Лизинг компаниите се соочуваат со сериозни административни проблеми поради начинот на кој функционира системот за сообраќаен надзор „Безбеден град“. Казните за прекршоците регистрирани кај возила со црвени таблици најчесто се испраќаат на адреса на лизинг куќите, бидејќи тие фигурираат како официјални сопственици на автомобилите, а не на возачите кои реално биле зад воланот во моментот на прекршокот.

Кога камерите ќе забележат пребрзо возење, минување на црвено светло или друг сообраќаен прекршок, системот автоматски ја генерира казната на името на формалниот сопственик. Од лизинг фирмите велат дека токму кај нив паѓа целиот административен товар – мора постојано да ги следат казните, да ги контактираат клиентите и да утврдат кој го управувал возилото, што често доведува до доцнења и ризик да се пропушти рокот од осум дена за плаќање половина од глобата.

Од Министерството за внатрешни работи засега не најавуваат промени, оценувајќи дека системот функционира согласно законот, бидејќи казната оди на името на формалниот сопственик, кој потоа е должен да го пријави вистинскиот прекршител. Лизинг компаниите, пак, инсистираат на појасни решенија и законски измени, со кои прекршоците регистрирани преку „Безбеден град“ би се пренасочувале директно и побрзо до лицето што реално го сторило прекршокот.

Тагови: МВР Сејф сити - Безбеден град лизинг компаниите

Гаража во скопската општина Аеродром била продадена за 30.000 евра, додека цените на становите во Охрид во првата половина од 2025 година пораснале за неверојатни 27 проценти. Овие податоци кои укажуваат се дел од Извештајот на Регистарот за цени и закупнини, што го објави Агенцијата за катастар на недвижности.

Во општина Центар е постигната највисока цена за продажба на стан во првото полугодие од годинава – 2.857 евра по квадрат, што за 105 квадратни метри изнесува 300.000 евра. Во истата скопска општина е и најскапо продадената куќа, за 1.150.000 евра, со 373 квадратни метри станбена површина и 1.357 квадратни метри земјиште.

Најскапо продадениот деловен простор е исто така во Центар, со површина од 3.131 квадратен метар, по цена од 6,8 милиони евра, додека индустрискиот објект во Илинден е продаден за 190.130.726 денари.

Гаража во Аеродром од 24 квадратни метри достигна цена од 1.854.000 денари, или околу 30.000 евра, односно 77.250 денари за квадратен метар.

Највисок скок на цените на становите е забележан во Охрид (27%), следи Центар и Тетово (по 22%), Битола (20%), додека најмал раст е во Струмица (2%).

Во првото полугодие најмногу станови се продадени во Аеродром (189), Чаир (182), Центар (181) и Карпош (179), а највисока вкупна вредност на продадените станови е забележана во Центар (1.261.042 илјади денари), следен Аеродром (1.193.353 илјади денари) и Карпош (1.064.588 илјади денари). Просечната цена по квадратен метар е највисока во Центар – 101.900 денари, следат Карпош (90.900 денари) и Аеродром (82.000 денари).

Движењето на бројот на продадени станови укажува на значителен раст во Тетово (60%), Велес (54%) и Охрид (50%), додека најголем пад е во Куманово (16%).

Во првата половина на 2025 година се регистрирани 15.779 трансакции – за 8,9% повеќе од истиот период минатата година, што се припишува на подобрени услови за финансирање и зголемена доверба во пазарот. Вкупниот обем на купопродажби изнесува 515,9 милиони евра, со најизразен раст во мај и најмал во јуни.

Најголемиот број купопродажби се однесува на земјоделско земјиште и шуми (32,8%) и станови (32,5%). Најмногу купопродажби се реализирани во Аеродром (562), Гази Баба (555) и Карпош (527), додека најмалку во Бутел (176). Највисока вкупна вредност на остварената цена е во Центар (65,8 милиони евра), а најниска во Штип (10,0 милиони евра).

Анализата покажува дека Центар бележи раст на обемот на купопродажби од 32%, додека Аеродром има пад од 29%. Во однос на вкупната вредност, Кисела Вода расте за 59%, а Куманово бележи пад од 26%.

Тагови: Општина Аеродром цени на станови

Кога Apple претставува нов iPhone, меѓу најчестите прашања кај луѓето е: „Колку денови работа ми требаат за да можам да си го дозволам?“ Новиот iPhone Index на Picodi за 2024 година повторно го отвора ова прашање и покажува драматични разлики во куповната моќ меѓу земјите.

Според индексот, вработените во Швајцарија треба да работат само 4 дена за да купат нов iPhone, додека вработените во САД околу 5,1 денови. Истата цена, но сосема различен финансиски напор зависи од локалните плати и животниот стандард.

А како стои Македонија?

Со просечна нето плата од околу 45.000 денари, и просечна цена од 62.000 денари за iPhone 17, македонскиот работник би требало да работи: 29 работни денови речиси цел еден месец, доколку целата плата би ја одвојувал само за овој уред.

Обично во месецот има околу 21 работни денови (стандарден пресметковен број во вакви индекси).

Дневна заработка ≈ 45 000 / 21 ≈ 2 143 денари на ден

Сега пресметуваме колку денови треба:

62 000 ден / 2 143 ден по ден = ≈ 28,9 работни денови

Оваа споредба ја отсликува реалноста на локалната куповна моќ и го нагласува значењето на правичните плати, балансираните бенефиции и стратегиите на компаниите за задржување на талент. За HR професионерите, ова е потсетник дека економските разлики влијаат не само врз животниот стандард на вработените, туку и врз нивната мотивација, финансиски стрес и продуктивност.

Прочитајте и за: Официјално: Apple ја претставува серијата iPhone 17

Тагови: iPhone 17 плата работа

Утрово воздухот во неколку македонски градови е со зголемена концентрација на ПМ10 честички, покажуваат најновите мерења. Највисоки вредности се регистрирани во Тетово (111 μg/m³) и Велес (106 μg/m³), каде загадувањето спаѓа во категоријата многу високо, додека Струмица (95 μg/m³) се наоѓа во зоната на висока концентрација. Во истата категорија на висока загаденост влегуваат и Битола (79 μg/m³) и Кавадарци (79 μg/m³), а нешто пониски, но сè уште над нормалното ниво, се вредностите во Гевгелија (61 μg/m³), Гостивар (60 μg/m³) и Кичево (55 μg/m³).

Во Скопје (52 μg/m³) воздухот е малку над границата на нормална загаденост, додека Охрид (39 μg/m³) и Куманово (27 μg/m³) се поблиску до поумерени вредности. Најчист воздух утрово е измерен во Лазарополе (2 μg/m³), што спаѓа во категоријата многу ниска концентрација на ПМ10 честички. Според важечката легенда, до 25 μg/m³ се смета за многу ниско ниво, до 50 за нормално, до 90 за високо, до 180 за многу високо, а над 180 μg/m³ за екстремно висока концентрација на честички.