Со години HR професионалците зборуваат за ангажираноста на вработените. Но, во последните години фокусот постепено се поместува кон поширок концепт employee experience (EX), односно целокупното искуство на вработениот во компанијата.
Според анализата објавена во People Management, двете концепции не мора да се исклучуваат една со друга. Напротив, искуството на вработените може да биде основата врз која се гради нивната ангажираност.
Ангажираноста покажува како се чувствува вработениот, а искуството објаснува зошто
Една од главните разлики е што employee engagement најчесто покажува како вработените се чувствуваат во одреден момент – на пример, кога пополнуваат анкета.
Employee experience оди чекор подалеку. Тој го разгледува целиот пат на вработениот во организацијата – од првиот контакт со компанијата и процесот на вработување, преку onboarding, секојдневната работа и односот со менаџерот, до можностите за развој, наградувањето и моментот кога вработениот ја напушта организацијата.
Со други зборови, ангажираноста е резултат, додека искуството е нешто што организацијата го создава секој ден.
„Моментите што значат“ можат да одлучат дали вработениот ќе остане
Особено интересен е пристапот кон таканаречените „moments that matter“ моменти во животниот циклус на вработениот кои можат значително да влијаат врз неговата одлука да остане или да замине.
Истражувањето цитирано во текстот издвојува шест особено важни моменти:
- Onboarding и првите денови во компанијата;
- Добивање повратна информација;
- Наградување;
- Признание за добро завршената работа;
- Можности за развој;
- Управување со балансот меѓу работата и приватниот живот.
Ова значи дека компанијата не треба само да прашува „Дали се задоволни нашите вработени?“, туку и „Што конкретно го создава нивното искуство?“
Employee experience не е само работа на HR
Тука се појавува еден од најголемите предизвици. Ако искуството на вработениот го сочинуваат односот со менаџерот, технологијата што ја користи, работната средина, начинот на кој е награден, можностите за развој, тимската култура и начинот на кој се организира работата – тогаш тешко може да се каже дека само HR е одговорен за него.
Според експертите цитирани од People Management, employee experience е поширок одделенски предизвик кој бара соработка меѓу HR, менаџментот, оперативните тимови и технологијата.
Токму затоа, компаниите не можат да го подобрат искуството само со нова анкета, нова апликација или уште еден бенефит.
Не станува збор само за „убаво работно место“
Employee experience често може погрешно да се разбере како создавање што е можно „поудобна“ работна средина.
Но, суштината е многу поширока. Вработените сакаат да знаат што добиваат од компанијата, но и што компанијата очекува од нив. Јасните очекувања, фер односот, можностите за развој, признанието и чувството дека нивната работа има значење се дел од искуството.
Затоа позитивното employee experience не значи компанијата постојано да им удоволува на вработените. Значи да создаде јасен, фер и функционален однос меѓу организацијата и луѓето кои работат во неа.
Што значи ова за HR?
За HR професионалците, промената кон employee experience значи поместување од прашањето: „Колку се ангажирани нашите вработени?“ кон: „Што можеме да промениме во нивното секојдневно искуство за да создадеме подобри резултати?“
Тоа подразбира слушање на вработените, следење на клучните моменти во нивниот животен циклус и препознавање на проблемите пред тие да станат причина за незадоволство или заминување.
И најважно искуството не треба да се гледа како еднократен HR проект. Тоа е систем кој се создава со секоја интеракција меѓу вработениот и организацијата. На крајот, ангажираноста и employee experience не мора да бидат конкуренти.
Ангажираноста покажува како се чувствуваат вработените денес. Employee experience помага да разбереме зошто се чувствуваат така и што можеме да направиме за тоа да се промени.
Прочитајте и за: Зошто компаниите треба да престанат да ги ставаат сите млади во ист кош
Тагови: HR трендови