Државата ќе доделува грантови до 20.000 евра за отворање сопствен бизнис, финансиска поддршка за повратници од странство и месечен додаток од 3.000 денари за млади вработени во производството, како дел од Оперативниот план за вработување за 2026 година. За реализација на мерките се обезбедени речиси 40 милиони евра, со цел да се отворат нови работни места, да се намали невработеноста и да се создадат подобри услови младите да останат во земјава.

Според Ангел Димитров од Организацијата на работодавачи на Македонија, мерките можат да им помогнат на младите полесно да се вработат и да започнат сопствен бизнис, но не се доволни сами по себе за да го запрат иселувањето. Тој посочува дека младите не заминуваат само поради плата и работа, туку и поради корупцијата, партизацијата и нефункционалниот правен систем. Сепак, нагласува дека ваквите програми се важни бидејќи го поттикнуваат претприемаштвото, а покрај финансиска поддршка нудат и обуки, менторство, подготовка на бизнис-план и регистрација на фирма.

Од Министерството за економија и труд информираат дека интересот за мерката самовработување е голем, со 4.500 апликации досега, од кои повеќе од 2.800 пристигнале само во првата недела. За оваа мерка се издвоени 22,3 милиони евра, со што ќе се поддржи отворање бизнис за 2.043 лица. За младите до 29 години е предвиден грант до 10.000 евра, за лицата над 29 години до 7.000 евра, а за основање ДОО од 14.000 до 20.000 евра. Новитет е што апликантите мора да имаат најмалку средно образование, а право на аплицирање добиваат и повратниците од странство.

Тагови: Агенција за вработување (АВРМ) бизнис идеи млади

Летната сезона е во полн ек, а голем број македонски граѓани и оваа година ќе заминат на одмор во Грција со сопствен автомобил. Доколку планирате да патувате, добро е однапред да се информирате за правилата што важат на грчките патишта, бидејќи сообраќајните контроли се чести, а казните за прекршоците можат да бидат навистина високи.

Пред да тргнете на пат, проверете дали ги имате сите неопходни документи:

• Возачка дозвола
• Сообраќајна дозвола
• Лична карта или пасош
• Зелена карта (иако не е задолжителна, препорачливо е да ја имате)
• Полномошно, доколку управувате со возило што не е регистрирано на ваше име

Освен документите, во возилото треба да се наоѓа и задолжителната безбедносна опрема:

• Противпожарен апарат
• Комплет за прва помош
• Рефлектирачки елек
• Сигурносен триаголник

Грчките власти строго ги санкционираат сообраќајните прекршоци. Така, возење без сигурносен појас може да ве чини 350 евра, а во одредени случаи и привремено одземање на возачката дозвола. Казни следуваат и за користење мобилен телефон додека возите, како и за патници кои не носат појас.

Особено високи се казните за пречекорување на дозволената брзина. Доколку брзината е надмината за повеќе од 50 километри на час, казната може да достигне и до 700 евра, а можно е и привремено одземање на возачката дозвола.

Пред да тргнете кон Грција, одвојте неколку минути за да ги проверите документите, задолжителната опрема и сообраќајните правила. Така ќе избегнете непријатни изненадувања, непотребни трошоци и ќе можете безгрижно да уживате во вашиот одмор.

Тагови: годишен одмор Грција документи казни лето

Работното време во договорот е јасно дефинирано. Но, во пракса, за многу вработени работниот ден не завршува кога ќе отчука крајот на смената. Уште неколку мејлови, еден итен состанок, краток повик со клиент или „само уште ова да го завршам“ и така, ден по ден, прекувремената работа станува рутина.

Она што загрижува е што во многу компании овие дополнителни часови не се ниту евидентираат, ниту се плаќаат.

Кога прекувремената работа станува „нормална“?

Во современото работно опкружување постои силен притисок секогаш да бидеме достапни. Паметните телефони, платформите за комуникација и работата од далечина ја избришаа границата меѓу работното и приватното време.

Многу вработени чувствуваат дека мора:

• Да одговорат на порака и по работното време;
• Да останат подолго за да ги исполнат роковите;
• Да покажат дополнителен ангажман за да остават добар впечаток;
• Да не одбијат дополнителна работа од страв дека ќе бидат оценети како недоволно посветени.

Со текот на времето, ова престанува да биде исклучок и станува дел од организациската култура.

Зошто луѓето прифаќаат неплатени часови?

Причините се различни. Некои сакаат да напредуваат во кариерата, други се плашат за своето работно место, а трети едноставно немаат доволно ресурси за да ја завршат работата во редовното работно време.

Во многу случаи, проблемот не е недостаток на посветеност, туку:

• Недоволен број вработени;
• Нереално поставени рокови;
• Лоша организација на работата;
• Култура во која останувањето подолго се смета за доказ за професионалност.

Колкава е цената?

Иако краткорочно може да изгледа како начин работата да се заврши навреме, долгорочно неплатените прекувремени часови носат сериозни последици.

Вработените почесто се соочуваат со физички и ментален замор, намалена мотивација, поголем ризик од прегорување (burnout), нарушена рамнотежа помеѓу приватниот и професионалниот живот и намалена продуктивност.

Парадоксално, повеќе работни часови не секогаш значат и подобри резултати. Истражувањата покажуваат дека по одреден број часови продуктивноста значително опаѓа, а се зголемува бројот на грешки.

Што можат да направат компаниите?

Компаниите кои навистина се грижат за своите вработени не ја мерат посветеноста според тоа кој последен ќе ги изгаси светлата во канцеларијата.

Наместо тоа, тие:

• Реално ги планираат обврските;
• Обезбедуваат доволен број вработени;
• Ги евидентираат и соодветно ги надоместуваат прекувремените часови;
• Ја почитуваат границата помеѓу работното и приватното време;
• Ги охрабруваат менаџерите да бидат пример за здрав баланс.

Време е прекувремената работа повторно да стане исклучок

Посветеноста не треба да се мери со бројот на неплатени часови поминати на работа. Успешните компании градат култура во која резултатите се поважни од присуството, а благосостојбата на вработените е предуслов за долгорочен успех. Бидејќи на крајот, највредниот ресурс на секоја компанија не се работните часови туку луѓето што стојат зад нив.

Прочитајте и за: 10 стратегии со кои компаниите можат да го подобрат менталното здравје на вработените

Тагови: совети за работа

Сè повеќе развиени држави применуваат модел на флексибилно пензионирање, во кој граѓаните не се принудени да работат подолго, но ако доброволно го одложат пензионирањето, добиваат повисока месечна пензија. Овој пристап станува сè поактуелен и поради стареењето на населението, недостигот од работна сила и потребата пензиските системи да останат финансиски одржливи. Наместо сите да заминуваат во пензија на иста возраст, акцентот се става на личниот избор и на финансиската награда за оние што ќе останат подолго активни.

Во Норвешка, пензијата може да се користи од 62 години ако се исполнети условите, но работниот век може доброволно да продолжи до 75 години, со што расте и висината на пензијата. Сличен принцип важи и во Шведска и Финска, каде секоја дополнителна година работа носи повисоки примања. Во Канада, редовната пензија е на 65 години, но може да се одложи до 70, при што секој месец одложување ја зголемува идната исплата. Истото важи и во САД, каде одложувањето до 70 години носи значително повисока месечна пензија.

Во Данска, старосната граница моментално е 67 години, а за помладите генерации постепено ќе се зголемува до 70. Заедничко за сите овие модели е што нема присила – граѓаните можат да се пензионираат кога ќе ги исполнат законските услови, но државата ги стимулира ако останат на работа уште неколку години. Токму ваквиот пристап сè почесто се споменува и како можен правец за идните пензиски реформи, со јасна порака: колку подолго работиш, толку повисока пензија добиваш.

Тагови: ЕУ пензија САД