Балканските земји најавуваат нов бран зголемувања на минималните плати, отворајќи ја дебатата за тоа каде се наоѓа Македонија во однос на соседите. Додека кај нас минималната нето-плата изнесува 26.046 денари, односно околу 423 евра, Србија од јануари 2027 година планира минималец од околу 600 евра нето, а Црна Гора најавува модел со примања од 1.000 до 1.400 евра нето, зависно од образованието.
Во регионот, Хрватска веќе има минимална бруто-плата од 1.050 евра за 2026 година, со можност таа дополнително да порасне во 2027 година, додека Албанија годинава ја зголеми минималната бруто-плата за 25 проценти, на 50.000 леки, со амбиција да стигне до околу 600 евра во 2028 година. Овие потези се дел од пошироки обиди за подобрување на животниот стандард и задржување на работната сила, но нивниот ефект ќе зависи и од растот на цените, кириите и останатите трошоци.
Во Македонија следното редовно усогласување на минималната плата е предвидено за март 2027 година, додека синдикатите веќе бараат минималец од 600 евра. Сепак, економистите предупредуваат дека повисока плата не значи автоматски и повисок животен стандард, бидејќи реалната вредност на заработката зависи од инфлацијата, даночниот систем и куповната моќ. Прашањето за Македонија останува исто: како да се забрза растот на платите без да се загрози одржливоста на домашната економија.
Тагови: Балкан минимална плата