Во Владата денеска ќе заседава Економско-социјалниот совет, на седница на која присуство ќе има и премиерот Христијан Мицкоски. На маса ќе бидат темите за евентуално зголемување на минималната плата, методологијата за пресметка на потрошувачката кошничка, почитувањето и унапредувањето на колективните договори во јавниот и приватниот сектор, исплатата на додатоците на плата, како и останатата регулатива од областа на трудот.
Претставниците на Владата досега повеќепати порачаа дека ќе го прифатат решението кое со консензус ќе го постигнат синдикатите и работодавачите. Заменик-министерот за економија и труд, Марјан Ристески, минатата недела изјави дека додека нема договор, ќе продолжи да важи Законот за минимална плата, односно зголемувањето ќе се врши според веќе утврдената формула поврзана со трошоците за живот и просечната плата.
Од Бизнис конфедерацијата порачуваат дека секогаш има простор и потреба за раст на платите, но нагласуваат дека тоа треба да го прават компании кои реално можат да го издржат товарот. Тие се надеваат дека ќе биде прифатен нивниот предлог – да има зголемување на минималната плата, но придонесите да останат на постојното ниво, со што, според нив, ќе се задржи конкурентноста на стопанството и ќе се олесни притисокот врз работодавачите.
Тагови: Влада на РСМ минимална плата