Од утре до 10 ноември ќе трае пријавувањето на лотаријата за зелена карта за 2022 година за Соединетите Американски Држави.

Пријавувањето е преку официјалната веб страна  dvprogram.state.gov, на која има целосни инструкции, кандидатите ќе можат да проверат дали се избрани  преку програмата почнувајќи од 8 мај 2021 година.

Од Амбасадата на САД во Северна Македонија информираат дека учеството во лотаријата  е бесплатно и им препорачуваат на кандидатите да ги спремат и поднесат своите пријави што е можно порано.

-Кандидатите смеат да побараат помош од страна на трето лице, кое ќе ја поднесе пријавата во нивно име, но секој кандидат е одговорен за тоа дали поднесените информации во пријавата се потполни и точни.  Внесување на неточни или нецелосни податоци може да доведе до дисквалификување на кандидатот, дури и откако е извлечен како добитник.  Без разлика дали пријавата е поднесена лично или со помош на адвокат, пријател или роднина, секој кандидат може да поднесе само една пријава. Поднесувањето на повеќе пријави ќе доведе до дисквалификување од лотаријата, појаснуваат од Амбасадата.

Секој кандидат треба да ја испечати потврдената страница од пријавата со својот единствен број и да ја зачува до 30 септември 2022 година, за да може да провери дали е извлечен.  Овој број е единствениот начин преку кој може да се провери дали кандидатот е избран.

Тагови: зелена карта

Регулаторната Комисија за Енергетика ги објави новите цени на горивата – од вечерва, бензините поевтинуваат додека дизелот поскапува.

Во согласност со методологијата за пресметка на цените, од вечерва на полноќ малопродажните цени се намалуваат во просек за 0.34%.

Цените на ЕУРОСУПЕР-95 и ЕУРОСУПЕР-98 се намалуваат за по 1.50 денари, па еден литар 95-октански бензин ќе чини 59.00 денари, додека еден литар 98-октански бензин ќе чини 61.00 денари.

Цената на ЕУРОДИЗЕЛ горивото се зголемува за половина денар, и еден литар дизел од вечерва ќе чини 50.00 денари.

Новите цени стапуваат на сила вечерва на полноќ.

Понеделник 12 октомври ќе биде неработен ден за сите граѓани, соопшти Министерството за труд и социјална политика. Ова произлегува од празничниот ден кој му претходи односно Денот на народното востание.

„Согласно со Законот за празниците, 11 октомври 2020 година (недела), Денот на народното востание, е државен празник. Понеделник, 12 октомври е неработен ден за сите граѓани, стои во соопштението.

Министерството за труд и социјална политика на граѓаните им го честита Денот на народното востание.

Дополнително, тие денови се и меѓу деновите кои ќе потпаднат под таканаречениот Викенд без ДДВ. На 10, 11 и 12 октомври за се што ќе потрошите на македонски производи и на ИТ опрема ќе ви биде вратен ДДВ.

Владата вчера ги усвои измените на Законот.

По регистрирањето на над 600 нови случаи на инфицирани со Ковид-19 во изминативе три дена, Владата синоќа ги прифати мерките што ги претходно ги препопрача Комисијата за заразни болести, кои предвидуваат забрана на гостување на пејачи и ограничување на јачината на музиката и на бројот на гости во угостителските објекти.

– Тоа значи дека повеќе нема да има гостување на пејачи и ди-џеи во угостителските објекти. Потсетуваме повторно дека дискотеките и ноќните клубови немаа, односно во ниту еден момент не добија дозвола за работа. Понатаму се намалува дозволената јачина на звукот на 55 децибели за да се одржи препорачаната дистанца и се намалува бројот на лица коишто седат на една маса од 12 на 4 лица, изјави министерот за здравство Венко Филипче.

Комисијата за заразни болести, вчера и предложи на Владата, со цел намалување на растот на новозаболени од Корона, да донесе одлука за забрана за гостување на пејачи и ди-џеи во сите угостителски објекти, за ограничување на јачината на музиката до 55 децибели и за намалување на бројот на луѓе кои може да седат на една маса во угостителски објект од сега дозволените 12 на четири.

Покрај ова ќе се инсистира на стриктно почитување на точка 3 од Протоколот за отворање и работа на угостителските објекти и од Протоколот за отворање и работа на кафетериите, со која не е дозволено послужување на гости на стоење на шанк и стоечки маси.

Владата го прифати и укажувањето на Комисијата за потребата од строго почитување на забраната за работа на ноќни барови и дискотеки и потребата од преземање на ригорозни мерки од страна на надлежните институции во случај на прекршување на забраната.

Филипче оцени дека ваквите мерки се апсолутно оправдани и дека сега е добар период кога треба да се имплементираат.

Државниот пазарен инспекторат само во саботата, спроведе над 100 контроли низ целата држава и притоа кај 19 субјекти изрече казни за непочитување на здравствените протоколи и други прекршоци. Конкретно, седум субјекти организирале свадби и тоа во Струга (1), Тетово (2) и Скопје (4). Кај осум субјекти е констатирано непочитување на здравствените протоколи, односно во Струмица (2), Скопје (5) и Битола (1).

Поради непостапување според здравствени прописи за време на епидемија, вчера бил приведен и управителот на барот „Мош“. Конкретно, лицето организирало музички настан – концерт каде што помеѓу гостите не се почитувало дозволеното растојание од 1,5 до 2 метри и повеќето лица не носеле заштитни маски на лицето, и не биле исполнети и други одредби од пропишаните здравствени протоколи.

Поради ваквите појави министерот за здравство посочи дека една од можните мерки, понатаму е и ограничување на работа на одредени економски субјекти и на бројот на луѓе во јавниот превоз, како и мерката за носење маски на отворено.

Од друга страна, министерот Филипче вели дека ја следат ситуацијата и понатаму доколку треба има план и за дополнителни рестрикции ако тоа биде потребно, посочувајќи дека зголемениот притисок или мини бран е очекуван и го најавувале, како есенски бран, по завршување на годишните одмори.

Според него, за други рестриктивни мерки би размислувале во подоцнежните есенски месеци, кога се очекува и појава на сезонскиот грип, настинки поради студеното време, како и зголемена загаденост на воздухот.