Европскиот дисконтен синџир Pepco најави дека своите први продавници во Македонија ќе ги отвори во средината на 2026 година, започнувајќи со локации во Скопје. Со ова, земјава ќе стане 19-та европска држава во која брендот е присутен. Како што изјави извршниот директор за Централна и Источна Европа, Марчин Станко, Македонија одамна била дел од нивните проширителни планови, а по успешното работење во регионот, компанијата е подготвена да го направи следниот чекор.

Pepco веќе има повеќе од 4.000 продавници во 18 земји, а секој месец ги посетуваат над 30 милиони купувачи. Компанијата е позната по својата комбинација на модерен дизајн, пристапни цени и широка понуда, која опфаќа детска и женска облека, производи за домаќинство, декорација и кујнски артикли

Новите продавници во Македонија ќе бидат со просечна површина од околу 500 квадратни метри и ќе се наоѓаат во трговски центри,паркови и на главни улици. Отворањето на Pepco ќе донесе и нови можности за вработување, особено за лица со искуство во малопродажбата кои сакаат да станат дел од меѓународен бренд со високи стандарди и динамична работна средина.

Тагови: продавници продажба Pepco

Доколку сте на почетокот на вашата професионална приказна, сигурно сте се запрашале – како да добијам работа кога немам искуство? Иако звучи како парадокс, вистината е дека многу компании се подготвени да им дадат шанса на кандидати без претходно работно искуство – доколку ги препознаат вистинските квалитети.

Еве што најчесто бараат работодавците од почетници:

1. Мотивација и желба за учење

Еден од најважните сигнали за секој работодавач е вашиот ентузијазам. Покажете дека сте подготвени да учите, дека сакате да напредувате и дека не бегате од нови предизвици. Енергијата и позитивниот став често вредат повеќе од искуството.

2. Основни комуникациски и тимски вештини

Без разлика на индустријата, способноста да комуницирате јасно и да работите со други е клучна. Работодавците бараат луѓе кои умеат да слушаат, да поставуваат прашања и да се вклучат во тимот без да создаваат тензии.

3. Одговорност и професионален пристап

Дури и без искуство, можете да покажете зрелост – преку точност, организираност и сериозен однос кон задачите. Работодавците ценат луѓе на кои можат да им веруваат, дури и кога станува збор за едноставни задачи.

4. Флексибилност и отвореност за различни задачи

Во првата работа често ќе треба да излезете од вашата „комфор зона“. Прифатете го тоа како можност за учење. Работодавците сакаат луѓе кои не велат „тоа не е моја работа“, туку „можам да пробам“.

5. Потенцијал – повеќе од искуство

На интервјуто не се обидувајте да го сокриете фактот дека сте почетник. Наместо тоа, покажете што ве движи, кои вештини сте ги стекнале преку волонтирање, факултет, хоби или проекти. Потенцијалот, ставот и желбата за раст често се најголемата препорака.

Совет: Подгответе кратка приказна за тоа зошто сакате токму таа работа и како планирате да учите и придонесете. Тоа е она што остава најсилен впечаток – не бројот на години искуство, туку личноста зад апликацијата.

Дури и првата работа може да биде чекор кон голема кариера – ако започнете со вистински став и подготвеност да учите.

Прочитајте и за: Тивко напуштање: симптом на замор или на погрешен менаџмент?

Тагови: HR нова работа совети за работа

Министерството за здравство информира дека од денес започнува пријавувањето за бесплатна вакцинација против сезонски грип за лицата кои спаѓаат во ризичните групи. Заинтересираните може да се пријават преку онлајн платформата vakcinacija.mk или преку својот матичен лекар. Целта на оваа мерка е навремена заштита на најранливите категории на населението пред почетокот на грипната сезона.

Со програмата за бесплатна вакцинација се опфатени повозрасни лица над 65 години, хронично болни, здравствени работници, бремени жени, деца од 6 месеци до 5 години, како и лицата сместени во установи за социјална заштита и нивните вработени. Министерството апелира сите што припаѓаат на овие категории навреме да се пријават, со цел да ја заштитат својата здравствена состојба и да спречат компликации поврзани со сезонскиот грип.

Министерот за здравство, Азир Алиу, истакна дека интересот за вакцинација секоја година расте, што покажува дека граѓаните сè повеќе ја препознаваат важноста на превенцијата. Годинава се обезбедени рекордни 80.000 дози од четиривалентна вакцина произведена од реномираниот холандски производител „Абот“, што претставува најголема набавка на вакцини против грип досега во државата.

Тагови: вакцина здравје Министерството за здравство

По повод 7 Октомври – Светскиот ден на достоинствената работа, Сојузот на синдикати на Македонија потсетува дека не може да има достоинствен живот без достоинствени плати. Тие истакнуваат дека примањата во земјата значително заостануваат зад реалните трошоци за живот, што води кон зголемена сиромаштија и иселување на работната сила. Според ССМ, потребно е итно зголемување на платите за да се обезбеди економска сигурност и стабилност на семејствата.

Синдикатот предупредува дека работниците во Македонија се соочуваат со ниски примања, несигурни работни места и ограничено учество во процесите на одлучување. Тие бараат воспоставување на вистински социјален дијалог и создавање институции што ќе ги штитат интересите на работниците, без политички влијанија и корупција. Дополнително, ССМ посочува дека рестриктивните мерки и стагнацијата на платите во услови на инфлација само ја продлабочуваат сиромаштијата и ја намалуваат куповната моќ на граѓаните.

ССМ нагласува дека достоинствената работа значи сигурни и трајни работни места, со договори на неопределено време, фер плати и социјална заштита. Тие се спротивставуваат на привремени и повремени ангажмани без основни права и придонеси, повикувајќи на мерки против сивата економија и непријавената работа. Според нив, само преку заедничко делување на синдикатите, работодавачите, Владата и експертите може да се обезбеди општество во кое трудот е вистински вреднуван.

Тагови: вработени зголемување на плата ССМ трошоци