Кој стои зад брендот Olive Garden и како започна целата приказна?
Нашата семејна приказна започна во далечната 2008 година, кога како семејство одлучивме да засадиме маслинов насад со повеќе од 800 стебла. Од тогаш до денес, целата грижа за овој маслинарник, вклучувајќи го производството и продажбата на маслиново масло, ја води семејното земјоделско стопанство Аврамовски, под брендот „Olive Garden MK“ (Маслинова градина).
Како од идеја за одгледување маслинки се разви целосен бренд со финален производ „од нива до трпеза“?
Уште на самиот почеток бевме убедени дека маслинарството како земјоделска култура може да успее и да функционира и во нашата земја. Иако на почетокот постоеше големо неверување, бидејќи кај нас не постои таква традиција, ние сите овие години работевме упорно и со посветеност. Денес сме особено горди и среќни што успеавме да го создадеме овој бренд, препознатлив меѓу љубителите на маслиново масло.
Што беше најголемиот предизвик во процесот – од садење до првото произведено масло?
Маслинарството како земјоделска култура е специфично по своите карактеристики и носи свои предизвици. Еден од најголемите предизвици беше да останеме доследни во спроведувањето на годишните агротехнички планови и програми за одржување на маслинките. Ова го истакнувам бидејќи маслинарството има долг грејс период. Имено, потребни се најмалку 7–8 години за да се добие минимален комерцијален резултат. Затоа љубовта и посветеноста се најважните елементи во оваа успешна приказна.
Што го прави вашето масло поразлично од останатите на пазарот, особено во контекст на тоа што е 100% македонско?
Нашето масло е ладно цедено extra virgin маслиново масло, произведено од маслинки од нашиот насад, во строго контролирани услови. Времето од дрво до финален производ не е подолго од 4 часа, бербата е рачна, а температурата на цедење не надминува 24°C. Сите овие елементи се гаранција за производ со врвен квалитет, кој е потврден со сребрен медал освоен на Загребскиот фестивал за маслинки и маслиново масло, како и со анализи од сертифицирана лабораторија во Грција.
Колку технологијата игра улога во производството, а колку традицијата и искуството?
Технологијата и знаењето се неразделни. Технологијата има огромна улога во добивањето висококвалитетен производ, но исто толку важно е знаењето за тоа како од маслинката да се извлече најдоброто. Постојано ги надградуваме нашите знаења преку различни обуки, едукации, како и консултации со колеги од земји со долга традиција во маслинарството.
Како македонскиот пазар реагира на домашно произведено маслиново масло?
Македонскиот пазар на почетокот беше скептичен и не веруваше дека во Македонија може да се произведува extra virgin маслиново масло со висок квалитет. Довербата ја градевме постепено. Со секоја посета на нашиот маслинарник и со секоја дегустација, нашите купувачи се уверуваа во квалитетот кој стои зад аромата и вкусот на нашето масло. Преку учество на гурмански саеми успеавме дополнително да се доближиме до купувачите и да ја изградиме нивната доверба.
Дали постои план за проширување – нови пазари, поголемо производство или нови производи?
Како семејно земјоделско стопанство кое постојано ги следи трендовите на пазарот, размислуваме за зголемување на приносите од нашиот маслинарник, а со тоа и производството на extra virgin маслиново масло. Сепак, нашиот концепт останува ист – производство во мали количини, под строго контролирани услови.
Кој е вашиот совет за младите претприемачи кои сакаат да започнат сопствен агро или food бренд?
Сè започнува со добра идеја и љубов кон она што ни го нуди природата. Секако, неопходни се упорност, посветеност, добри анализи, квалитетни соработници и сè друго што е потребно за успешно воспоставување и водење на еден бренд.
Тагови: бизнис идеи Olive Garden маслиново масло