Кој е човекот со креативна визија и силна енергија зад маркетинг агенцијата ИН Маркетинг?
ИН Маркетинг е повеќе од агенција – таа е резултат на пријателство, доверба и заедничка страст кон креативноста и комуникацијата. Основана во 2017 година од две другарки и партнерки, Ивана и Николета - ИН Маркетинг е изграденa врз идејата дека најдобрите кампањи се раѓаат од емоција, стратегија и искрен пристап. Секоја од нас носи своја енергија, перспектива и сила, а заедно сме тим кој постојано предизвикува, креира и се вложува со срце во секој проект.
Како го претвори својот интерес за комуникација во успешна бизнис приказна?
Секогаш сум верувала дека комуникацијата е многу повеќе од зборови – таа е начин на размислување, однесување и поврзување со луѓето. Љубопитноста, потребата да разберам како размислува публиката, како се гради емоција преку порака, како една идеја станува бренд – тоа беше мојот двигател.
Со Ивана, со која веќе делевме многу слични вредности и визии, решивме да направиме нешто свое – нешто што ќе биде искрено, креативно и динамично. Така се роди ИН Маркетинг.
Нашиот интерес за комуникација прерасна во бизнис затоа што никогаш не гледавме на маркетингот како на „услуга“, туку како на партнерство со клиентите.
Клучот е да го правиш она што го сакаш, ама со дисциплина, искрен пристап и со луѓе на кои навистина им е грижа. Тогаш интересот станува приказна, а приказната – бренд.
Кои се трите најголеми предизвици со кои се соочи како жена лидер во светот на маркетингот – и што научи од нив?
Лидерството е патување полно со предизвици, особено кога си жена во светот на маркетингот, но секој предизвик носи и вредна лекција.
Првиот предизвик беше да се избориме за сериозност и доверба во средина што сè уште често ги поврзува лидерските улоги со машки имиџ. За да се надмине тоа, мора да се вложи дополнителен труд, знаење и доследност – и тоа научив дека вистинскиот авторитет не се добива, туку се гради со време и интегритет.
Вториот предизвик беше балансирањето помеѓу креативноста и бизнис резултатите. Како жена, често се очекува да имаш „емоционален пристап“, но научив дека токму тој баланс меѓу интуиција и аналитика создава најголеми резултати.
Третиот предизвик беше да останеме верни на нашата визија, и покрај надворешни притисоци и краткорочни очекувања.
Со Ивана ја создадовме ИН Маркетинг по наши правила, со вредности во кои веруваме.
Најважната лекција ми беше да верувам во себе и да не се плашам да бидам поинаква.
Дали постои „тајна формула“ за баланс меѓу кариера, мајчинство и личен живот?
За мене, сите овие нешта се подеднакво важни приоритети, и не постои магична формула што ги решава одеднаш. Сè е прашање на добра организација, јасно поставени граници и свесен избор што во кој момент е најважно.
Јас сум многу активна и постојано се трудам да стигнам секаде – од професионалните обврски до личните моменти. Но, мајчинството секогаш ми е на прво место, затоа што таму ја црпам најголемата енергија и мотивација. Семејството и пријателите ми се мојата најголема поддршка – тие се како мој личен тим за навивање, терапија и понекогаш мојот аларм кога треба “да се разбудам” .
Балансот не значи да си совршена во сè, туку да најдеш начин да дадеш максимум таму каде што е најпотребно, без да се изгубиш себеси во процесот.
Како физичката дисциплина и менталната сила ви помагаат да донесете подобри деловни одлуки?
Физичката активност ми е основа за јасен ум и стабилна енергија. Редовно вежбам, трчам и планинарам, што ми помага да се ослободам од стресот и да ја подобрам концентрацијата. Кога сум физички активна, ментално сум посилна и пофокусирана, што ми овозможува да донесувам поразумни и побалансирани деловни одлуки.
Дисциплината што ја градев преку спортот се пренесува и на работата – знам дека секој предизвик бара трпение, упорност и јасна стратегија, а тоа е клучот за успех.
Кои три совети би ѝ ги дала на млада жена што сака да започне сопствен бизнис денес?
1. Истрајност над перфекција – не мораш да знаеш сè однапред. Почни, адаптирај се и учи во движење.
2. Вистински вредности пред брзи резултати – остани верна на својата визија, дури и кога патот е подолг. Луѓето препознаваат автентичност и оригиналност. Остани своја.
3. Околина што инспирира, не што те исцрпува – избери да соработуваш со луѓе што те охрабруваат, а не кои се сомневаат во тебе. Енергијата што те опкружува ќе влијае врз сè што создаваш.