Подкастот „НА КАДЕ ОДИМЕ?“ ја започнува својата четврта сезона! По три сезони исполнети со инспиративни гостувања, искрени разговори и различни професионални приказни, продолжуваме таму каде што застанавме  со желба да отвораме важни теми, да поставуваме прашања и да слушнеме различни перспективи.

И оваа сезона ве очекуваат разговори со луѓе кои имаат што да раскажат, искуства од кои може да се научи и ставови што поттикнуваат на размислување. Ќе зборуваме за кариерата, професионалните предизвици, личниот развој, амбициите, промените, успесите, но и за оние моменти и одлуки што не секогаш се гледаат зад една успешна приказна.

Веруваме дека секој професионален пат има своја приказна, секоја одлука носи нова насока, а зад секое искуство се крие лекција што вреди да се сподели. Токму затоа, „НА КАДЕ ОДИМЕ?“ продолжува да биде простор за отворени разговори, нови идеи и прашања на кои не секогаш има едноставни одговори.

А кој ќе биде нашиот прв гостин во четвртата сезона? 

Тоа ќе го дознаете утре во 19:00 часот!

Подгответе се за нови епизоди, интересни соговорници и разговори што ќе ве натераат да погледнете поинаку на некои од прашањата што сите си ги поставуваме.

Тагови: креативност НА КАДЕ ОДИМЕ поткаст работно искуство

Добивате задача, но не и јасни насоки. Не знаете точно што се очекува од вас, кои се приоритетите или како треба да изгледа конечниот резултат. Сепак, се обидувате да ја завршите работата најдобро што можете. А потоа доаѓа коментарот: „Не така ти кажав“ или „Ова не е тоа што го очекував“.

Ова е една од понепријатните ситуации на работното место. Од вработените се очекува да бидат самостојни, организирани и одговорни, но истовремено често добиваат задачи без доволно објаснување. Кога резултатот нема да ги исполни очекувањата на менаџерот, одговорноста лесно се префрла на лицето што ја извршувало задачата.

Како да реагирате кога се наоѓате во ваква ситуација, без да влезете во конфликт со шефот и без постојано да ја преземате вината за нешто што не било јасно договорено?

1. Не претпоставувајте што точно сака шефот

Една од најчестите грешки е да започнете со работа веднаш, надевајќи се дека сте ги разбрале очекувањата. Кога инструкциите се нецелосни, секој може да ги протолкува на свој начин.

На пример, добивате задача да подготвите извештај, но не знаете дали треба да биде краток преглед или детална анализа, кому му е наменет и кога точно треба да биде готов.

Наместо да погодувате, поставете неколку конкретни прашања:

• Кој е главниот резултат што го очекувате?
• Кој е рокот за завршување?
• Дали постои пример или претходен документ според кој треба да работам?
• Кои информации треба да бидат вклучени?
• Што е најважно да биде завршено прво?

Прашањата не се знак дека не знаете да работите. Напротив, покажуваат дека сакате да ја завршите задачата правилно уште од почеток.

2. Потврдете ги договорените задачи писмено

Усните инструкции лесно се забораваат, а понекогаш и различно се толкуваат. Затоа, по разговорот со менаџерот, корисно е накратко да го потврдите договореното преку е-пошта или службена порака.

На пример: „Само да потврдам дека задачата треба да ја подготвам во форма на краток извештај, со фокус на резултатите од последниот месец, и да ја испратам до четврток. Доколку има дополнителни насоки, слободно испратете ми.“ Со ова создавате јасна слика за тоа што е договорено. Ако подоцна се појави недоразбирање, можете да се повикате на претходната комуникација.

Важно е ова да не го правите со цел да собирате докази против шефот, туку за да избегнете различни толкувања и непотребни грешки.

3. Побарајте повратна информација пред да ја завршите целата задача

Ако добиете нејасна задача, не чекајте да го завршите целиот проект за да дознаете дека сте тргнале во погрешна насока. Кога станува збор за поголема обврска, испратете првична верзија, предлог или краток преглед на она што планирате да го направите.

Можете да кажете: „Подготвив почетен предлог за да проверам дали сме на иста линија пред да продолжам со целата задача.“ Ова е особено корисно кога работите на презентации, извештаи, маркетинг-материјали или проекти во кои личните очекувања на менаџерот имаат голема улога.

На тој начин, евентуалните корекции ќе ги направите навреме, наместо да потрошите часови на работа што подоцна ќе треба целосно да ја преработите.

4. Кога ќе ве обвинат за грешка, не реагирајте импулсивно

Замислете дека шефот ви кажува: „Ова не е тоа што го побарав. Требаше да знаеш што мислев.“ Првата реакција можеби ќе ви биде да се браните или да возвратите дека никој не ви објаснил што точно треба да направите. Но, ако разговорот се претвори во меѓусебно обвинување, проблемот најверојатно нема да се реши.

Наместо тоа, останете смирени и вратете се на конкретните инструкции. На пример: „Разбирам дека резултатот не одговара на вашите очекувања. Јас работев според насоките што ги договоривме. Би сакал/а да ми посочите што конкретно треба да се промени за следната верзија да биде во согласност со вашите очекувања.“

Со ваков одговор не ја избегнувате одговорноста, но не ја прифаќате автоматски целата вина. Истовремено, барате конкретна повратна информација што ќе ви помогне да ја поправите работата.

5. Разликувајте конструктивна критика од неправедно префрлање на вината

Не секоја забелешка од шефот значи дека тој е неправеден. Можно е навистина да сте пропуштиле важен детал или погрешно да сте разбрале дел од задачата. Но, постои разлика меѓу менаџер кој ви укажува на конкретна грешка и менаџер кој постојано ги менува очекувањата, а потоа ве обвинува дека не сте ги исполниле.

Обидете се да препознаете дали се повторуваат одредени ситуации:

• Инструкциите се менуваат откако задачата веќе е завршена.
• Не добивате одговори кога барате дополнително објаснување.
• Очекувањата се различни од она што претходно било договорено.
• Одговорноста за неуспехот секогаш се префрла на вработениот.
• Никогаш не добивате конкретно објаснување што треба да се подобри.

Ако ова станува редовна практика, проблемот можеби не е во вашата способност да ја завршите работата, туку во начинот на кој се поставуваат и комуницираат очекувањата.

6. Поставете граници кога инструкциите постојано се менуваат

Понекогаш најголемиот проблем не е недостигот од инструкции, туку нивното постојано менување. Денес добивате една насока, утре друга, а на крајот од вас се очекува да го испорачате резултатот во првично договорениот рок. Во таква ситуација, важно е да објасните како промените влијаат врз вашата работа.

На пример: „Можам да ги направам измените, но со оглед на новите насоки ќе ми треба дополнително време. Дали можеме да го усогласиме рокот?“ Или: „За да избегнеме дополнителни корекции, би сакал/а да ги потврдиме конечните барања пред да продолжам.“

Ова не е одбивање на работа, туку професионален начин да покажете дека секоја промена има последици врз времето и квалитетот на извршувањето.

7. Ако проблемот продолжува, документирајте ги ситуациите и побарајте поддршка

Ако и покрај обидите за подобра комуникација постојано се соочувате со нејасни задачи, променети очекувања и неоправдани обвинувања, време е да ја разгледате ситуацијата посериозно.

Чувајте ги релевантните е-пораки, договорените рокови, инструкциите и забелешките за промените во задачите. Запишувајте ги конкретните ситуации и нивното влијание врз вашата работа.

Доколку директниот разговор со шефот не донесе промена, можете да побарате разговор со повисок менаџер или одделот за човечки ресурси.

При тоа, фокусирајте се на конкретните проблеми и нивните последици, а не на личните карактеристики на менаџерот. На пример, објаснете дека честите промени во насоките предизвикуваат повторување на задачите, пропуштање рокови и непотребно трошење време.

Добриот менаџер не очекува од вработените да читаат мисли

Јасните инструкции не се само прашање на добра организација, туку и важен дел од успешното раководење. Менаџерот треба да знае да ги пренесе очекувањата, да постави реални рокови и да обезбеди простор за прашања и дополнителни објаснувања.

Од друга страна, вработените треба навреме да побараат појаснување, да ги потврдат договорите и да преземат одговорност за својот дел од работата. Најдобри резултати се постигнуваат кога двете страни комуницираат отворено и кога одговорноста не се бара само на крајот, туку се презема уште од почетокот на задачата.

Не можете да одговарате за очекувања што никој не ви ги соопштил. Но, можете да направите многу за да спречите недоразбирањата да се претворат во ваша секојдневна работна реалност.

Прочитајте и за: 7 знаци на пасивна агресија на работа

Тагови: совети за работа

Граѓаните кои во периодот од јули до септември скенирале фискални сметки преку апликацијата „МојДДВ“ наскоро треба да го добијат повратот на дел од платениот данок на додадена вредност. Исплатата за третото тримесечје од 2026 година треба да се реализира најдоцна до 30 ноември, иако од Управата за јавни приходи засега нема официјална информација кога точно ќе започне.

Максималниот износ што може да го добие едно лице за овој период е 2.100 денари, а конечната сума зависи од бројот и вредноста на скенираните и прифатени сметки, како и од пресметаниот ДДВ. Според правилата, за купени македонски производи и услуги се враќаат 20 проценти од ДДВ, додека за останатите производи и услуги повратот изнесува 10 проценти. Тоа значи дека едно четиричлено семејство може заедно да добие и до 8.400 денари за едно тримесечје.

Од УЈП ги потсетуваат корисниците пред исплатата да проверат дали во апликацијата имаат внесено точни и ажурирани податоци за трансакциската сметка, особено ако во меѓувреме смениле банка или затвориле стара сметка. Неточните податоци може да предизвикаат доцнење на исплатата. Мерката „МојДДВ“ продолжува и во 2026 година, а според претходните податоци, во текот на 2025 година на граѓаните им биле вратени повеќе од 3,47 милијарди денари, односно околу 56,4 милиони евра.

Тагови: исплата Мој ДДВ

Вештачката интелигенција сè почесто станува дел од секојдневното работење. Компаниите ја користат за автоматизирање задачи, намалување на трошоците, побрза обработка на податоци и зголемување на продуктивноста. Но, дали тоа е вистинскиот максимум што можат да го извлечат од оваа технологија?

Кога вештачката интелигенција се користи исклучиво за да се завршат истите задачи за пократко време, компаниите ризикуваат да ја пропуштат нејзината најголема вредност можноста да создадат сосема нови начини на работа.

Наместо да се прашуваат како со помош на AI да заштедат неколку часа неделно, организациите треба да размислат како оваа технологија може да им помогне да работат попаметно, да носат подобри одлуки и да создаваат поголема вредност.

Најголемата можност е во промената на начинот на работа

Една од најважните улоги на HR секторот во овој процес е да препознае кои работни задачи можат да се автоматизираат, но и како тоа ќе влијае врз вработените, нивните улоги и потребните вештини.

Според новото истражување Future of Work на SAP, кое го пренесува HR Executive, компаниите често се фокусираат на ефикасноста, но вистинската промена доаѓа кога ќе ги преиспитаат работните процеси и ќе ги приспособат на новите можности што ги нуди вештачката интелигенција.

Тоа значи дека не е доволно само да се воведат нови алатки. Потребно е да се размислува за:

• Редизајнирање на работните места: како ќе изгледаат работните позиции кога дел од задачите ќе ги преземе AI?
• Развој на нови вештини: кои знаења ќе им бидат потребни на вработените за успешно да соработуваат со технологијата?
• Подобро донесување одлуки: како податоците и анализите можат да им помогнат на менаџерите да носат поквалитетни одлуки?
• Поголема флексибилност: како да се создадат работни улоги што полесно ќе се приспособуваат на потребите на компанијата?

HR мора да биде дел од трансформацијата, а не само нејзин набљудувач

Оваа промена отвора ново поглавје за HR професионалците. Од нив веќе не се очекува само да управуваат со вработувањето, административните процеси и развојот на кадарот. Сè повеќе се очекува да учествуваат во стратешкото планирање на иднината на организацијата.

За да ја преземе оваа улога, и самиот HR сектор мора да ги развива своите способности. Потребно е да располага со знаења за анализа на работната сила, препознавање на потребните вештини и планирање на идните кадровски потреби.

Особено важно е поврзувањето на два вида информации: кои вештини, интереси и амбиции ги имаат вработените и кои задачи навистина треба да се извршуваат во организацијата. Токму нивното поврзување може да помогне во создавањето подобри работни позиции и поефикасни тимови.

Технологијата може да преземе задачи, но не и одговорност за човечкиот фактор

Автоматизацијата може да ослободи значително време од повторливите и административните обврски. Но, тоа време треба да се искористи за активности во кои човечките способности имаат најголема вредност: комуникација, креативност, емпатија, решавање проблеми и развој на вработените.

Истовремено, компаниите треба да размислуваат и за тоа како ќе ги приспособат системите за оценување на учинокот, наградување и професионален развој на новиот начин на работа.

Ако работните позиции се менуваат, тогаш мора да се менуваат и критериумите според кои се оценува успехот на вработените.

Прашањето не е колку време ќе заштедиме, туку што ќе направиме со него

Вештачката интелигенција несомнено може да ја направи работата побрза и поедноставна. Но, компаниите што ќе се фокусираат исклучиво на намалување на трошоците и забрзување на постојните процеси можеби ќе ја пропуштат нејзината најголема предност.

Вистинскиот потенцијал на AI е во можноста да им помогне на организациите да ги преиспитаат старите начини на функционирање, да создадат нови работни модели и подобро да го искористат знаењето и талентот на своите вработени.

На крајот, најуспешни нема да бидат нужно компаниите што најбрзо ќе ја воведат новата технологија, туку оние што ќе знаат како да ја поврзат со луѓето, нивните способности и долгорочните деловни цели. Затоа, наместо само да прашуваме „Како AI ќе ни ја олесни работата?“, можеби е време да прашаме: „Каква работа можеме да создадеме благодарение на AI?“

Прочитајте и за: HR трендови: Компаниите нудат здравствени придобивки но дали вработените се осмелуваат да ги користат?

Тагови: HR трендови