Цените во рестораните често отвораат прашања кај гостите  особено кога едно навидум едноставно јадење чини 10, 12 или повеќе евра, а самите намирници потребни за неговата подготовка се многу поевтини. Сепак, сумата на менито не ја покрива само храната што завршува на чинијата. Во неа се вклучени и трошоците за плати, закуп на просторот, даноци, сметки и други расходи неопходни за функционирање на еден ресторан.

За да се добие појасна слика, направена е анализа на пет често нарачувани ресторански јадења: ќебапи со лепче, мешана пица, хамбургер со помфрит, пилешко филе со помфрит и шпагети болоњезе. Во разговор со искусен хрватски готвач се земени приближни цени од ресторани од средна категорија и се пресметани просечни трошоци за секое јадење. Станува збор за илустративен пример, а не за универзална пресметка, бидејќи секој угостител има различни услови и трошоци. Анализата покажува како се распределува крајната цена  колкав дел оди за производи и работење, а колку може да остане како заработка за угостителот.

Тагови: брза храна данок ресторан трошоци Хрватска

Цените на становите во главниот град сè повеќе се оддалечуваат од можностите на граѓаните со просечни приходи. Според податоците од Катастарот, обработени од „Квадрат“, просечната реализирана цена на стан во Скопје во вториот квартал од 2026 година изнесувала околу 1.449 евра за квадратен метар, што значи дека стан од 70 квадрати чини приближно 101.430 евра. Во огласите цените се уште повисоки и достигнуваат околу 2.158 евра за квадрат, па стан од 60 квадрати се нуди и за речиси 129.500 евра.

Со просечна нето-плата од околу 48.500 денари, односно нешто помалку од 800 евра, стан од 100.000 евра на хартија вреди колку 10,4 целосни годишни плати. Но, оваа пресметка е само теоретска, бидејќи никој не може целата заработка да ја одвојува исклучиво за купување дом. Ако месечно се штедат 20% од платата, односно 160 евра, за да се соберат 100.000 евра би биле потребни повеќе од 52 години, а и тоа под услов цените на недвижностите во меѓувреме да не растат. Дополнителен товар е и тоа што годишниот раст на цените на станбените недвижности достигнува околу 16,6%.

За најголем дел од купувачите, единственото реално решение останува станбениот кредит, но и тогаш пречката почнува со сопственото учество. За стан од 100.000 евра, потребни се најмалку 10.000 евра однапред, сума што за лице со плата од 800 евра може да се собира со години. Доколку остатокот од 90.000 евра се финансира со кредит на 30 години и камата од околу 3,2%, месечната рата би изнесувала приближно 390 евра — речиси половина од една просечна плата. Анализата покажува дека достапноста на сопствен дом во Скопје сè помалку зависи само од платата, а сè повеќе од тоа дали домаќинството има два прихода, семејна поддршка или веќе создадена заштеда.

Тагови: плата Скопје стан

ВДЛ Бус Македонија е компанија која произведува патнички автобуси од светски познатиот бренд Van Hool. Во секој автобус што излегува од нашата фабрика се вградени илјадници часови работа, знаење и вистински мајсторски вештини. Автобусите што ги создаваме со нашите раце денес патуваат по патиштата низ Европа и САД.

Кампањата за вработување во повеќе оддели во производство е во тек. Отворени се можности за кандидати и со и без претходно работно искуство, а процесот на аплицирање е поедноставен и полесно достапен.

Во сабота, 3 октомври, од 10:00 до 14:00 часот, тимот на ВДЛ Бус Македонија ќе биде присутен на седум локации низ регионот. Дојди на најблиската локација, запознај нè и направи го првиот чекор.

Каде да нè најдеш?

• Скопје – пред Веро Џамбо во Центар
• Скопје – K Мол, Ѓорче Петров
• Велес – парк кај гимназијата
• Куманово – пред La Plaza
• Тетово – пред Домот на културата
• Кочани – платото пред Т-Мобиле
• Свети Николе – градски плоштад

Не мора да знаеш сè. Важно е да имаш желба да научиш. Кај нас можеш да го научиш занаетот и постепено да ги развиваш своите вештини. За полесен старт, новите колеги добиваат прв месец обука со целосна плата, како и целосно осигурување, превоз до и од работното место и топол оброк во кантина со ресторантско мени.

На Отворениот ден за регрутација ќе можеш да:

• се запознаеш со нашите регрутери и колеги од производство;
• дознаеш повеќе за отворените работни позиции;
• го составиш своето CV со наша помош;
• аплицираш за работа;
• направиш интервју веднаш на лице место.

Дојди на најблиската локација за тебе. Запознај нè. Аплицирај. Стани дел од тимот на ВДЛ Бус Македонија.

Доколку не си во можност да нѐ посетиш, аплицирај онлајн: https://www.vdlvanhool.com/mk/karieri/oglasi-za-rabota

Тагови: ВДЛ Бус Македонија Дооел

Има денови кога листата со задачи изгледа како да нема крај. Една задача не е завршена, а веќе пристигнуваат уште две. Колега бара помош, менаџерот додава нов приоритет, пристигнува итен мејл, а роковите остануваат исти.

Во такви моменти, најлесно е да почнете да работите на сè одеднаш. Но, токму тоа може дополнително да ве забави.

Кога имате премногу задачи, целта не е едноставно да работите побрзо. Потребно е да утврдите што е навистина приоритетно, што може да почека и што треба да се прераспредели.

1. Застанете и направете листа

Кога сте под притисок, задачите често изгледаат поитни отколку што навистина се. Наместо веднаш да започнете со работа, запишете ги сите обврски што ги имате. Потоа поделете ги според рокот и важноста.

На пример:

Итно и важно - завршете прво.
Важно, но не итно - испланирајте време за нив.
Итно, но помалку важно - проверете дали може да ги преземе некој друг.
Ниту итно ниту важно - оставете ги за подоцна.

Самото расчистување на листата може да ви помогне да добиете подобра слика за ситуацијата.

2. Не претпоставувајте дека сè е приоритет

Кога повеќе луѓе ви даваат задачи, лесно е да помислите дека секоја од нив мора да биде завршена веднаш. Но, ако сè е приоритет, тогаш всушност ништо нема јасен приоритет.

Ако не сте сигурни што треба прво да направите, прашајте го менаџерот: „Во моментов имам неколку задачи со блиски рокови. Кoja од нив сакате да ја ставам како прв приоритет?“

Ова не покажува дека не можете да се справите со работата. Покажува дека знаете да управувате со приоритети.

3. Комуницирајте кога роковите не се реални

Една од најголемите грешки е автоматски да кажете „ќе завршам“ за секоја нова задача. Ако веќе имате полн распоред, новата задача мора да влијае врз нешто друго.

Наместо само да кажете дека имате премногу работа, бидете конкретни: „Можам да ја завршам оваа задача до денес, но тогаш задачата X би се поместила за утре. Која да ја ставам како приоритет?“

На овој начин не одбивате работа, туку реално ги поставувате очекувањата.

4. Не се обидувајте да работите на пет работи истовремено

Постојаното префрлање од една задача на друга може да ви создаде чувство дека сте многу продуктивни, но често само ви го одзема фокусот. Ако е можно, одредете временски блокови за различни задачи.

На пример:

09:00 - 10:30 - извештај
10:30 - 11:00 - мејлови
11:00 - 12:30 - проект
13:00 - 14:00 - состаноци и комуникација

Не мора планот да биде совршен. Важно е да имате структура наместо постојано да реагирате на секое ново известување.

5. Кажете ако ви недостигаат информации или ресурси

Понекогаш проблемот не е само во бројот на задачи. Можеби немате доволно информации, пристап до одреден документ, поддршка од колега или јасни инструкции. Наместо да губите часови обидувајќи се сами да го решите проблемот, кажете што ви е потребно.

На пример: „За да ја завршам задачата до петок, ми требаат податоците од тимот за продажба. Можете ли да ми ги испратите до утре?“ Јасната комуникација може да спречи непотребно одложување.

6. Научете да кажете „не можам сега“ без да кажете „не“

Поставувањето граници на работа не значи дека одбивате да помогнете. Понекогаш доволно е да кажете: „Во моментов работам на две задачи со рок денес. Можам да се посветам на ова веднаш штом ги завршам. Дали тоа ви одговара?“

Така покажувате подготвеност да помогнете, но и свесност за сопствениот капацитет.

7. Ако ситуацијата постојано се повторува разговарајте со менаџерот

Еден напорен ден е нормален. Но, ако постојано добивате повеќе задачи отколку што реално можете да завршите, проблемот можеби не е само во организацијата на вашиот ден. Разговарајте со менаџерот за обемот на работа, роковите и приоритетите. До разговорот, корисно е да имате конкретен преглед на задачите што сте ги презеле, роковите и времето потребно за нивно завршување. Тоа го прави разговорот многу поконкретен од едноставното: „Имам премногу работа“.

8. Не дозволувајте притисокот да ве натера да жртвувате квалитет

Кога задачите се натрупуваат, природно е да сакате само да ги „штиклирате“ една по една. Но, брзината не треба секогаш да биде поважна од квалитетот. Подобро е навреме да кажете дека одредена задача ќе бара дополнително време, отколку да ја завршите набрзина и подоцна да поправате грешки.

Што да запомните?

Кога добивате премногу задачи одеднаш, не обидувајте се да бидете херој кој ќе заврши сè сам. Застанете. Подредете ги приоритетите. Проверете ги роковите. Прашајте што е најважно. Комуницирајте ако нешто не е реално и побарајте помош кога е потребно. Добрата организација не значи дека можете да направите бесконечен број работи во еден ден.

Значи дека знаете што треба да направите прво, што може да почека и кога е време да кажете дека капацитетот е исполнет.

Прочитај и за: 5 грешки што ги правиме во работните групни четови

Тагови: совети за работа