои ваков вид на дискриминација, законот не ни дозволува да преземеме одредени чекори и во овие случаи утврдуваме дискриминација само доколку има писмени докази за тоа, изјави денеска Нена Неновска Ѓорѓиевска, член на Комисијата за заштита од дискриминација на презентацијата на Годишниот извештајот за 2017 година.

Оваа година, како што посочи таа, од вкупниот број на поднесени претставки најзастапена е областа работа и работни односи (41 отсто), потоа следат претставки паради дискриминација во областа на пристап до добра и услуги (25 отсто), медиуми и јавно информирање (22 отсто), 14 отсто во областа на образование, наука и спорт и 10 отсто во областа на социјалната сигурност, вклучувајќи го и подрачјето на социјалната заштита, пензиско и инвалидско осигурување, здравствено осигурување и здравствена заштита.

Минатата година до Комисијата за заштита од дискриминација биле доставени 59 претставки за дискриминација од граѓани, правни лица, граѓански организации и други.

Најмногу од претставките – 19 отсто биле поднесени поради дискриминација врз основ на пол и род.

Од поднесените претставки 18 отсто пак се по основ на етничка припадност, 17 по основ на политичка припадност, по 16 отсто по основ на здравствена состојба, сексуална ориентација и родов идентитет, како и по личен или општествен статус, а по седум отсто по основ на социјално потекло и образование, рече Неновска Ѓорѓиевска.

Претседателот на Комисијата за заштита од дискриминација Александар Даштевски на презентацијата на извештајот посочи дека се забележува тренд на зголемување на бројот на претставките посебно во текот на минатата година но, како што додаде, поважно е што се зголемува и бројот на утврдена дискриминација по разни основи.

Во текот на 2017 година Комисијата за заштита од дискриминација донела 84 мислења, од кои во 19 случаи утврдила дискриминација и на дискриминаторите и им дала препорака за отстранување на истата, а во 29 мислења е утврдено дека нема дискриминација.

Комисијата не постапила по 31 претставки поради немање надлежност, една претставка е спогодбено решена, а во четири случаи Комисијата ја запре постапката.

Има случаи каде Комисијата има улога на медијатор меѓу странките за да се дојде до спогодба меѓу нив, се со цел таквите дејствија да не се повторуваат, рече Даштевски.

Комисијата за заштита од дискриминација треба во рок од 90 дена од моментот на доставувањето на претставката да даде мислење за наводната дискриминација до лицето кое поднело претставка и до оној против кого е поднесена. Доколку се утврди дискриминација Комисијата ќе препорача начин на отстранување на повредата на правото.

Оној што направил дискриминација треба да ја отстрани повредата на правото во рок од 30 дена од денот на приемот на препораката и за тоа да ја извести Комисијата. Доколку не постапат по препораката на Комисијата е надлежна да поведе прекршочна постапка.

Против дискриминаторите, како што рече Неновска Ѓорѓиевска, предвидени се и парчни казни кои се движат од 500 до 1.000 евра.

Комерцијалисти, сметководители, квалификувани работници за производство, финансиски службеници, келнери, возачи, шивачи, наставнички кадар, медицински лица, се само дел од профилите на кадар за кој се објавени огласи за вработување.

На јавниот портал на Агенцијата за вработување постојано расте бројката за нови работни места. Македонските компании се заинтересирани за нови вработувања при што бројот во моментов достигна околу 9.000 слободни работни места.

Список содржеше побарувања за разни видови на профили на работници, со различен степен на образование и стручност. За некои од нив се бара искуство, за некои не,а
на списокот на овие побарувања се најдоа речиси повеќето македонски градови.

Сите овие огласи може да ги видат на веб страната на АВРМ - avrm.gov.mk што претставува исклучително корисна платформа преку која значително се овозможува доближување на понудата и побарувачката на работа.На оваа веб страна постојано се ажурираат податоците и граѓаните преку неа може да се запознаат со сите слободни работни места за кои се распишани огласи од страна на компаниите за нивно пополнување.

Од Владата потсетуваат дека за полесно вработувањата може да се користат мерките и програмите на Агенцијата за вработување, во кои државата ги покрива трошоците за ангажман на работници во определен временски период.

Во овој временски период работодавците може да стекнат впечаток за квалитетот на работниците, односно да извршат обуки и преквалификации со цел да ги задржат работниците во редовен работен однос.

Пратеничката од ДОМ, Маја Морачанин ја поддржа иницијатива на Хелсиншкиот комитет за измени на Законот за работни односи во насока на подобрување на позицијата на жената-работничка и постигнување на родова рамноправност.

На јавната расправа во Собранието, таа го искажа својот став за потребата од промена на начинот на користење на родителското отсуство во насока на вклучување и на другиот родител, односно таткото.

Сметам дека добар модел е платено родителско отсуство во траење од 12 месеци, од кои првите 3 месеци породилно отсуство да ги користи мајката, а од останатите 9 месеци, 3 месеци без право на пренесување, да ги користи родителот кој не го користи поголемиот дел од родителското отсуство, што најчесто е таткото. Во спротивно, би го изгубил правото на платено родителско отсуство за тие 3 месеци, рече Морачанин.

Според неа, ова ќе овозможи реализирање на правото и обврската на таткото во процесот на грижа и воспитување на детето и ќе влијае на намалување на дискриминацијата при вработување на жените.

Искуствата говорат дека при избор на работник, работодавачите преферираат да вработат маж, а не жена, токму поради потенцијалната бременост, користење породилно отсуство и боледување за нега на болно дете, од страна на жените. Со овој модел работодавачите ќе имаат предвид дека и работниците-мажи ќе користат родителско отсуство од работа, порача Морачанин.

Истакна дека се потребни законски измени со кои ќе се оневозможи престанок на договорот за вработување на определено време за работничките кои се бремени. Исто така, таа изрази поддршка за допрецизирање на законската регулатива со цел задолжителна исплата на регрес за годишен одмор на работничките кои во текот на календарската година користеле отсуство за бременост, раѓање и родителство.

„Нормираниот учинок“ падна на Уставен суд. Работниците од вчера нема да мора да исполнуваат норма која ја задава работодавачот за да добијат минимална плата од 12.000 денари. Оваа иницијатива ја изготви СИЕР, Синдикатот на управата, правосудството и здружението на граѓани. А до Уставниот суд неа ја поднесе ССМ. Од СИЕР велат дека одредбите кои се укинале им давале можност на работодавачите да не мора да ја исплатат минималната плата и покрај законското решение.

И што се случуваше во пракса или работникот ќе работи повеќе саати, за да дојде до нормираниот учинок кој еднострано го одредува работодавачот иилии пак немаше да му исплати со оправдување дека не ја исполнил нормата, односно нормираниот учинок. Со ова сега тоа се избегнува, без разлика на нормираниот учинок работникот мора да ја добие основната минимална плата од 12.000 денари, изјави Пеце Ристевски, претседател на СИЕР.

Уште во текот на постапката за донесување на измените на Законот, ССМ укажуваше дека не се согласува минималната плата да биде условена од – нормиран учинок за кој во предложените измени на Законот е предвидено да се утврдува единствено по критериуми утврдени од работодавачот. Министерката за труд и социјална политика Мила Царовска денес само кусо изјави дека оваа одлука мора да се почитува.

Видете мислам дека одлуки на Уставен суд не се коментираат туку само се спроведуваат така што јасна е работата тука, истакна Мила Царовска, министер за труд и социјална политика.

Од СИЕР велат дека со оваа одлука ќе се овозможи правна сигурност во примената на Законот за минимална плата и исплата на минималната плата за сите работници во РМ.

Тагови: минимална плата